2 Kings 15

Ilokano (Ti Biblia (1973))

← Chapter 14 Jump to: Chapter 16 →

1Idi maicaduapulo ket pito a tawen ni Jeroboam nga ari ti Israel ni Zacarias nga anac ni Amasias nga ari ti Juda nangrugi a nagari.

2Agtawen idi iti sangapulo ket innem idi nangrugi a nagari; ket nagari idiay Jerusalem bayat iti limapulo ket dua a tawen: ket ti nagan ni inana Jecolia taga Jerusalem.

3Ket inaramidna daydi a nalinteg cadagiti mata ni Jehova, a mayalubog cadagiti isu-amin nga inaramid ni amana nga Amasias.

4Nupay casta dagiti nangato a disdisso saanda a naiccat: dagiti tattao agidatdaton ken agpuurda pay laeng iti incienso cadagiti nangato a disso.

5Ket ni Jehova kinabilna di ari, iti casta nga isu nagcucutel inggana iti aldaw ti ipapatayna, ket nagnaed iti balay a putputong. Ket ni Joatam nga anac ti ari isu idi ti pangolo iti balay, a mangocom cadagiti umili ti daga.

6Ti matda cadagiti ar-aramid ni Azarias, ken isu-amin nga inaramidna, saanda aya a naisurat iti libro dagiti cronicas dagiti ar-ari ti Juda?

7Ket ni Azarias nakiturog cadagiti ammana; ket isu intabonda a naidinna cadagiti ammana idiay ili ni David: ket ni Joatam nga anacna nagari iti saadna.

8Idi maicatlopulo ket walo a tawen ni Azarias nga ari ti Juda ni Zacarias nga anac ni Jeroboam nagari iti Israel idiay Samaria iti innem a bulan.

9Ket inaramidna daydi a dakes iti imatang ni Jehova, a cas iti inaramid dagiti ammana: saan a pimmanaw cadagiti basbasol ni Jeroboam nga anac ni Nabat, isuda a pinamagbasolna iti Israel.

10Ket ni Sallum nga anac ni Jabes immalsa a maibusor kencuana, ket kinabilna iti sango ti umili, ket isu pinatayna, ket nagari iti saadna.

11Ti matda cadagiti ar-aramid ni Zacarias, adtoy, a naisurat iti libro dagiti cronicas dagiti ar-ari ti Israel.

12Daytoy isu ti sao ni Jehova nga insaona idi ken ni Jehu, a kinunana, Dagiti annacmo agingga iti maicapat a caputotan tumugawdanto iti trono ti Israel. Ket naaramid idi a casta.

13Ni Sallum nga anac ni Jabes nangrugi a nagari idi tawen a maicatlopulo ket siam ni Ozias nga ari ti Juda; ket nagari iti uneg ti maysa a bulan idiay Samaria.

14Ket ni Manahem nga anac ni Gadi simmang-at a naggapu ti Tirsa, ket immay iti Samaria, ket kinabilna ni Sallum nga anac ni Jabes idiay Samaria, ket isu pinatayna, ket nagari idi saadna.

15Ti matda cadagiti ar-aramid ni Sallum, ken di yaalsana nga inaramidna idi, adtoy, a naisuratda iti libro dagiti cronicas dagiti ar-ari ti Israel.

16Idin ni Manahem kinabilna ti Tifsa, ken isu-amin dagiti adda kencuana, ken dagiti sacupna, manipud Tirsa: agsipud ta dida linucatan a maipaay kencuana, gapuna a kinabilna; ken isu-amin a babbai kencuana a masicug binettacanna.

17Idi maicatlopulo ket siam a tawen ni Azarias nga ari ti Juda nangrugi ni Manahem nga anac ni Gadi a nagari iti Israel, ket nagari bayat iti sangapulo a tawen idiay Samaria.

18Ket inaramidna daydi a dakes iti imatang ni Jehova: saan a pimmanaw cadagiti isu-amin nga al-aldawna cadagiti basbasol ni Jeroboam nga anac ni Nabat, isuda a pinamagbasolna iti Israel.

19Ket ni Ful nga ari ti Asiria immay a maibusor iti daga; ket ni Manahem nangted ken ni Ful iti sangaribu a talento a pirac, tapno ti imana makicaddua coma kencuana a mangpasingked iti pagarian iti imana.

