Deuteronomy 28 — Ilokano (Ti Biblia (1973))

1Ket maaramidto a no imdengamto a sipapasnec ti timec ni Jehova a Diosmo, tapno tungpalem nga aramiden amin a bilbilinna, isu nga ibilinco kenca itoy nga aldaw, ni Jehova a Diosmo icabilnacanto a naipadpaduma cadagiti isu-amin a nasnacion iti daga:

7Ni Jehova pacabilnanto iti sangom dagiti cabusormo a tumacder iti maicaniwas kenca: isuda rumuardanto iti maymaysa a dalan nga umay bumusor kenca, ket agtaraydanto manipud iti sangom cadagiti pito a daldalan.

8Ni Jehova ibaonnanto ti bendicion kenca cadagiti sarsarusarmo, ken iti amin a pangaramatan iti imam ket bendicionannacanto iti daga a ni Jehova a Diosmo itedna kenca.

9Ni Jehova bangonennacanto a maysa a nasantoan a ili kencuana, cas insapatana kenca; no salimetmetamto dagiti bilbilin ni Jehova a Diosmo, ken magnaca cadagiti daldalanna.

10Ket amin dagiti il-ili ti daga makitadanto a sica maawagancanto iti nagan ni Jehova; ket isuda agbutengdanto kenca.

11Ket ni Jehova aramidennacanto nga aglaplapusanan iti imbag, iti bunga ti bagim, ken iti bunga dagiti an-animalmo, ken iti bunga ti dagam, iti daga a ni Jehova insapatana cadagiti ammam, nga ited kenca.

12Ni Jehova luctannanto kenca ti nasayaat a gamengna a dagiti langlangit, a mangted iti tudo iti dagam no tiempona, ken mangbendicion iti amin a gapuanan ta imam: ket sica agpautangcanto cadagiti adu a nasnacion, ket sica dicanto umut-utang.

13Ket ni Jehova aramidennacanto nga olo, nga saan nga ipus; ket sicanto la ti akinngato, ket saancanto nga akinbaba: no ipangagmonto dagiti bilbilin ni Jehova a Diosmo, nga ibilinco kenca itoy nga aldaw, tapno tungpalem ken aramidem ida,

14Ket dicanto paglisian ti uray ania cadagiti sasao nga ibilinco kenca itoy nga aldaw, iti canawan man wenno iti catigid, tapno sumurotca cadagiti sabali a didios, nga agservica cadacuada.

15Ngem maaramidto a, no dicanto ipangag ti timec ni Jehova a Diosmo, tapno tungpalem ken aramiden amin a bilbilinna, ken al-alagadenna, nga ibilinco kenca itoy nga aldaw, amin dagitoy a lunlunod umaydanto kenca, ket camatendacanto.

16Mailunodcanto iti ili, ken mailunodcanto iti away.

17Mailunodto ti labbam, ken ti paggamayam.

18Mailunodto ti bunga ta bagim, ken ti bunga ti dagam, ti mainayon cadagiti an-animalmo, ket ti ur-urbon ti pangenmo.

19Mailunodcanto no sumrecca, ken mailunodcanto no rumuarca.

20Ni Jehova ibaonnanto kenca ti lunod, ti pannacariribuc, ken babalaw, iti amin a pangaramatam iti imam nga aramiden, inggana iti madadaelca, ken inggana iti mapucawca daras; maipuon iti cadakes dagiti aramidmo a nagtagubayaam caniac.

21Ni Jehova ipacapetnanto kenca ti angol inggana iti maibus naca iti daga a papanam a pagtagicuaan.

22Ni Jehova cabilennacanto iti sarut, ken iti gorigor, ken iti letteg, ken iti pudot a siaapuy, ken iti campilan, ken iti eppes, ken iti buut; ket isuda camatendacanto inggana iti mapucawca.

23Ket ti langitmo nga adda iti ngatoen ti olom suerto, ket ti daga nga adda iti babaem landocto.

24Ni Jehova aramidennanto a tudo ti dagam ti tapuc ken ti tappooy: manipud sadi langit pagbabaandacanto, inggana iti mapucawca.

25Ni Jehova pacabilnacanto iti sango dagiti cabusormo, rumuarcanto iti maymaysa a dalan a bumusor cadacuada, ket pagtalawamto ti pito a daldalan iti sangoda: ket sica ti pagginnaallawatanto dagiti isu-amin a pagpagarian ti daga.

26Ket ti bangcaymo isunto ti taraon ti amin a tumatayab dagiti langlangit, ken dagiti an-animal a narungsot ti daga; ket awanto ti mangbugtac cadacuada.

27Ni Jehova cabilennacanto iti busali ti Egipto, ken cadagiti letletteg, ken iti gudgud, ken iti gaddil, a saancanto a maagasan.

