Deuteronomy 33

Ilokano (Ti Biblia (1973))

← Chapter 32 Jump to: Chapter 34 →

1Ket daytoy isu ti bendicion a pinamendicion ni Moises a tao ti Dios cadagiti annac ti Israel idi di pay natay.

2Ket kinunana, ni Jehova naggapu iti Sinai, ket dimmanon cadacuada nanipud Seir; siraraniag nanipud bantay Paran, ket naggapu cadagiti linaclacsa a sasanto: iti imana a canawan maysa a dumardarang a linteg nga agservi cadacuada.

3Wen, ayatenna ti umili; amin a sasantona addada ita imam: ket nagtugawda cadagita sacsacam: tunggal maysa awatennanto ti aggapu cadagiti sasaom.

4Ni Moises imbilinna cadatayo ti maysa a linteg, maysa a tawid nga agpaay iti gimong ni Jacob.

5Ket isu idi ti ari idiay Jesurun, idi dagiti olo-oloen ti umili naguummongda, amin a capcaputotan ti Israel nagtitiponda.

6Agbiag coma ni Ruben, ket di coma matay; wenno dagiti tattaona saanda coma a bassit.

7Ket daytoy ti pannacabendicion ni Juda: ket kinunana, denggem, Jehova, ti timec ni Juda, ket ipanmo iti yan dagiti tattaona: cadagiti im-imana nakicabil a biangna laeng; ket sicanto ti maysa a badang a maibusor cadagiti casupadina.

8Ket ti maipapan ken Levi, isu kinunana, ti Tumimmo ken Urimmo addada iti nasantoan a taom, isu a sinuutmo idiay Massa, isu a kinasusicmo idiay dandanum ti Meriba;

9A kinunana maipapan iti amana ken inana, Saanco a nakita; dina impanecnec dagiti cacabsatna, ket dina met naam-ammo dagiti annacna met laeng: ta ti saom tinungpalda, ket ti tulagmo salimetmetanda.

10Isurodanto ken Jacob dagiti bilbilinmo, ken iti Israel ti lintegmo: icabildanto ti incienso iti saclangmo, ken sibubukel a daton a mapuuran iti rabaw ti altarmo.

11Bendicionam, Jehova, ti cucuana, ket awatem ti gapuanan dagiti im-imana: salputem dagiti lomlomo dagiti tumacder a bumusor kencuana, ken daydiay a gumura kencuana, tapno ti umingar dida mapidua.

12Ti maipapan ken Benjamin, kinunana, ti ay-ayaten ni Jehova agnaedto a sitatalged iti abayna; salucubanna nga agmalmalem, ket isu agyan iti baet dagiti ab-abagana.

13Ket iti maipapan ken Jose kinunana, bendito ken Jehova coma ti dagana, gapu cadagiti napateg a parabur ti langit, gapu iti linnaaw, ken gapu iti nauneg a naisaad iti baba,

14Ken gapu cadagiti napateg a parabur dagiti bungbunga ti init, ken gapu cadagiti napateg a banbanag ti panagdackel dagiti bulbulan,

15Ken gapu cadagiti nangrona a banbanag dagiti banbantay a cadaanan, ken gapu cadagiti napateg a banbanag dagiti turturud nga agnanayon,

16Ken gapu cadagiti napateg a banbanag ti daga ken ti kinalabonna, ken ti naimbag a nakem ti nagnaed iti kinarangpaya: Ti bendicion umay coma iti olo ni Jose, ken iti tuctuc ti olo ti naisina cadagiti cacabsatna.

17Ti umuna nga anac ti arbanna, kinadayag isu ti cucuana; ket dagiti sarsarana isuda dagiti sarsara ti atap a vaca: isuda ti pangdarondonna cadagiti il-ili, isuda amin, uray agingga iti pungpungto ti daga: ket isuda ti linaclacsa ni Efraim, ket isuda ti rinibribu ni Manases.

18Ket iti maipapan ken Zabulon kinunana, agragsacca, Zabulon, iti panagruarmo; ken ni Issachar, cadagiti toltoldam.

19Ayabandanto dagiti tattao a dumanon iti bantay; idatondanto dagiti datdaton ti kinalinteg sadiay: Ta susupendanto ti kinalabon dagiti tataaw, ken dagiti nalmeng a gamgameng ti cadaratan.

20Ket iti maipapan ken Gad kinunana, Bendito coma ti mamadackel ken Gad: agnaed cas leon a babai, ket caramutanna ti tackiag, wen, ti tuctuc ti olo.

21Ket insaganana iti bagina ti umuna nga apag, ta ti bagi ti mangmangted iti linteg naidulin idi; ket immay agraman dagiti olo-oloen ti umili; isu ti nangipatungpal ti kinalinteg ni Jehova, ken dagiti linlinteg iti Israel.

22Ket ti maipapan ken Dan kinunana, ni Dan maysa nga urbon ti leon, a lumagto manipud Basan.

23Ket ken Neftali kinunana, O Neftali, napnec iti parabur, ken napno iti bendicion ni Jehova, tagicuaem ti laud ken abagatan.

24Ket ken Aser kinunana, bendito coma ni Aser iti panagputot: macaay-ayo coma cadagiti cacabsatna, ket itanebna coma ti sacana iti lana.

25Dagiti balbalunetmo landoc ken suerdanto; ket cas cadagiti al-aldawmo, ti pigsam castanto.

26Awan ti siasinoman a pumada iti Dios, O Jesurun, a sacayanna ti langlangit a maipaay a cabadangmo, ken iti kinadaegna, cadagiti langlangit.

27Ti agnanayon a Dios isu ti disso a naedmo, ken iti baba adda dagiti tactackiag nga agnanayon: ket pinapanawna ti cabusor iti sangom, ket kinunana, Dadaelem.

28Ket ti Israel agnaed a sitatalged, ti ubbog ni Jacob agwaywayas, iti maysa a daga a cabungbungaan ken caaracan iti baro; wen, dagiti langlangitna yitnagda ti linnaaw.

29Nagasatca, O Israel; asino ti pumadpad kenca, a maysa nga umili nga insalacan ni Jehova, a calasag ti badangmo, ken campilan ti kinadaegmo! Ket dagiti cabusormo, isuda met laeng tumulocdanto kenca; ket sica payatemto dagiti nangato a luglugarda.

← Chapter 32 Jump to: Chapter 34 →