2 Kings 17 — Ilokano (Ti Biblia (1973))

1Idi maicasangapulo a tawen ni Acaz nga ari ti Juda nangrugi ni Oseas nga anac ni Ela a nagari iti Israel idiay Samaria, ket nagari bayat iti siam a tawen.

2Ket inaramidna daydi a dakes iti imatang ni Jehova, nupay saan a cas cadagiti ar-ari ti Israel nga immun-unada ngem isu.

3Ni Salmanasar nga ari sadi Asiria simmang-at a maibusor kencuana: ken ni Oseas nagbalin nga adipenna, ket nagbubuis kencuana.

4Ket ti ari ti Asiria nasucalanna ti yaalsa ni Oseas; ta nagbaon idi cadagiti babaonen ken ni Si nga ari ti Egipto, ket saan a nagidatagen iti buis iti ari ti Asiria, cas inaramidna iti tinawentawen: gapuna a ti ari ti Asiria isu ti impisocna, ken impupucna iti pagbaludan.

5Idin ti ari ti Asiria simmang-at iti isu-amin a daga, ket simmang-at iti Samaria, ket isu ti linacubna bayat iti tallo a tawen.

6Iti maicasiam a tawen ni Oseas ti ari ti Asiria innalana ti Samaria, ket inyallatiwna ti Israel sadi Asiria, ket incabilna ida idiay Hala, ken iti Habor, a carayan ti Gozan, ken cadagiti il-ili dagiti Medos.

7Ket casta idi, nga agsipud ta dagiti annac ti Israel nagbasolda iti maicaniwas ken ni Jehova a Diosda, a nangaon cadacuada iti daga ti Egipto, iti baba ti ima ni Faraon nga ari sadi Egipto, ket nagbutengda cadagiti sabsabali a didios,

8Ken nagnagnada cadagiti pagal-alagadan dagiti nasnacion, isuda a pinagtalaw idi ni Jehova iti sango dagiti annac ti Israel, ken cadagiti inaramid dagiti ar-ari ti Israel.

9Ket dagiti annac ti Israel nagaramidda a sililimed cadagiti saan a nalinteg a maibusor ken ni Jehova a Diosda: ket nangbangonda a maipaay cadacuada cadagiti nangato a disdisso cadagiti isu-amin a il-ilida, manipud iti torre dagiti agwanwanawan aginggana iti ili a nasarikedkedan;

10Ken nabangonda idi cadagiti monmon ken dagiti Asherah iti tapaw ti tunggal turod a natayag, ken iti siroc dagiti isu-amin a caycayo a narucbos;

11Agpuurda sadiay iti incienso cadagiti isu-amin a nangato a disdisso, a cas inaramid dagiti nasnacion isuda nga inyalis idi ni Jehova nanipud iti sangoda; ken nagaramidda cadagiti dakes a panggargarida ken Jehova nga agpungtot;

12Nagservida cadagiti ladladawan, a nagcunaan idi ni Jehova cadacuada, Dicayto aramiden daytoy.

13Nupay casta ni Jehova namanecnec iti Israel, ken iti Juda, iti tunggal mammadto, ken cadagiti isu-amin a macakita iti masacbayan, a cunana, Sumiasicayo cadagita daldalanyo a dakes, ket tungpalenyo dagiti bilbilinco ken pagal-alagadac, a mayalubog iti isu-amin a linteg nga imbilinco cadagidi ammayo, ken imbaonco cadacayo a naaramat dagiti ad-adipenco a mammadto.

14Nupay casta isuda dida impangag, no di ket pinatangkenda ti teltelda, a cas iti teltel dagidi ammada, dagidiay a di namati ken ni Jehova a Diosda.

15Ket linacsidda dagiti pagal-alagadanna, ken ti tulagna, nga inaramidna idi cadagidi ammada, ken dagiti panpanecnecna a pinangpasingkedna cadacuada; ket sinurotda ti kinaubbaw, ket nagbalinda a naubbaw, ket napanda a siaannurot cadagiti nasnacion nga adda idi iti aglicmut cadacuada, maipapan cadagidiay ni Jehova binilinna ida idi a dida agaramid coma a cas cadacuada.

16Ket indianda amin dagiti bilbilin ni Jehova a Diosda, ket nagaramidda ti maipaay cadacuada cadagiti ladladawan a sinocog a dua met laeng a sinan-ururbon ti vaca, ken nagaramidda iti maysa nga Asherah, ket nagcararaganda dagiti isu-amin a buybuyot sadi langit, ket nagservida ken Baal.

17Ket impalasatda dagiti annacda a lallaki ken babbai iti apuy, ket inaramatda ti panagbuybuyon, ken panagbagbaglan, ket inlacoda dagiti bagbagida met laeng a nagaramid iti daydi a dakes iti imatang ni Jehova, a pinanggargarida kencuana nga agpungtot.

18Gapuna a ni Jehova nagpungtot unay iti Israel, ket iniccatna ida iti imatangna, nga awan ti matda idi no di laeng ti caputotan ni Juda.

19Ti Juda met dina tinungpal dagiti bilbilin ni Jehova a Diosda, no di ket nagnagna cadagiti pagal-alagadan ti Israel, nga inaramidda.

20Ket ni Jehova inlacsidna ti isu-amin a putot ti Israel, ket pinarigatna ida, ket inyawatna ida iti ima dagiti agsamsam agingga iti naipanawna ida iti imatangna.

