Deuteronomy 7

Ilokano (Ti Biblia (1973))

← Chapter 6 Jump to: Chapter 8 →

1No yegnacanto ni Jehova a Diosmo iti daga papanam a tagicuaem, ket pagtalawennanto dagiti adu nga umili iti saclangmo, ti Jeteo, ken ti Gergeseo, ken ti Amorreo, ken ti Cananeo, ken ti Perezeo, ken ti Heveo, ken ti Jebuseo, pito nga il-ili a daddadackel ken manmannacabalin ngem sica;

2Ket no ni Jehova a Diosmo yawatnanto ida iti sangoanam, ket sica abakemto ida; iti casta talipupusemto a pucawen ida: dicanto makinomo cadacuada, wenno ipakita ti caasi cadacuada:

3Dicanto makiinnasawa cadacuada; dicanto ited ti anacmo a babai iti anacna a lalaki, wenno ti anacna a babai dicanto alaen nga yasawa iti anacmo a lalaki.

4Ta pagbawingennanto ta anacmo iti isusurot caniac, tapno agservida iti sabali a didios: iti casta ti pungtot ni Jehova sumgedto cadacayo, ket dagusennacayo a dadaelento.

5Ngem castoy ti aramidenyonto cadacuada: rebbaenyonto dagiti al-altarda, rugpoenyonto a burburaken dagiti monmonda, ken putputden dagiti Asherimda, ken puuranyonto iti apuy dagiti ladladawanda a kinitikitan.

6Ta sica ti umili a nasantoan ken Jehova a Diosmo: ni Jehova a Diosmo pinilinaca nga ili tapno tagicuaennaca nga ipangpangrona ngem ti dagup amin nga il-ili nga addada iti rabaw ti daga.

7Ni Jehova saanna nga impaay ti ayatna kenca, wenno pinilinaca, gapu ta ad-aducayo iti bilang ngem ti sabali nga ili; ta dacayo ti cababassitan idi cadagiti amin nga il-ili:

8Ngem gapu ta ni Jehova ay-ayatennacayo ken gapu ta salimetmetanna ti cari nga insapatana cadagiti ammayo, iti ima a mannacabalin ti pinangaon ni Jehova cadacayo, ken pinangsubbotna cadacayo nanipud iti balay ti nacaadipnan iti ima ni Faraon nga ari ti Egipto.

9Iti casta ammoem a ni Jehova a Diosmo, isu ti Dios; ti pagcammatalcan a Dios, a salimetmetanna ti tulag ken panangngaasi cadagiti agayat kencuana, ken agtungpal cadagiti tulagna, agpapan rinibribu a capcaputotan,

10Ken mangibales iti sangoda cadagiti gumura kencuana, tapno rebbaenna ida: isu saanto nga agliway iti gumura kencuana, balsennanto iti sangona.

11Iti casta salimetmetamto ti bilin, ken dagiti al-alagaden ken linlinteg nga ibilinco kenca itoy nga aldaw, tapno tungpalem ida.

12Ket maaramidto, a gapu iti panangimdengyo cadagitoy a linlinteg, ket tungpalenyonto nga aramiden ida, salimetmetanto ni Jehova a Diosmo ti tulag ken naimbag a panagdongngo, nga insapatana cadagiti ammam:

13Ket isu ayatennacanto, ket bendicionannacanto, ken pagaduennacanto; casta met a bendicionannanto ti bunga ta bagim ken bunga ti dagam, ti bin-im, ken ti baro nga aracmo, ken ti lanam, ti nainayon cadagiti an-animalmo ken ti urbon ti pangenmo sadiay daga nga insapatana cadagiti ammam nga ited kenca.

14Sica mabendicionancanto a maipangpangrona ngem dagiti amin nga il-ili: awanto ti lupes cadacayo, wenno cadagiti an-animalyo, lalaki man wenno babai.

15Ket ni Jehova iccatennanto kenca amin a sacsakit; ket awanto ti uray ania man a dakes a sakit ti Egipto, nga ammomon nga icabilnanto kenca, ngem icabilnanto ida cadagiti amin a gumura kenca.

16Ket ibusemto amin a tattao a yawat kenca ni Jehova a Diosmo; ti matam dinanto caasian ida: dicanto met agservi cadagiti didiosda; ta daytanto ti maysa a pacadadaelam.

17No cunamto ita pusom, Dagitoy a nasnacion ad-aduda ngem siac; Casano ti pannacabalinco a mamacsiat cadacuada?

18Dicanto agbuteng cadacuada: laglagipemto a nalaing ti inaramid ni Jehova a Diosmo ken Faraon, ken isu-amin nga Egipto;

19Dagiti dadackel a susuut a nakita dagita matam, ken dagiti pagilaslasinan, ken dagiti pagsidsiddaawan, ken ti mannacabalin nga ima, ken ti siunnat a tackiag a pinangaon kenca ni Jehova a Diosmo: ni Jehova a Diosmo casta ti aramidennanto cadagiti amin nga il-ili a cabutengmo.

20Maysa pay, ni Jehova a Diosmo ibaonnanto ti alimboboyog iti tengngada, inggana a dagiti natda ken naglemmeng cadacuada matayda iti sangom.

21Dicanto agamac cadacuada; ta ni Jehova a Diosmo adda iti tengngam, dackel a Dios, ken nacabutbuteng.

22Ket ni Jehova a Diosmo pagtalawennanto nga in-inuten dagidiay a tattao iti sangom: di maipalubos nga ibusem ida a maminpinsan, di la ket ta dagiti an-animal iti away umaduda a maibusor kenca.

23Ngem ni Jehova a Diosmo yawatnanto ida iti sangom, ket riribukennanto ida iti dackel a macariri, inggana iti dida madadael.

24Ket yawatnanto dagiti ar-arida ita imam, ket pucawemto ti naganda iti babaen ti langit: awanto ti lalaki a macabalin a tumacder iti sangom, inggana iti dica mapucaw ida.

25Ti kinitikitan a ladladawan dagiti didiosda puuranyonto ida iti apuy: dicanto aguman ti pirac wenno balitoc, a calupcupda, dicanto met alaen ida a maipaay kenca, di la ket ta masiloanca cadagita: ta dayta ti macarimon ken Jehova a Diosmo.

26Ket dicanto iserrec iti balaymo ti macarimon, ken dicanto agbalin a nailunud cas iti dayta: italipupusmonto nga iwagsac dayta ken talipupusem a cagura dayta, ta dayta nailunud.

← Chapter 6 Jump to: Chapter 8 →