20Ket ni Manahem sinapulna ti cuarta ti Israel, cadagiti met laeng amin a mannacabalin a lallaki a nasanicua, iti tumunggal lalaki limapulo a siclo a pirac, tapno maited iti ari ti Asiria. Casta ti panagsubli ti ari ti Asiria, ket saan idi a nagtactac idiay a daga.

21Ti matda cadagiti ar-aramid ni Manahem, ken isu-amin nga inaramidna idi, saanda aya a naisurat iti libro dagiti cronicas dagiti ar-ari ti Israel?

22Ket ni Manahem nakiturog cadagiti ammana; ket ni Pekaia nga anacna nagari iti saadna.

23Idi maicalimapulo a tawen ni Azarias nga ari ti Juda ni Pekaia nga anac ni Manahem nangrugi a nagari iti Israel idiay Samaria, ket nagari bayat iti dua a tawen.

24Ket inaramidna daydi nga isu ti a dakes iti imatang ni Jehova: saan a pimmanaw cadagiti basbasol ni Jeroboam nga anac ni Nabat, isuda a pinamagbasolna iti Israel.

25Ket ni Peka nga anac ni Remalias, a capitanna immalsa a maibusor kencuana, ket isu kinabilna idiay Samaria, idi cangatoan a paset ti balay ti ari, iti icacadua da Argob ken Arif; ken caduana dagiti limapulo a lallaki cadagiti Galaaditas: ket isu pinatayna, ket nagari iti saadna,

26Ti matda cadagiti ar-aramid ni Pekaia, ken isu-amin nga inaramidna, adtoy, a naisuratda iti libro dagiti cronicas dagiti ar-ari ti Israel.

27Idi maicalimapulo ket dua a tawen ni Azarias nga ari ti Juda ni Peka nga anac ni Remalias nangrugi a nagari iti Israel idiay Samaria, ket nagari bayat iti duapulo a tawen.

28Ket inaramidna daydi a dakes iti imatang ni Jehova: saan a pimmanaw cadagiti basbasol ni Jeroboam nga anac ni Nabat, isuda a pinamagbasolna iti Israel.

29Cadagidi al-aldaw ni Peka nga ari ti Israel immay ni Teglat-palasar nga ari ti Asiria, ket innalana ti Aion, ken ti Abel-bet-maaca, ken ti Janoe, ken ti Cedes, ken ti Asor, ken ti Galaad, ken ti Galilea, ken isu-amin a daga ti Neftali, ket inyallatiwna ida a nacayawan idiay Asiria.

30Ket ni Oseas, nga anac ni Ela nagaramid iti yaalsa a maibusor ken ni Peka nga anac ni Remalias, ket kinabilna, ken isu ti pinapatayna, ket nagari iti saadna, iti maicaduapulo a tawen ni Joatam nga anac ni Uzzia.

31Ti matda cadagiti ar-aramid ni Peka, ken isu-amin nga inaramidna, adtoy, a naisuratda iti libro dagiti cronicas dagiti ar-ari ti Israel.

32Idi maicadua a tawen ni Peka nga anac ni Remalias nga ari ti Israel ni Joatam nga anac ni Uzzia nga ari ti Juda nangrugi a nagari.

33Idi nangrugi a nagari agtawen idi iti duapulo ket lima a tawen; ket nagari bayat iti sangapulo ket innem a tawen idiay Jerusalem. Ket ti nagan ni inana Jerusa anac ni Sadoc.

34Ket inaramidna daydi a nalinteg cadagiti mata ni Jehova; inaramidna a mayalubog cadagiti isu-amin nga inaramid ni amana nga Uzzia.

35Nupay casta dagiti nangato a disso saanda a naiccat: dagiti tattao agidaton ken agpuurda idi pay laeng iti incienso cadagiti nangato a disso. Isu binangonna di ruangan a nangatngato ti balay ni Jehova.

36Ti matda cadagiti ar-aramid ni Joatam, ken isu-amin nga inaramidna, saanda aya a naisurat iti libro dagiti cronicas dagiti ar-ari ti Juda?

37Cadagidi nga al-aldaw ni Jehova rinugianna nga imbaon a maibusor iti Juda ni Rasin nga ari ti Siria, ken ni Peka nga anac ni Remalias.

38Ket ni Joatam nakiturog cadagiti ammana, ket isu naitabon a naidinna cadagiti ammana idiay ili ni David nga amana: ket ni Acaz nga anacna nagari iti saadna.

← Chapter 14 Jump to: Chapter 16 →