Deuteronomy 4 — Ilokano (Ti Biblia (1973))

1Ket ita, O Israel, imdengam dagiti al-alagaden ken linlinteg nga isursuroc kenca, tapno aramidem ida; tapno agbiagca, ket macastrecca ken mangtagicua iti daga a ni Jehova a Dios dagiti ammayo itedna cadacayo.

2Dicayto sursurocan ti sao nga ibilinco cadacayo, wenno dicayto met kessayan, tapno mabalinyo a salimetmetan dagiti bilbilin ni Jehova a Diosyo, nga igunamgunamco cadacayo.

3Dagiti matayo nakitada ti inaramid ni Jehova gapu ken Baalpeor, ta amin dagiti tattao a simmurot ken Baal-peor, ni Jehova a Diosmo dinadaelna ida iti tengngam.

4Ngem dacayo a kimmanunong ken Jehova a Diosyo, sibibiagcayo, tunggal maysa cadacayo ita nga aldaw.

5Adtoy, siac insuroc cadacayo dagiti al-alagaden ken linlinteg cas ni Jehova a Diosco imbilinna caniac, tapno aramidenyo coma ti casta iti tengnga ti daga a serkanyo a tagicuaen.

6Salimetmetanyo ngarud ket sungputenyo ida; ta daytoy isu ti siribyo ken sarirityo iti imatang dagiti il-ili, a macangngeg cadagiti al-alagaden, ket cunada, Pudno unay a daytoy dackel a nacion masirib ken mannacagaw-at nga ili.

7Ania a nacion a dackel nga adda diosna nga asideg unay cadacuada, cas ken Jehova a Diostayo a siadda uray caanoman a panangawagtayo kencuana?

8Ket ania a dackel a nacion ti addaan cadagiti al-alagaden ken linlinteg a ti kinalintegda cas iti amin cadagitoy a linteg nga icabilco iti sangoyo itoy nga aldaw?

9Isuna laeng nga annadam ti bagim, ket aluadam a sireregta ta cararuam, di la ket ta malipatam dagitoy a banbanag a nakita dagiti matam, ken di la ket ta pumanawda ita pusom cadagiti amin nga al-aldaw ti panagbiagmo; ngem ipaammom ida cadagiti annacmo ken cadagiti annac ti annacmo;

10Idi aldaw nga caaddayo iti sango ni Jehova a Diosmo idiay Horeb, idi ni Jehova kinunana caniac, Gimongem caniac ti ili, ta ipangngegco cadacuada dagiti sasaoc, tapno masursuroda ti agbuteng caniac iti amin nga al-aldaw ti panagbiagda iti rabaw ti daga, ken tapno maisuroda dagiti annacda.

11Ket immadanicayo ken nagtacdercayo iti arisadsad ti bantay; ket di bantay sumsumged idi iti apuy inggana iti tengnga ti langit a sisisipnget, siulep ken napuscolan a sipnget.

12Ket ni Jehova nakisao cadacayo nanipud ti tengnga ti apuy: nangegyo ti timec dagiti balbalicas ngem awan nakitayo a langa; isuna laeng a nangngegyo ti maysa a timec.

13Ket impalawagna cadacayo ti tulagna nga imbilinna cadacayo nga aramiden, a dagiti met laeng sangapulo a bilbilinna; ket insuratna ida iti rabaw ti dua a taptapi a bato.

14Ket ni Jehova imbilinna caniac iti daydi nga aldaw nga isuroc cadacayo dagiti al-alagaden ken linlinteg tapno mabalinyo a sungpoten ida iti daga a papananyo a tagicuaen.

