Deuteronomy 21

Ilokano (Ti Biblia (1973))

← Chapter 20 Jump to: Chapter 22 →

1No masaracan ti maysa a napatay ti daga nga ited kenca ni Jehova a Diosmo, a tagicuaen, a naiwalang iti daga, ket di am-ammo ti nangcabil kencuana;

2Dagiti ngarud lallacayyo ken dagiti oc-ocomyo rumuardanto, ket rucodendanto agingga cadagiti il-ili a nailawlaw kencuana dayta a natay:

3Ket maaramidto a ti ili a caasitgan iti natay a tao, dagiti met lallacay ti daydiay nga ili mangaladanto iti maysa a vaca a di pay pinagbannog, ken di pay nasangolan a nagguyod;

4Ket dagiti lallacay iti dayta nga ili isalogdanto dayta a vaca iti maysa a lobong nga adda danumna nga agay-ayus, a di naarado wenno di namulaan, ket bungtolendanto ti lengnges ti vaca sadiay a lobong.

5Ket dagiti papadi nga annac a lallaki ni Levi umaydanto umasideg; ta isuda ti pinili ni Jehova a Diosmo nga agannong kencuana, ken mamendicion iti nagan ni Jehova; ket iti mayannurot iti saoda isu ti maikeddengto iti amin a susic ken iti amin a panangcabil.

6Ket amin a lallacay iti dayta nga ili, nga isuda ti caasitgan iti natay a tao, buggoandanto dagiti im-imada iti rabaw ti vaca a binungtolda ti lengngesna idiay a lobong;

7Ket isuda sumungbatdanto ket cunada, Dagiti im-imami saanda nga imbuyat daytoy a dara castamet a saan a nakita dagiti matami.

8Pacawanem, O Jehova, ti ilim nga Israel a sinubbotmo, ket dica ipalubos nga agbati iti tengnga ti ilim nga Israel ti dara nga awan basolna. Ket ti dara mapacawanto cadacuada.

9Iti casta iccatemto ti dara nga awan basolna iti tengngam no aramidemto ti nalinteg cadagiti mata ni Jehova.

10No inca makigubat cadagiti cabusormo, ket ni Jehova a Diosmo yawatna ida cadagita im-imam ket alaem ida a nacayawan,

11Ket makitam cadagiti nacayawan ti maysa a napintas a babai, ket adda panagrayom kencuana, ket alaem coma nga asawaen;

12Alaemto iti balaymo ngarud; ket isu kiskisannanto ti olona, ket agicucunto;

13Ket ucsobennanto ti cawes ti pannacacayawna ket mabatinto iti balaymo, ket sangitannanto ni amana ken inana iti apagtutop a macabulan: ket iti calpasanna dumennacanto kencuana, ket sicanto ti asawana, ket isunto ti asawam.

14Ket maaramidto, a no awan ti pacaay-ayoam kencuana, palubosamto ngarud a mapan iti cayatna; ngem dicanto ilaclaco a pabayadan iti pirac nga uray ania a panggep, dicanto aramiden a cas maysa a bag-en, gapu ta pinaldaangmo.

15No ti maysa a lalaki adda dua nga assawana, ti maysa dungdungngoenna, ket ti maicadua gurguraenna, ket mangipasngayda kencuana cadagiti annac, madungdungngo man ken magurgura; ket no ti inauna a nayanac a lalaki isu ti anac ni magurgura;

16Maaramidto ngarud nga iti aldaw a panagpatawidna cadagiti annacna a lallaki iti cucuana, dina pagin-inaunaen ti anac ni madungdungngo, ngem iti anac ni magurgura, nga isu ti inauna nga anac:

17Ngem ammoennanto nga inauna nga anac, ti anac ni magurgura, iti panangitedna kencuana ti mamindua a bingay cadagiti amin nga adda kencuana; ta isu ti damo ti pigsana; calintegan ti kina-inauna nga anac a lalaki cucuana.

18No ti maysa a lalaki adda anacna a lalaki a nasungit ken nasalungasing, a dina cayat ti agtungpal iti timec ni amana wenno iti timec ni inana, ket nupay dusaenda dinanto la ipangag ida:

19Iti casta ni amana ken ni inana tengngelendanto, ket ipandanto cadagiti lallacay ti ili, ken iti ruangan ti dissona;

20Ket cunadanto cadagiti lallacay ti ciudadna, Daytoy anacmi a lalaki nasungit ken nasalungasing, dina cayat ti agtungpal iti timecmi; isu nabuclis ken managbarbartec.

21Amin dagiti lallaki ti ilina uburendanto tapno matay cadagiti batbato: casta ti panangiccatto iti dakes iti tengngayo; ket amin nga Israel dumngegto ket agbutengto.

22Ket no ti maysa a lalaki nacaaramid iti maysa a basol a maicari iti patay, ket maipanto ken patay, ket bitayem iti maysa a cayo;

23Ti bagina dinto mabati, nga agpatpatnag iti cayo, ngem itabonmonto a di-agcurang iti daydiay met laeng nga aldaw; ta daydiay a nabitay isu ti inlunod ti Dios; tapno dica mulitan ti dagam a ni Jehova a Diosmo intedna kenca a tawiden.

← Chapter 20 Jump to: Chapter 22 →