21Ta pinisangna ti Israel iti balay ni David; ket inaramidda nga ari ni Jeroboam nga anac ni Nabat: ket ni Jeroboam inyadayuna ti Israel iti isusurotda ken ni Jehova, ket pinagbasolna ida iti dackel a basol.

22Ket dagiti annac ti Israel nagnada cadagiti isu-amin a basbasol ni Jeroboam nga inaramidna; dida pimmanaw cadacuada:

23Agingga iti iniccat ni Jehova ti Israel iti imatangna, a cas kinunana a naaramat dagiti isu-amin nga ad-adipenna a mammadto. Casta ti pannacayalis ti Israel nanipud iti dagada agingga iti Asiria agingga itoy nga aldaw.

24Ket ti ari sadi Asiria nangyeg cadagiti tattao a naggapu iti Babilonia ken naggapu iti Cuta, ken naggapu iti Ava, ken naggapu iti Hamat ken naggapu iti Sefarvaim, ket incabilna ida cadagiti il-ili ti Samaria iti naglugaran dagiti annac ti Israel; ket tinagicuada ti Samaria, ket nagnaedda cadagiti il-ilina.

25Ket casta idi, iti rugi ti panagnaedda sadiay, nga isuda saanda a nagbuteng ken ni Jehova: gapuna a ni Jehova nangibaon cadacuada cadagiti leon a namapatayda cadagiti dadduma cadacuada.

26Gapuna nga isuda nagsaoda iti ari sadi Asiria a kinunada, Dagiti nasnacion nga inyallatiwmo, ken incabilmo cadagiti il-ili ti Samaria, saanda nga ammo ti linteg ti Dios idiay a daga: gapuna a nangibaon cadacuada cadagiti leon, ket, adtoy, a patayenda ida, agsipud ta dida ammo ti linteg ti Dios ti daga.

27Idin ti ari sadi Asiria nagbilin, a kinunana, Mangipancayo sadiay iti maysa cadagiti papadi nga inyegyo nanipud sadiay; ket mapanda coma ken agnaedda sadiay, ket isurona coma cadacuada ti linteg ti Dios ti daga.

28Iti casta ti maysa cadagiti papadi a nayallatiw nanipud Samaria immay ket nagnaed idiay Bet-el, ket isurona ida no casano ti panagbutengda coma ken ni Jehova.

29Nupay casta ti tumunggal nacion nagaramid cadagiti didiosna met laeng, ket icabilna ida cadagiti balbalay cadagiti nangato a disdisso nga inaramid idi dagiti taga Samaria ti tumunggal nacion cadagiti il-ili a pagnaedanda idi.

30Ket dagiti tattao a taga Babilonia inaramidda ti Succot-benot, ket dagiti tattao a taga Cuta inaramidda ti Nergal, ket dagiti tattao a taga Hamat inaramidda ti Asima,

31Ket dagiti Heveos inaramidda ti Nibaz ken ti Tartae; ket dagiti taga Sefarvaim pinuuranda dagiti annacda iti apuy a maipaay cada Adramelec ken Anamelec, a didios ti Sefarvaim.

32Casta ti panagbutengda idi ken ni Jehova, ket inyaramidanda ida cadagiti papadida met laeng dagiti nangato a disdisso, nga agidatdatonda cadagiti maipaay cadacuada cadagiti balbalay cadagiti nangato a disdisso.

33Ket nagbutengda idi ken ni Jehova, ket nagservida cadagiti didiosda met laeng, a siaannurot iti wagas dagiti nasnacion a nanipud cadacuada nayallatiwda idi.

34Agingga iti daytoy nga aldaw agar-aramidda a siaannurot idi immun-una a wagas: saanda nga agbuteng ken ni Jehova, saanda met nga agaramid a siaannurot iti ipaannurotda, wenno siaannurot cadagiti ipaalagadda, wenno siaannurot iti linteg wenno cadagiti bilbilin ni Jehova a imbilinna cadagiti annac ni Jacob, a ninaganna iti Israel;

35Agraman cadagidiay a ni Jehova nagaramidanna idi iti tulag, ken binilinna ida, a kinunana, Dicayto agbuteng cadagiti sabsabali a didios, dicayto agrucnoy cadacuada, dicayto agservi cadacuada, dicayto agidaton cadacuada:

36No di ket ken ni Jehova, a nangaon cadacayo idiay daga ti Egipto iti dackel a pannacabalin ken tackiag a siuunnat, agbutengcayto kencuana, ket isu ti pagrucnoyanyonto, ket isu ti pagidatonanyonto:

37Dagiti anannuroten ken al-alagaden, ken ti linteg ken ti bilin nga insuratna a maipaay cadacayo, tungpalenyonto nga aramiden iti agnanayon; ket dicayto agbutbuteng cadagiti sabsabali a didios:

38Ket ti tulag nga inaramidco cadacayo dicayto lipatan; dicayto agbuteng cadagiti sabsabali a didios:

39No di ket ken ni Jehova a Diosyo ti pagbutnganyo: ket ispalennacayto iti ima dagiti isu-amin a cabcabusoryo.

40Nupay casta isuda saanda nga impangag, no di ket nagaramidda a siaannurot iti immun-una a wagasda.

41Iti casta dagiti nasnacion nagbutengda ken ni Jehova, ket nagservida cadagiti kinitikitan a ladladawan; casta met dagiti annacda, ket dagiti annac dagiti annac nagaramidda a cas cadagiti ammada, casta ti ar-aramidenda agingga itoy nga aldaw.