Deuteronomy 5

Ilokano (Ti Biblia (1973))

← Chapter 4 Jump to: Chapter 6 →

1Ket ni Moises inayabanna amin nga Israel, ket kinunana cadacuada, Denggenyo, O Israel, dagiti al-alagaden ken bilbilin a saoec ita nga aldaw cadagita lapayagyo, tapno adalenyo ida, ket tungpalenyo nga aramiden ida.

2Ni Jehova a Diostayo inaramidna ti maysa a tulag cadatayo idiay Horeb.

3Ni Jehova saanna nga inaramid daytoy a tulag cadagidi ammatayo, no di ket cadatayo, cadatayo met laeng nga addatayo amin ditoy a sibibiag ita nga aldaw.

4Ni Jehova nakisao cadacayo iti sangonsango iti bantay manipud idi tengnga ti apuy.

5(Addaac idi iti baet ni Jehova ken dacayo iti daydi nga aldaw, tapno ibatadco cadacayo ti sao ni Jehova: ta agbutengcayo met idi gapu idi apuy, ket dicay simmang-at idi bantay:) a kinunana,

6Siac ni Jehova a Diosmo, a nangaon kenca iti daga nga Egipto, iti balay ti nacaadipnan.

7Awan ti sabali a didiosmo ti sangoc.

8Dica mangaramid iti maipaay kenca a ladawan a kinitikitan, uray ania a catulad ti adda idiay ngato sadi langit, wenno iti baba ditoy daga, wenno ti adda iti danum iti uneg ti daga:

9Dica irucnoy ti bagim cadacuada, uray pagservian ida; ta siac ni Jehova a Diosmo manangimonac a Dios, a mangipasarungcar iti kinadakes dagiti amma cadagiti annac, cadagiti maicatlo ken maicapat a caputotan dagiti gumura caniac;

10Ken mangipaay iti imbag a naayat cadagiti rinibribu nga agayat caniac, ken mangsalimetmet cadagiti bilbilinco.

11Dica aramaten nga ipabpabareng ti nagan ni Jehova a Diosmo; ta ni Jehova saannanto a di pabasolen ti mangaramat iti naganna iti barengbareng.

12Laglagipem ti aldaw a panaginana, tapno salimetmetam a nasantoan, cas ni Jehova a Diosmo imbilinna kenca.

13Innem nga aldaw agtrabajoca, ket aramidem amin nga aramidmo;

14Ngem ti maicapito nga aldaw isu ti maysa a panaginana ken Jehova a Diosmo: iti dayta nga aldaw, dica agtrabajo iti uray ania, sica, wenno ti anacmo a lalaki, wenno ti anacmo a babai, wenno ti adipenmo a lalaki wenno ti adipenmo a babai, wenno ti vacam, wenno asnom, wenno uray ania nga animalmo, wenno ti gangannaetmo nga adda iti uneg dagiti ruruanganmo; tapno dagiti adipenmo a lalaki, ken adipenmo a babai aginanada a cas met kenca.

15Ket laglagipemto a maysaca met idi nga adipen iti daga nga Egipto, ket ni Jehova a Diosmo inaonnaca sadiay iti ima a mannacabalin ken tackiag a sitatag-ay: gapuna a ni Jehova a Diosmo imbilinna kenca a salimetmetam ti aldaw a panaginana.

16Dayawem ni amam ken ni inam, cas ni Jehova a Diosmo imbilinna kenca; tapno manayon dagiti aldawmo, ken tapno agbalincanto a naimbag iti daga nga ited kenca ni Jehova a Diosmo.

17Dica mamapatay.

18Dica met makiabig iti dica asawa.

19Dica met agtacaw.

20Dica met agsacsi iti ulbod a maibusor iti padam a tao.

21Dica met aguman ti asawa ti padam a tao; dica met aguman ti balay ti padam a tao, ti talonna, wenno ti adipenna a lalaki, wenno adipenna a babai, ti vacana, wenno ti asnona, wenno ti uray ania a cucua ti padam a tao.

22Dagitoy dagiti sasao a ni Jehova binalicasna iti natbag a timec iti dagup ti gimong idiay bantay nanipud iti tengnga ti apuy, ti ulep, ken ti napuscol a sipnget: ket awanen ti innayonna. Ket insuratna ida iti rabaw ti dua a taptapi a bato, sana inted idi caniac.

23Ket naaramid, idi a nangngegyo ti timec nanipud iti tengnga ti sipnget, idi a sumsumged di bantay iti apuy, immasidegcayo caniac, uray amin dagiti pangpangolo ti capcaputotanyo, ken lallacayyo;

24Ket dacayo kinunayo, Adtoy, ni Jehova a Diosmi imparangarangna cadacami ti dayagna ken ti kinadackelna, ket nangngegmi ti timecna nanipud iti tengnga ti apuy: nakitami itoy nga aldaw a ti Dios makisao iti tao. Ket isu agbiag.

25Ita ngarud, apayapay a mataycamto? Ta daytoy dackel nga apuy ibusennacamto: no mangegmi pay manen ti timec ni Jehova, mataycamto ngarud.

26Ta asino ti adda iti isu-amin a lasag a nacangeg iti timec ti sibibiag a Dios a nagsao nanipud ti tengnga ti apuy cas cadacami, ket nagbiag,

27Umadanica ket denggem amin a saoen ni Jehova a Diostayo: ket ibagam cadacami dagup ti saoento kenca ni Jehova a Diostayo; ket denggenminto, ket aramidenminto.

28Ket ni Jehova nangngegna ti timec dagiti sasaoyo, idi nga casasaodac; ket ni Jehova kinunana caniac, Nangngegco ti timec dagiti sasao daytoy nga ili, isuda a nakisao kenca: isuda nasayaat ti panagcunada iti dagup ti sinaoda.

29O anian coma no adda cadacuada dayta a puso, tapno agbutengda coma caniac, ken salimetmetanda dagiti amin a bilbilinco iti agnanayon, tapno agbalinda a naimbag ken cadagiti annacda iti agnanayon!

30Inca, cunam cadacuada, Agsublicayo cadagiti toltoldayo.

31Ngem no sica, agyanca ditoy caniac, ket saoecto kenca ti dagup dagiti linlinteg, ken al-alagaden, ken bilbilin, nga isuromto cadacuada, tapno aramidendanto ida iti daga nga itedco cadacuada a tagicuaen.

32Dacayo tungpalenyonto nga aramiden ngarud ti cas imbilin cadacayo ni Jehova a Diosyo, dicayto sumiasi uray iti macanawan wenno iti macatigid.

33Magnacayto laeng iti amin a dana nga ni Jehova a Diosyo imbilinna cadacayo tapno agbiagcayo ken agbalincayo a naimbag ken tapno manayon dagiti al-aldawyo iti daga a tagicuaenyonto.

← Chapter 4 Jump to: Chapter 6 →