15Aluadanyo ngarud a naimbag dagiti bagbagiyo: tangay awan nakitayo a langa iti daydi nga aldaw a pannakisao cadacayo ni Jehova idiay Horeb nanipud idi tengnga ti apuy;

16Di la ket ta agdakescayo ken agaramidcayo iti ladawan a kinitikitan a cakita ti uray ania a langa, a caasping ti lalaki wenno babai,

17A capada ti uray ania nga animal nga adda iti rabaw iti rabaw ti daga, a capada ti uray ania a nagpayac a tumatayab nga agtayab iti langit,

18A capada ti uray ania nga aguy-uyas iti daga, a capada ti uray ania nga ican nga adda iti danum iti baba ti daga;

19Ken di la ket ta itangadmo dagita matam sadi langit, ket no makitam ti init ken ti bulan, ken dagiti bitbitwen, uray dagiti amin a buyot sadi langit maguyuguyca nga agdayaw cadacuada, ken agservi cadacuada cadagidiay impaay ni Jehova a Diosmo cadagiti amin a il-ili iti babaen ti amin a langit.

20Ngem ni Jehova innalanacayo, ket inaonnacayo iti horno a landoc, nanipud Egipto, tapno maipaaycayo kencuana a maysa nga ili nga agtawid cas iti daytoy nga aldaw.

21Maysa pay ni Jehova nacapungtot caniac gapu cadacayo ket insapatana a diac agballasiw iti Jordan, ket diacto sumrec iti dayta nasayaat a daga a ni Jehova a Diosmo itedna kenca a maysa a tawid:

22Ngem masapul a matayac iti daytoy a daga, masapul a diac agballasiw iti Jordan; ngem dacayo agballasiwcayto ket tagicuaenyo dayta nasayaat a daga.

23Aluadanyo dagiti bagbagiyo, di la ket malipatanyo ti tulag ni Jehova a Diosyo nga inaramidna cadacayo, ket mangaramidcayo iti maysa a ladawan a kinitikitan a langa ti uray ania a ni Jehova a Diosmo imparitna kenca.

24Ta ni Jehova a Diosmo isu ti maysa nga apuy a mangalun-un, maysa a manangimun a Dios.

25No agputotcanto cadagiti annac, ken annac dagiti annac, ken agnayoncayto iti daga, ket agdakescayto, ket agaramidcayo iti ladawan a kinitikitan a langa ti uray ania, ket aramidenyo ti dakes iti sango ni Jehova a Diosmo, a gargariem nga agpungtot;

26Awagac ti langit ken ti daga a sacsi a maicaniwas cadacayo ita nga aldaw, nga madaras a mapucawcayto a matalipupus iti daga a pagturonganyo nga agballasiw iti Jordan tapno tagicuaenyo; dicayto mapagbayag dagiti al-aldawyo idiay, ngem madadaelcayto a matalipupus.

27Ket ni Jehova iwarwarasnacayto iti baet dagiti il-ili, ket agbalincayto a bassit ti bilangna iti baet dagiti nasnacion, a pangipananto cadacayo ni Jehova.

28Ket idiay paadipencayto cadagiti didios, nga aramid dagiti im-ima, dagiti tattao, cayo ken bato a di-macakita, wenno di-macangngeg, wenno di-mangan, wenno di-macaangot.

29Ngem no manipud idiay ta sapulenyonto ni Jehova a Diosmo, ket masaracamto, no sapulem nga ipasnec iti isu-amin a pusom ken amin a cararuam.

30No addaca iti pagpaglan, ket amin dagitoy dumtengda kenca, iti maududi nga aldaw agsublicanto ken Jehova a Diosmo, ket ipangagmonto ti timecna;

31Ta ni Jehova a Diosmo isu ti Dios a manangngaasi; dinacanto baybay-an wenno dadaelen, wenno lipaten ti tulag dagiti ammam, isu a nangisapata cadacuada.

32Ta saludsudem ita dagiti al-aldaw a napalabes, isuda nga immununa ngem sica, nanipud idi aldaw a pinangparsua ti Dios iti tao iti rabaw ti daga, ken nanipud iti maysa a pungto ti langit agingga iti sabali, no adda cas iti daytoy dackel nga aramid, wenno adda nangngegan a capadana?

