Deuteronomy 23

Ilokano (Ti Biblia (1973))

← Chapter 22 Jump to: Chapter 24 →

1Ti nadunor iti bukelbukel, wenno ti naputdan ti bagi nga ibainna, dinto sumrec iti gimong ni Jehova.

2Ti sapsing dinto sumrec iti gimong ni Jehova; uray pay agpapan iti maicasangapulo a caputotanna, awanto ti sumrec iti gimong ni Jehova.

3Ti maysa nga Ammonita, wenno maysa a Moabita saanto a sumrec iti gimong ni Jehova: uray pay iti maicasangapulo a caputotan, awanto cadagiti cadaraanda ti sumrecto iti gimong ni Jehova iti agnanayon.

4Gapu ta didacayo la insabatan iti tinapay ken danum iti dalan idi naggapucayo sadi Egipto: ken gapu ta isuda tinangdananda iti maibusor kenca ni Balaam nga anac ni Beor, nanipud Petor ti Mesopotamia, tapno mangilunod kenca.

5Nupay casta ni Jehova a Diosmo dina impangag ni Balaam, no di ket ni Jehova a Diosmo pinagbalinna ti lunod a bendicion kenca, ta ni Jehova a Diosmo inayatnaca.

6Dicanto sapulen ti talnada wenno irarang-ayda iti bayat ti aldawmo iti agnanayon.

7Dicanto cagura ti maysa nga Edomita; ta isu cabsatmo: dicanto cagura ti maysa a taga Egipto, gapu ta nagnaedca iti dagana.

8Dagiti annac ti maicatlo a caputotan a nayanac cadacuada sumrecto iti gimong ni Jehova.

9No inca iti pagbabacalan a makirupac cadagiti cabusormo, aluadamto ngarud ta bagim iti amin a dakes nga aramid.

10No addanto kenca ti uray asinoman a tao, a saan a nadalus a maipuon iti napasamac kencuana iti rabii, pumanawto ngarud iti pacarso, dinto um-umay iti uneg ti pagpacarsoan:

11Ngem maaramidto a no mumalem digosennanto ti bagina iti danum; ket no lumnec ti init, umayto iti uneg ti pacarso.

12Addanto met maysa a dissom iti ruar ti pacarso a pagiblengamto:

13Ket addanto kenca ti maysa a soplad cadagiti igammo; ket maaramidto a no agtutugawca iti ruar, daydiayto ti pagcalim, ket tallicudamto ken gaburamto ti iblengmo:

14Ta ni Jehova a Diosmo magna iti tengnga ti pacarsom, tapno ispalennaca, ket yawatna dagiti cabusormo iti saclangmo: isu ti gapuna a ti pagpacarsoam nasantoanto, tapno dina coma makita ti di-nadalus kenca, ket tallicudannaca.

15Dicanto yawat ken apona ti maysa nga adipen a nagtalaw ken apona, nga umamang kenca;

16Isu makipagnaedto kenca iti tengngam iti disso a piliennanto iti uneg ti maysa cadagiti ruruanganmo, a pagayatanna a nangnangrona: dicanto parparigaten.

17Awanto ti agbalangcantis cadagiti annac a babbai ti Israel, wenno awanto ti manangubet cadagiti annac a lallaki ti Israel.

18Dicanto mangyeg ti tangdan ti maysa a balangcantis wenno tangdan ti maysa nga aso iti balay ni Jehova a Diosmo, a maipaay a cari: ta dagitoy a dua isuda ti kinarimon ken Jehova a Diosmo.

19Dicanto agpautang iti maanacan iti cabsatmo; ti anac ti pirac, ti anac ti taraon ti anac ti uray ania a maipautang a maanacan:

20Iti gangannaet maipalubos nga agpautangca iti maanacan; ngem iti cabsatmo dicanto agpautang iti maanacan, tapno ni Jehova a Diosmo bendicionannaca iti isu-amin a pangaramatam iti imam iti daga a sercam tapno tagicuaem.

21No agcarica iti maysa a cari ken Jehova a Diosmo, dicanto gabgabayen a bayadan: ta ni Jehova a Diosmo dinto bumurong a singirenna kenca: ket dayta pacabasolamto.

22Ngem no mateppelam ti agcari, saanmonto a pacabasolan.

23Ti rumuarto cadagita bibigmo tungpalemto, ket aramidem; cas incarim ken Jehova a Diosmo, a daton ti sibubulos a nakem, nga incarim babaen ti ngiwatmo.

24No sumreccanto iti inuvasan ti padam a tao, mabalinmo laeng ti mangan cadagiti uvas nga agpennecca iti pagayatam; ngem dicanto mangicabil iti cuributmo.

25No sumrecca iti yan ti mulmula ti padam a tao, mabalinmo laeng ti rumurus iti dawa ita imam; ngem dicanto ipacat ti rakem iti mulmula ti padam a tao.

← Chapter 22 Jump to: Chapter 24 →