Deuteronomy 15

Ilokano (Ti Biblia (1973))

← Chapter 14 Jump to: Chapter 16 →

1Iti gibus ti tunggal pito a tawen aramidemto ti maysa a pammacawan.

2Ket daytoy ti wagas ti pammacawan: tunggal nacapautang pacawanennanto ti impautangna iti padana a tao; dinanto singsingiren ti padana a tao, ken ti cabsatna; ta ti pammacawan ni Jehova naibal-laag.

3Iti maysa a gangannaet mabalinmo a singiren: ngem ti uray ania a cucuam nga adda ken cabsatmo, ta imam pacawanennanto.

4Isuna laeng nga awanto ti napanglaw iti biangmo (ta ni Jehova bendicionannacanto a pudno iti daga nga ited kenca ni Jehova a Diosmo a tawidem tapno tagicuaem).

5No la ketdi no agawaam nga imdengan ti timec ni Jehova a Diosmo tapno tungpalem a sungputen amin daytoy a bilin nga ibilinco kenca itoy nga aldaw.

6Ta ni Jehova a Diosmo bendicionannacanto, cas incarina kenca: ket sica agpautangcanto cadagiti adu a nasnacion, ngem sica dicanto umutang; ket sica iturayamto dagiti adu a nasnacion, ngem isuda didacanto iturayan.

7No addanto iti biangmo ti maysa a napanglaw a tao, a maysa cadagiti cacabsatmo iti uneg ti uray ania a ruanganmo iti dagam nga inted kenca ni Jehova a Dios, dicanto patangkenen ta pusom, wenno petpetan ta imam iti napanglaw a cabsatmo;

8Ngem ucrademto a di-bumurong ta imam kencuana, ket pautangamto iti umanay a masapulna iti daydiay a pagcuranganna.

9Agannadca tapno awanto ita pusom ti dakes a pannunot, a cunam, Ti maicapito a tawen, ti tawen ti pannacapacawan asidegen; ket ti matam agdakes a maibusor iti napanglaw a cabsatmo, ket awan la ti itedmo kencuana; ket umawag ken Jehova iti maicaniwas kenca, ket iti casta macabasolca.

10Sica mangtedcanto kencuana a di agcurang, ket ta pusom saanto a mapaldaangan no mangtedca kencuana, gapu ta daytoy ti pangbendicionanto ni Jehova a Diosmo kenca iti amin nga aramidmo, ken amin a pangaramatam ita imam.

11Ta ti napanglaw saanto nga agawan iti daga; gapuna nga ibilinco kenca a cunac, Sica ucrademto a di-agcurang ta imam iti cabsatmo, iti macasapul kenca, ken iti napanglawmo iti dagam.

12No ti cabsatmo maysa nga Hebreo a lalaki, wenno Hebrea a babai, mailaconto kenca ket agservi kenca iti innem a tawen; no casta iti maicapito a tawen, wayawayaanto a pumanaw kenca.

13Ket no wayawayaam a pumanaw kenca, dicanto palubosan nga ima-ima:

14Ipaaymonto a sipaparabur kencuana aggapu iti pangenmo, ken iti aggapu iti pagtaltagam, ken ti aggapu iti pagpespesam ti arac; cas ti panangbendicion kenca ni Jehova a Diosmo, casta ti panangtedmonto kencuana.

15Ket sica laglagipemto a maysaca met nga adipen idi iti daga nga Egipto, ket ni Jehova a Diosmo sinubbotnaca; isu ti gapuna nga ibilinco kenca daytoy ita nga aldaw.

16Ket castoy, no cunananto kenca, Diacto pumanaw nga umadayu kenca; ta ayatennaca ken dagiti cabbalaymo, gapu ta naimbag ti casasaadna kenca:

17Iti casta ngarud mangalacanto iti maysa a culocol, ket isu ti pangtebbengmo iti lapayagna iti rikep, ket adipenmonto nga agnanayon. Ket casta met ti aramidemto iti adipenmo a babai.

18Dicanto pagarupen a narigat kenca no palubosam nga agwayawaya a pumanaw kenca; ta iti mamindua a tangdan ti mangmanglo naiservina kenca iti innem a tawen: ket ni Jehova a Diosmo bendicionannacanto iti isu-amin nga aramidem.

19Amin nga inauna a lallaki a mayanac dagiti arbanmo, ken pangenmo santificaremto ken Jehova a Diosmo: dicanto pagtrabajo ti inauna nga anac ti arbanmo, wenno pukisan ti inauna nga anac ti pangenmo.

20Sidaemto dayta iti sango ni Jehova a Diosmo iti tinawentawen iti disso a ni Jehova pilienanto, sica ken dagiti cabbalaymo.

21Ket no adda uray ania a pilawna, a cas ti pilay, wenno bulsec, wenno uray aniaman a pacapilawanna, dicanto idaton ken Jehova a Diosmo.

22Sidaemto iti uneg dagiti ruanganmo: ti di nadalus ken ti nadalus mangandanto nga agpadpada, cas iti gacela, ken iti ugsa.

23Isuna laeng a dicanto canen ti darana; ibucbucmonto a cas danum iti daga.

← Chapter 14 Jump to: Chapter 16 →