Deuteronomy 25

Ilokano (Ti Biblia (1973))

← Chapter 24 Jump to: Chapter 26 →

1No addanto susic cadagiti tattao, ket umamangda iti pangocoman, ket dagiti oc-ocom ocomenda ida; panecnecandanto ngarud ti nalinteg, ket dusaendanto ti dakes;

2Ket maaramidto a no ti dakes a tao maicari a mabaot, ti ocom paipasagnanto ket pabaotnanto a bilangen iti sangona, cas mayannatup iti kinadakesna.

3Uppat a pulo a saplit mabalinna nga ited kencuana, dinanto surocan: di la ket ta no malabsannanto, ket baotenna iti ad-adu ngem dagitoy iti adu a saplit, iti casta maibilang ti cabsatmo a nacas-ang kenca.

4Dicanto bosbosalan ti vaca no agiric iti naapit.

5No agcacanaed dagiti agcacabsat a lallaki, ket matay ti maysa cadacuada, ket awan ti anacna a lalaki, ti asawa ti natay saanto a makiasawa iti familia a sabali: ti cabsat ni asawana sumrecto kencuana, ket alaennanto nga asawa, ket aramidennanto kencuana ti annong ti maysa a cabsat ti asawa a lalaki.

6Ket maaramidto a ti inauna a lalaki nga ipasngayna, sumononto iti nagan daydi cabsatna a natay, tapno di mapucaw ti naganna iti Israel.

7No ti lalaki dina cayat nga alaen ti asawa daydi cabsatna, ti asawa daydi cabsatna ngarud dumanonto iti ruangan cadagiti lallacay ket cunananto, Ti cabsat ni asawac paglisianna a bangonen a maipaay ken cabsatna ti maysa a nagan iti Israel; dina cayat nga aramiden caniac ti annong ti maysa a cabsat ti asawa a lalaki.

8Iti casta dagiti lallacay ti ilina ayabandanto ti lalaki, ket casaodanto: ket no isu tumacder, ket cunana, Diac cayat nga alaen ti babai;

9Iti casta ti asawa daydi cabsatna umayto kencuana iti sango dagiti lallacay ket suctoennanto ti sapatos iti saca ni cayongna, ket tupraanna iti rupana; ket ti babai sumungbatto ket cunananto, Casta ti maaramidto iti lalaki a dina bangonen ti balay ti cabsatna.

10Ket iti Israel, maigaladto a naganna, Ti balay ni naucsot ti sapatosna.

11No dagiti lallaki agcacabilda, ket ti asawa ti maysa umasideg a mangicanawa ken asawana iti ima ti mangcabil kencuana, ket igammatna ti imana, ket punggusenna ti bagi nga ibainna;

12Putdemto ngarud ti ima ti babai, ti matam dinanto caasian.

13Awanto iti suputmo ti agduduma a titimbengan, maysa a dackel ken maysa a bassit.

14Awanto iti balaymo ti agduduma a sucatan, maysa a dackel ken maysa a bassit.

15Maysa nga apagtutop ken nalinteg a timbengan ti addanto kenca; maysa nga apagtutop ken nalinteg a sucatan ti addanto kenca; tapno dagiti al-aldawmo atiddugda iti daga a ni Jehova a Diosmo itedna kenca.

16Ta amin dagiti agaramid iti cacasta, amin met laeng nga agaramid iti nakillo, macarimonda ken Jehova a Diosmo.

17Laglagipem ti inaramid kenca ti Amalec iti dalan idi naggapucayo sadi Egipto;

18No casano ti isasabatna kenca iti dalan, ken pinangsugatna iti udim, amin dagiti nacapuy idi iti licudam, idi a napacsuyan ken sibabannogca; ket isu saan a nagbuteng iti Dios.

19Isu ti gapuna a maaramidto, a no ni Jehova a Diosmo maitedna kenca ti inana cadagiti amin a cabusormo nga aglawlaw, iti daga a ni Jehova a Diosmo itedna kenca a tawid a pagtagicuaam, punasemto ti pacalaglagipan ti Amalec iti babaen ti langit; saanmonto a liplipatan.

← Chapter 24 Jump to: Chapter 26 →