2 Kings 13

Ilokano (Ti Biblia (1973))

← Chapter 12 Jump to: Chapter 14 →

1Idi tawen a maicaduapulo ket tallo ni Joas nga anac ni Ocozias, nga ari ti Juda, ni Joacaz nga anac ni Jehu nangrugi a nagari iti Israel idiay Samaria, ket nagari bayat iti sangapulo ket pito a tawen.

2Ket inaramidna daydi a dakes iti imatang ni Jehova, ket sinurotna dagiti basbasol ni Jeroboam nga anac ni Nabat, a pinamagbasolna iti Israel; ket saan a simmina cadacuada.

3Ket ti pungtot ni Jehova simged a maibusor iti Israel, ket inyawatna ida iti ima ni Hazeel nga ari ti Siria, ken iti ima ni Ben-adad nga anac ni Hazeel, iti cancanayon.

4Ket ni Joacaz nagdawat ken ni Jehova, ket ni Jehova impangagna: ta kinitana ti pannacaparigat ti Israel, no casano ti panangparigat ti ari ti Siria cadacuada.

5(Ket ni Jehova nangted iti Israel iti maysa a mangisalacan, iti casta nacalapsotda iti babaen ti ima dagiti Sirios; ket dagiti annac ti Israel nagnaedda cadagiti toltoldada a cas la idi ugma.

6Nupay casta saanda a simmina cadagiti basbasol ti balay ni Jeroboam, a pinamagbasolna iti Israel, no di ket nagdalanda cadacuada: ket nabati met ti Ashera idiay Samaria.)

7Ta isu saan a nangtidda idi ken ni Joacaz cadagiti tattao no di laeng limlimapulo a tattao a nagcacabayo, ken sangapulo a luglugan, ken sangapulo ribu a tattao a sacasaca; ta ti ari sadi Siria dinadaelna ida, ket inaramidna ida a cas la tapoc a payatpayaten.

8Ti matda cadagiti ar-aramid ni Joacaz, ken isu-amin nga inaramidna, ken ti kinamaingelna, saanda aya a naisurat iti libro dagiti cronicas dagiti ar-ari ti Israel?

9Ket ni Joacaz nakiturog cadagiti ammana; ket isu intabonda idiay Samaria: ket ni Joas nga anacna nagari iti saadna.

10Idi maicatlopulo ket pito a tawen ni Joas nga ari ti Juda nangrugi ni Joas nga anac ni Joacaz a nagari iti Israel idiay Samaria, ket nagari bayat iti sangapulo ket innem a tawen.

11Ket inaramidna daydi a dakes iti imatang ni Jehova; saan a pimmanaw cadagiti isu-amin a basbasol ni Jeroboam nga anac ni Nabat, a pinamagbasolna iti Israel; no di ket nagdalan cadacuada.

12Ti matda cadagiti ar-aramid ni Joas, ken amin dagidi inaramidna, ken ti kinamaingelna a pinanggubatna a maibusor ken ni Amasias nga ari ti Juda, saanda aya a naisurat iti libro dagiti cronicas dagiti ar-ari ti Israel?

13Ket ni Joas nakiturog cadagiti ammana; ket ni Jeroboam nagtugaw iti rabaw ti tronona: ket ni Joas naitabon idiay Samaria a naidinna cadagiti ar-ari ti Israel.

14Ni Eliseo masakit idi iti sakitna a nacatayanna: ket ni Joas nga ari ti Israel simmalog kencuana, ket isu ti sangitanna idi, ket kinunana, sangitanna idi, ket kinunana, Amac, amac, dagiti luglugan ti Israel ken dagiti tattaona nga agcacabayo!

15Ket ni Eliseo kinunana kencuana, Mangalaca iti ba-i ken cadagiti pana; ket isu innalana di ba-i ken dagiti pana.

16Ket kinunana iti ari ti Israel, Iparabawmo ta imam iti rabaw ti ba-i: ket isu imparabawna di imana iti rabawna. Ket ni Eliseo impatayna dagiti imana iti rabaw dagiti ima ti ari.

17Ket kinunana, Luctam ta tawa nga agturong iti daya; ket isu ti linuctanna. Idin ni Eliseo kinunana, Mangipanaca ala: ket isu nangipana. Ket isu kinunana, Ti pana ni Jehova iti balligi, ti met laeng pana ti panagballigi a maibusor iti Siria; ta sica cabilemto dagiti taga Siria idiay Afec, inggana iti matalipupusmo ida.

18Ket kinunana, Alaem dagiti pana; ket innalana ida, ket kinunana iti ari ti Israel, Cabilem ta daga; ket isu kinabilna iti namitlo, ket simmardeng idi.

19Ket ti lalaki ti Dios naglucsaw kencuana, ket kinunana, Kinabilmo coma iti naminlima wenno namininnem a daras: no casta kinabilmo coma ti Siria inggana iti isu matalipupusmo: gapuna ita nga iti laeng mamitlo a daras ti panangcabilmo iti Siria.

20Ket ni Eliseo natay ket isu intabonda. Dagiti buybuyot dagiti Moabitas sinillongda ti daga idi a sumsumrec ti tawen.

21Ket naaramid idi nga itabtabonda ti maysa a tao, nga, adtoy, a nasiimda ti maysa a buyot; ket intappuacda di tao idi tanem ni Eliseo: ket apaman a daydi tao nasagidna dagiti tultulang ni Eliseo, isu nagungar, ket timmacder cadagiti sacsacana.

22Ket ni Hazeel nga ari ti Siria pinarigatna ti Israel iti amin nga aldaw ni Joacaz.

23Ngem ni Jehova naparabur idi cadacuada, ken nangngaasi cadacuada, ket impategna ida, a gapu iti tulagna cada Abraham, Isaac, ken Jacob, ket dina kinayat a dinadael ida, dina pinagtalaw ida iti sangona aginggana ita.

24Ket ni Hazeel nga ari ti Siria natay; ket ni Ben-adad nga anacna nagari iti saadna.

25Ket ni Joas nga annac ni Joacaz innalana manen iti ima ni Ben-adad nga anac ni Hazeel dagiti il-ili nga innalana babaen ti gubat iti ima ni Joacaz nga amana. Namitlo a daras a ni Joas kimmabil kencuana, ket nasbutna dagiti il-ili ti Israel.

← Chapter 12 Jump to: Chapter 14 →