28Ni Jehova cabilennacanto iti kinamauyong, ken iti kinabulsec, ken iti kinamanagkikigtot ti puso;

29Ket sica agcarcarawacanto iti agmatoon, cas panagcarcarawa ti bulsec iti casipngetan, ket dicanto rumang-ay cadagiti daldalanmo: ket maparparigatancanto laeng ken matactacawan nga agnanayon ket awanto ti mangispal kenca.

30Makitulagcanto iti maysa a babai nga asawaen, ket sabali a lalaki ti makicaiddanto kencuana: mamangoncanto iti maysa a balay, ket dicanto pagnaedan daydiay: mulaamto ti cauvasan, ket dicanto lac-amen ti bungana.

31Ti vacam mapapatayto iti imatang dagiti matam, ket dicanto agsida iti dayta: ti asnom marabsutto iti sango ta rupam, ket dinto maisubli kenca: dagiti carcarnerom maiteddanto cadagiti cabusormo, ket awanto ti mangispal kenca.

32Dagiti annacmo a lallaki ken dagiti annacmo a babai maiteddanto iti sabali nga ili; ket dagiti matam cumitkitadanto, ket cumudrepdanto iti iliw cadacuada nga agmalmalem: ket awanto ti aniaman a bileg ta imam.

33Ti bunga ti dagam, amin a nagbannogam, maysanto a nacion a dica am-ammo ti mangan; ket sica la ti maparparigatanto ken madaddadael nga agnanayon:

34Iti casta nga agam-amangawcanto a mapuon iti mabuya dagiti matam a makitamto.

35Ni Jehova cabilennacanto cadagiti tumtumeng, ken iti sacsaca iti naut-ut a busali, a saan a maagasan, manipud iti dapan ta sacam inggana iti toctoc ta olom.

36Ni Jehova yegnacanto, ken ti arim nga icabilmonto a mangituray kenca, iti maysa a nacion a dica am-ammo idi, sica wenno dagiti ammam; ket idiay agservicanto cadagiti sabsabali a didios, a cayo ken bato.

37Ket sica agbalincanto a maysa a pagsidsidaawan, maysa a proverbio, ken barengbareng a balicas, cadagiti amin nga il-ili a pangiturongan kenca ni Jehova.

38Mangipancanto iti adu a bukel iti talon, ket bassitto ti maocconmo; ta ti dodon ibusennanto.

39Sica mulaamto dagiti ca-uvasam, ken tartaripatoemto ida, ngem dicanto macainum iti arac, wenno macaburas iti uvas; ta ti igges canennanto ida.

40Addanto caycayom nga oliva iti dagup amin ti beddengmo, ngem dicanto macapagsapsapo iti lana; ta ti olivam regregennanto ti bungana.

41Agputotcanto iti anac a lallaki ken annac a babai, ngem dicanto cucua ida; ta mapandanto iti pacacayawan.

42Amin a caycayom ken ti bunga ti dagam tagicuaento ti dodon.

43Ti gangannaet nga adda iti tengngam dumap-awto iti ngatoem, a ngumato la a ngumato; ket sica agpababacanto a bumaba la a bumaba.

44Isu pautangannacanto, ket sica dicanto macapautang kencuana: isunto ti olo, ket sicanto ti ipus.

45Ket amin dagitoy a lunlunod umaydanto kenca, ket camatendacanto, ket macamacamdacanto, inggana iti madadaelca; gapu ta dica impangpangag ti timec ni Jehova a Diosmo tapno salimetmetam coma dagiti bilbilinna ken dagiti al-alagaden nga imbilinna kenca.

46Ket dagita maipaaydanto kenca a pagtandaanan ken pagsiddaawan, ken iti putotmo iti agnanayon.

47Gapu ta dica nagservian ni Jehova a Diosmo iti ragsac ken iti ayat ti puso, a maipuon iti kinawadwad ti amin nga adda:

48Isu ti gapuna a paadipencanto cadagiti cabusormo a ni Jehova ibaonnanto iti maicaniwas kenca, a sibibisin, ken siwawaw, ken silalamolamo ken awanan iti uray ania: ket isu icabilnanto ti sangol a landoc ita tengngedmo, inggana iti madadelnaca.

49Ni Jehova yegnanto a bumusor kenca ti maysa a nacion nga adda iti adayo, manipud iti pungto ti daga, a cas panagtayab ti aguila; maysa a nacion a dicanto maawat ti pagsasaona;

50Maysa a nacion a narungsot ti langana, a dinanto padayawan ti kinatao ti lacay, wenno iparang ti caasi iti agtutubo,

51Ket canennanto ti bunga dagiti an-animalmo, ken ti bunga ti dagam inggana iti madadaelca isu a dinacanto met itiddaan ti bagas, baro nga arac, wenno lana, ti mainayon cadagiti an-animalmo, wenno ti ur-urbon ti pangenmo, inggana iti mapucawdaca.

