Deuteronomy 9

Ilokano (Ti Biblia (1973))

← Chapter 8 Jump to: Chapter 10 →

1Denggem, O Israel: masapul a lumasatca iti a Jordan iti daytoy nga aldaw, tapno sumrecca a mamasia cadagiti nasnacion a daddadackel ken manmannacabalin ngem sica met laeng, il-ili a dadackel ken nasarikedkedan agingga iti langit,

2Maysa nga umili a dackel ken natayag, nga annac dagiti Enaceos, nga ammomon, ken ti maipapan cadacuada nangngegmo a masasao, Asino ti macabael cadagiti annac ni Enac?

3Iti casta ammoem iti daytoy nga aldaw a ni Jehova a Diosmo isu ti agballasiw iti sangoanam cas apuy a mangalun-un; isu ti mangwara cadacuada ken isu ipasagna ida iti sangom: casta ti panangpacsiatmo cadacuada, ken aramidem ida a mapucawda iti madaras, cas ni Jehova sinaona kenca.

4Dica saoen iti pusom no apaman a mapagtalaw ida ni Jehova a Diosmo iti sangoanam, a cunam, Gapu iti kinalintegco ni Jehova inserrecnac nga agtagicua itoy a daga; idinto a gapu iti kinadakes dagitoy a nasnacion pagtalawen ida ni Jehova iti sangom.

5Saan a gapu iti kinalintegmo, wenno gapu iti kinaimbag ta pusom ti sumrecam a mangtagicua iti dadaga; ngem gapu iti kinadakes dagitoy a tattao, ni Jehova a Diosmo pagtalawenna ida iti sangom, ken tapno mapanecnecan ti sao a ni Jehova insapatana cadagiti ammam, a da Abraham, Isaac ken Jacob.

6Ammoen ngarud a ni Jehova a Diosmo itedna kenca daytoy naimbag a daga a tagicuaem, saan a maipuon iti kinalintegmo; ta sica maysaca a natangken ti panaglenglengngesna nga umali.

7Laglagipem, dica lipaten ti pananggargarim ken Jehova a Diosmo, nga agpungtot idiay let-ang: nanipud idi aldaw nga ipapanawmo iti daga nga Egipto, agpapan yaaymo ditoy a disso, nagsalungasingcayo iti maicaniwas ken Jehova.

8Casta met idiay Horeb, ginargariyo a nagpungtot ni Jehova ket ni Jehova nacaunget cadacayo, a dinadaelnacayo.

9Idi simmang-atac idi bantay tapno awatec dagiti taptapi a bato, a taptapi ti tulag, nga inaramid ni Jehova cadacayo, ket nagyanac idi bantay iti uppat a pulo nga aldaw ken uppat a pulo a rabii: diac nangan iti tinapay, wenno imminum iti danum.

10Ket ni Jehova inyawatna caniac dagiti dua a tapi a bato a nasuratan iti ramay ti Dios; ket ti rabawda nasuratan a mayalubog iti nacadagupan dagiti sasao a pannakisao ni Jehova cadacayo idi bantay, nanipud idi tengnga ti apuy idi aldaw ti pannaggigimong.

11Ket naaramid idi iti gibus ti uppat a pulo nga aldaw ken uppat a pulo a rabii a ni Jehova intedna caniac dagiti dua a tapi a bato, a taptapi met laeng ti tulag.

12Ket ni Jehova kinunana caniac, Tumacderca ket sumalogca ditoy nga agdardaras; ta ti ilim nga impanawmo sadi Egipto dimmakesda; iti apagbiit unay naglisianda ti dalan nga imbilinco cadacuada; isuda inyaramidanda ti bagbagida iti sinucog a ladawan.

13Sinao pay ni Jehova caniac a kinunana, Nakitac daytoy nga ili, adtoy, isu ti natangken ti lengngesna nga umili:

14Bay-annac tapno dadaelec ida, ket punasec ti naganda iti babaen ti langit; ket aramidencanto a maysa a nacion a manmannacabalin ken dacdackel ngem isuda.

15Casta ti nagsubliac ken simmalogac idi bantay, ket di bantay sumsumged iti apuy: ket dagiti dua a tapi ti tulag addada idi cadagiti dua nga im-imac.

16Ket naimatangac, nga adtoy, nagbasolcayo iti maicaniwas ken Jehova a Diosyo; dacayo nagaramidcayo iti maysa a sinan-urbon a vaca a sinucog; dacayo naglisianyo daras ti dalan nga imbilin ni Jehova cadacayo.

17Ket iniggamac dagiti dua a tapi a bato ket intupac ida dagiti dua nga im-imac, ket binoongco ida iti sango dagiti matayo.

18Ket nagpaclebac iti sango ni Jehova cas idi immuna, uppat a pulo nga aldaw ken uppat a pulo a rabii; diac nangan iti tinapay wenno imminum iti danum; gapu iti amin a basol a nacabasolanyo idi nga agaramidcayo iti dakes iti imatang ni Jehova, tapno gargarienyo nga agpungtot.

19Ta kinabutengco idi ti unget ken bumarbara a lucsaw a nagpungtotan ni Jehova cadacayo tapno dadaelennacayo, ngem ni Jehova dinenngegnac met laeng idi nga aldaw.

20Ket ni Jehova nacaunget unay ken Aaron tapno pucawenna: ket indawdawatac ni Aaron iti daydi met laeng nga aldaw.

21Ket innalac ti basolyo, ti sinan-urbon a vaca nga inaramidyo, ket impuurco iti apuy ket binaddecco nga iniriid a naimbag, inggana iti cas namayecmec a tapuc: saac intappuac ti tapucna iti waig nga aggapu idi bantay.

22Ket idiay Tabera ken idiay Massa ken idiay Kibroth-haatavah, ginargariyo a nagpungtot ni Jehova.

23Ket idi ni Jehova imbaonnacayo nanipud Cades-barnea, a kinunana, Sumang-atcayo ket tagicuaenyo ti daga nga itedco cadacayo; simmalungasingcayo ketdi iti maicaniwas iti bilin ni Jehova a Diosyo, ket dicay pinati wenno dinengngeg ti timecna.

24Dacayo nagtaengcayo a sisasalungasing iti maicaniwas ken Jehova nanipud iti aldaw a pannacaammoc cadacayo.

25Gapuna a nagpaclebac iti sango ni Jehova iti uppat a pulo nga aldaw ken uppat a pulo a rabii a nagpaclebac gapu ta ni Jehova kinunana a dadaelennacayo coma.

26Ket nagdawatac ken Jehova, ket kinunac, O Apo Jehova, dica dadaelen ti ilim ken ti tawidmo nga inispalmo iti kinadackelmo, nga inaonmo sadi Egipto iti mannacabalin nga ima.

27Laglagipem da adipenmo nga Abraham, Isaac ken Jacob; dica taliawen ti kinasungit daytoy nga umili, wenno ti kinadakesda, wenno ti basolda.

28Di la ket ta ti daga a nangaonam cadacami cunana, Gapu ta ni Jehova dina mabalin nga ipastrec ida iti daga nga incarina cadacuada ken gapu ta ginurana ida, inaonna ida tapno patayenna ida iti tay-ac.

29Isuda met laeng ti ilim ken tawidmo nga inaonmo ida iti dackel a bilegmo ken iti siunnat a tackiagmo.

← Chapter 8 Jump to: Chapter 10 →