33Adda aya tattao a nacangeg iti timec ti Dios nga agsasao manipud iti tengnga ti apuy, cas mangngegmo, ket sibibiag pay laeng?

34Wenno pinadas ti Dios ti napan nangala ti maysa a nacion a cucuana iti tengnga ti sabali a nacion, gapu cadagiti panangsusuut, gapu cadagiti pagilasinan, ken gapu cadagiti nacascasdaaw, ken gapu iti gubat, ken gapu iti mannacabalin nga ima, ken gapu iti siuunnat a tackiag, ken gapu cadagiti dadackel a pagkigtotan, a cas ti nacadagupan ti inaramid cadacayo ni Jehova a Diosyo sadi Egipto iti sango dagiti matayo?

35Naiparangarang kenca daydi tapno ammmoem a ni Jehova isu ti Dios awanen sabali no di la is-isu.

36Manipud sadi langit impangngegna kenca ti timecna, tapno isuronaca; ket iti rabaw ti daga impakitana kenca ti dackel nga apuyna; ket nangngegmo dagiti sasaona manipud iti tengnga ti apuy.

37Ket gapu ta inay-ayatna dagiti ammam, a pinilina dagiti putotda a simmono cadacuada, ket iti caaddana, ken iti dackel a pannacabalinna, inaonnaca iti Egipto;

38Tapno pasiaenna iti sangoanam dagiti il-ili a daddadackel ken manmannacabalin ngem, sica, tapno ipastrecnaca, tapno itedna kenca ti dagada a tawidem cas iti aldaw itoy.

39Gapuna nga ammoem iti daytoy nga aldaw, ket imalditmo ita pusom, a ni Jehova isu ti Dios sadi langit idiay ngato ken iti rabaw ti daga ditoy baba; awanen ti sabali.

40Ket salimetmetamto dagiti al-alagadenna, ken dagiti bibilinna nga ibilinco kenca iti daytoy nga aldaw, tapno agbalincanto a naimbag, ken agraman dagiti annacmo a sumononto kenca, ken tapno mataginayonmo dagiti al-aldawmo iti daga nga ited kenca ni Jehova iti agnanayon.

41Idin ni Moises inlasinna dagiti tallo nga il-ili iti ballasiw ti Jordan nga agpaleleggacan ti init;

42Tapno ti nacapapatay mabalinna ti agcamang idiay daydiay macapatay iti padana a tao a dina gagaraen, ket dina ginura iti tiempo a nalabes; ken tapno, no agcamang iti maysa cadagitoy nga il-ili, agbiag:

43Isu dagitoy mainaganan, Beser idiay let-ang, iti tanap, a maipaay cadagiti Rubenitas; Ramot idiay Galaad, a maipaay cadagiti Gaditas; ken Golan idiay Basan, a maipaay cadagiti Manasesitas.

44Ket daytoy ti linteg nga imparang ni Moises cadagiti annac ti Israel:

45Dagitoy isuda dagiti pammanecnec, ken al-alagaden, ken bilbilin, nga imbaga ni Moises cadagiti annac ti Israel, idi a nacapanawda sadi Egipto,

46Iti ballasiw ti Jordan, iti lobong a sangoanan ti Beth-pehor, iti daga ni Sehon nga ari dagiti Amorreo, a nagtaeng idiay Hesbon, a kinabil ni Moises ken dagiti annac ti Israel, idi nga naggapuda sadi Egipto.

47Ket innalada a tagicuaen ti dagana, ken ti daga ni Og nga ari sadi Basan, dagiti dua nga ar-ari dagiti Amorreo, a nagyan iti ballasiw ti Jordan nga agpaleleggacan ti init;

48Manipud Aroer, nga adda iti pungto ti lobong ti Arnon, agingga iti bantay a Sion (a Hermon met laeng),

49Ken amin nga Araba a ballasiw ti Jordan iti daya, nga agingga met laeng iti baybay ti Araba iti baba dagiti sasalogan ti Pisga.