2 Kings 24

Ilokano (Ti Biblia (1973))

← Chapter 23 Jump to: Chapter 25 →

1Cadagidi al-aldawna ni Nabucodonozor nga ari sadi Babilonia simmang-at, ket ni Joacim nagbalin nga adipenna bayat iti tallo a tawen: sa nagsubli ket immalsa a maibusor kencuana.

2Ket ni Jehova nangibaon iti maibusor kencuana cadagiti buybuyot dagiti Caldeos, ken dagiti buybuyot dagiti Sirios, ken dagiti buybuyot dagiti Moabitas, ken dagiti buybuyot dagiti annac ni Ammon; ket imbaonna ida a maibusor iti Juda tapno isu ti dadaelenda, a mayalubog iti sao ni Jehova, nga insaona idi a naaramat dagidi ad-adipenna a mammadto.

3Pudno unay nga iti panagbilin ni Jehova, immay daytoy iti Juda, tapno isu ti iccatenna iti imatangna, a gapu cadagiti basbasol ni Manases, a mayalubog cadagiti isu-amin nga inaramidna.

4Ken casta met a gapu iti dara nga awanan basol nga imbuyatna; ta pinunnona ti Jerusalem iti dara nga awanan basol: ket saan a pinacawan ni Jehova.

5Ti matda cadagiti ar-aramid ni Joacim, ken isu-amin nga inaramidna, saanda aya a naisurat iti libro dagiti cronicas dagiti ar-ari ti Juda?

6Iti casta ni Joacim nakiturog cadagiti ammana; ket ni Joaquin nga anacna nagari iti saadna.

7Ket ti ari ti Egipto saanen a rimmuar idi dagana iti uray caanoman; ta ti ari ti Babilonia innalana, nanipud iti waig ti Egipto agpatingga iti carayan Eufrates, isu-amin a cucua idi ti ari ti Egipto.

8Agtawen idi iti sangapulo ket walo ni Joaquin idi a nangrugi a nagari; ket nagari idiay Jerusalem bayat iti tallo a bulan: ket ti nagan ni inana Neusta anac ni Elnatan a taga Jerusalem.

9Ket inaramidna daydi a dakes iti imatang ni Jehova, a mayalubog cadagiti isu-amin nga inaramid ni amana.

10Iti daydi a tiempo dagiti ad-adipen ni Nabucodonozor nga ari ti Babilonia simmang-atda iti Jerusalem, ket ti ili nalacub.

11Ket ni Nabucodonozor nga ari ti Babilonia immay iti ili, iti bayat a pananglacub dagiti ad-adipenna;

12Ket ni Joaquin nga ari ti Juda rimmuar agingga iti ari ti Babilonia, isu, ken ni inana, ken dagiti ad-adipenna, ken dagiti panguloenna, ken dagiti turayenna: ket ti ari ti Babilonia isu ti innalana idi maicawalo a tawen ti panagarina.

13Ket impanawna sadiay amin dagiti gamgameng ti balay ni Jehova, ken dagiti gamgameng ti balay ti ari, ket binurburacna dagiti isu-amin nga alicamen a balitoc, nga inaramid idi ni Salomon nga ari ti Israel iti templo ni Jehova, cas kinuna idi ni Jehova.

14Ket impanna ti dagup ti Jerusalem, ken isu-amin a pangpanguloen, ken isu-amin dagiti tattao a maingel ken napigsa, sangapulo ribu a kinayawan, ken isu-amin dagiti nalaing nga agaramid, ken dagiti mammanday; awan nalabasan, malacsid dagiti capapanglawan unay iti umili ti daga.

15Ket inyallatiwna ni Joaquin idiay Babilonia; ken ti ina ti ari, ken dagiti assawa ti ari, ken dagiti turayenna, ken dagiti lallaki a pangolo ti daga, impanna ida a kinayawan nanipud Jerusalem agingga iti Babilonia.

16Ket isu-amin a lallaki a maingel, a pito ribu met laeng, ken dagiti nalaing nga agaramid ken dagiti mammanday a sangaribuda, isu-amin dagiti mamaingel ken macabael a makigubat, uray isuda ti ari ti Babilonia impanna a kinayawan idiay Babilonia.

17Ket ti ari ti Babilonia inaramidna ni Matanias, a cabsat ti ama ni Joaquin, nga ari iti saadna, ket sinuctanna ti naganna iti Sedecias.

18Agtawen idi iti duapulo ket maysa a tawen ni Sedecias idi a nangrugi a nagari; ket nagari idiay Jerusalem bayat iti sangapulo ket maysa a tawen: ket ti nagan ni inana Amital anac ni Jeremias a taga Libna.

19Ket inaramidna daydi a dakes iti imatang ni Jehova, a mayalubog iti isu-amin nga inaramid ni Joacim.

20Ta gapu iti pungtot ni Jehova naaramid daydi idiay Jerusalem ken idiay Juda, inggana iti napagtalawna ida nanipud iti saclangna. Ket ni Sedecias immalsa a maibusor iti ari ti Babilonia.

← Chapter 23 Jump to: Chapter 25 →