52Ket lacubennacanto iti isu-amin a ruruanganmo, agingga iti marpuog dagiti nangato ken nasarikedkedan a bacbacudmo a pagtalcam iti isu-amin a dagam; ket isuda lacubendacanto cadagiti amin a ruruanganmo ti uray sadino iti amin a dagam a ni Jehova a Diosmo intedna kenca.

53Ket sica mangancanto iti bunga dayta bagim met laeng, a lasag dagiti annacmo a lallaki ken dagiti annacmo a babbai a ni Jehova a Diosmo intedna kenca, bayat ti pananglacub, ken natuocan a pammarparigat kenca dagiti cabusormo.

54Ti lalaki a naganus cadacayo, ken nalami unay, ti matana dakesto iti cabsatna a lalaki, ken iti asawa ti barucongna, ken iti natda cadagiti annacna a nabati kencuana;

55Iti casta dinanto iccan ti asinoman cadacuada iti lasag dagiti annacna a sidaennanto, gapu ta awan ti natda kencuana bayat ti pananglacub, ken natuocanto a pammarigat kenca ti cabusormo iti isu-amin a ruruanganmo.

56Ti naganus ken nalami a babai cadacayo, a dina coma maitured nga idisso ti dapan ti sacana iti daga a gapu iti kinalami ken kinaganus, ti matana dakesto iti asawa ti barucongna, ken iti anacna a lalaki, ken iti anacna a babai,

57Ken iti tagibina a naggapu iti baet dagiti sacsacana, ken dagiti annacna a pinasngayna; gapu ta sidaennanto ida iti nalimed maipuon iti caawan ti amin nga adda, bayat ti pananglacub ken ti natuocanto a pammarigat kenca ti cabusormo, cadagiti ruruanganmo.

58No dicanto tungpalen nga aramiden amin dagiti sasao daytoy a linteg a naisurat itoy a libro, tapno agbutengca itoy nagloriaan ken pagbutngan a nagan, a JEHOVA A DIOSMO;

59Ni Jehova aramidennanto ngarud a pagsidsiddaawan dagiti didigram, ken dagiti didigra ti putotmo, didigra dagita a dackel ken mabayag unay, ken naut-ut a sacsakit, ken ti mabayag unay.

60Ket yegnanto kenca manen amin a sacsakit ti Egipto isu a nagbutbutngam idi: ket dagita cumpetdanto kenca.

61Casta met a tunggal sakit, ken tunggal didigra, a di naisurat iti libro daytoy a linteg, ni Jehova yegnanto ida kenca inggana iti madadaelca.

62Ket mabaticayto a bassit iti bilang, idinto a cascayo idi cadagiti bitbitwen sadi langit iti caadu; gapu ta dica impangag ti timec ni Jehova a Diosmo.

63Ket maaramidto a, cas ti panagragsac ni Jehova iti panangpaimbagna kenca, ken panangpaaduna kenca, casta ti panagragsacto ni Jehova iti panangdadaelna kenca, ken iti panangpucawna kenca; ket dacayo maparotcayto iti daga a sercam a pagtagicuaan.

64Ket ni Jehova iwarasnacanto cadagiti amin nga il-ili manipud maysa a pungto ti daga agingga iti sabali a pungto ti daga; ket idiay ti pagserviamto cadagiti sabali a didios a dica am-ammo idi, sica wenno dagiti ammam, didios a cayo ken bato.

65Ket iti baet dagitoy a nacion dicanto macatumpung iti nam ay, ket idiay awanto ti paginanaan ti dapan dayta sacam: ngem ni Jehova itednanto kenca idiay ti napicapic a puso, ken cullaap dagiti matmata, ken panagsicor ti cararua;

66Ket ti panagbiagmo pagduaduaanto iti masacbayan; ket sica agbutbutengcanto iti rabii ken aldaw, ket awanancanto iti talged ta biagmo.

67Iti bigat cunamto, Rumabii coman! ket iti rabii cunamto, Bumigat coman! gapu iti buteng ti pusom, isu a pagkigkigtotamto, ken gapu iti mabuya dagita matam a makitamto.

68Ket ni Jehova isublinacanto sadi Egipto nga aglugan iti sasacayan, iti dalan a kinunac kenca, Dicanto masublian a kitaenen: ket idiay ilacoyonto ta bagiyo a pabag-en a lallaki ken babbai cadagiti cabusoryo, ket awanto ti tao a gumatang cadacayo.