Deuteronomy 29

Ilokano (Ti Biblia (1973))

← Chapter 28 Jump to: Chapter 30 →

1Dagitoy dagiti sasao ti tulag a ni Jehova imbilinna ken Moises nga ipaaramid cadagiti annac ti Israel iti daga ti Moab, sangcasabali pay ti tulag nga inaramidna cadacuada idiay Horeb.

2Ket ni Moises inayabanna amin nga Israel, ket kinunana cadacuada, Dacayo nakitayo amin dagiti inaramid ni Jehova iti sango dagiti matayo iti daga nga Egipto ken Faraon, ken amin dagiti ad-adipenna, ken amin a dagana:

3Dagiti dadackel a pacasuutan a nakita dagiti matam, dagiti pagilaslasinan, ken dagidiay dackel a nacascasdaaw!

4Ngem ni Jehova dina inted kenca ti puso a pangammo, ken matmata a pagkita, ken laplapayag a pagdengngeg agpapan ita nga aldaw.

5Ket siac uppat a pulo a tawen nga indalancayo iti tay-ac: dagiti pagan-anayyo saanda a dimmaan cadacayo, ket ti sapatosmo saan a dimmaan iti sacam.

6Dicayo nangan idi iti tinapay, wenno imminum iti arac, wenno naingel nga inumen; tapno ammoenyo a siac ni Jehova a Diosyo.

7Ket idi a macadanoncayo itoy a disso, ni Sehon na ari ti Hesbon, ken ni Og nga ari ti Basan, rimmuarda a makibacal cadatayo iti gubat, ket datayo kinabiltayo ida:

8Ket innalatayo ti dagada, ket intedtayo a maysa a tawid cadagiti Rubenitas, ken cadagiti Gaditas, ken ti guddua ti caputotan dagiti Manasesitas.

9Salimetmetam ngarud dagiti sasao daytoy a tulag, ket aramidem ida tapno rumang-ayca iti isu-amin nga aramidem.

10Dacayo addacayo amin itoy nga aldaw iti sango ni Jehova a Diosyo; dagiti pangoloyo, dagiti capcaputotanyo, dagiti lallacayyo, ken dagiti turturayenyo, amin met laeng a lalaki ti Israel,

11Dagiti annacyo a babassit, dagiti assawayo, ken ti gangannaetmo nga adda iti tengnga dagiti pacpacarsom, manipud agpucpucan iti cayom agpapan agsacdu iti danummo;

12Tapno mabalinmo ti sumrec iti tulag ni Jehova a Diosmo ken iti sapatana a ni Jehova a Diosmo aramidenna kenca ita nga aldaw;

13Tapno bangonennaca kencuana ita nga aldaw a maysa nga umili, ken tapno isu ti Diosmo, cas sinaona kenca, ken cas insapatana cadagiti ammam, a da Abraham, Isaac, ken Jacob.

14Saan a dacayo laeng ti pagaramidac itoy a tulag ken daytoy a sapata,

15Ngem iti pay met adda ditoy cadacayo ita nga aldaw iti sango ni Jehova a Diostayo, ken casta met iti awan ditoy cadatayo ita nga aldaw;

16(Ta dacayo ammoyo no casano ti pinagnaedtayo idi iti daga nga Egipto, ken no casano ti idadatengtayo iti tengnga dagiti il-ili a naglasatanyo:

17Ket dacayo nakitayo dagiti kinarimon cadacuada, ken dagiti ladladawanda a cayo ken bato, pirac ken balitoc, nga adda idi cadacuada;)

18Di la ket ta addanto cadacayo lalaki wenno babai, wenno familia, wenno caputotan a sumiasi ti pusona ita nga aldaw ken Jehova a Diostayo a mapan agservi cadagiti didios dagidiay a nacion; di la ket ta adda cadacayo ti maysa a ramut a macasabidong ken ajenjo;

19Ket maaramid a, no denggenna dagiti sasao daytoy a lunod, a bendicionanna ti bagina met laeng iti pusona, a cunana, Natalnaacto, uray magnaac iti kinasungit ti pusoc a mangdadael iti nadam-eg agraman ti namaga.

20Ni Jehova dinanto pacawanen dayta a tao, ngem ti pungtot ni Jehova ken ti imunna umasucdanto a maibusor iti dayta a tao, ket amin a lunod a naisurat iti daytoy a libro agdissodanto kencuana, ket ni Jehova punasennanto ti naganna iti baba ti langit.

21Ket ni Jehova isaganananto nga ipaay iti dakes, cadagiti amin a caputotan iti Israel cas mayannurot cadagiti amin a lunod ti tulag a naisurat iti daytoy a libro ti linteg.

22Ket ti caputotan a sumaruno, dagiti annacyo a tumacder a sonoyo, ken ti gangannaet nga umayto nga aggapu iti adayu a daga, cunadanto, no makitada dagiti didigra iti daydiay a daga, ken ti sacsakit a pinangpasakit kencuana ni Jehova;

23Ken ti dagup ti dagana azufre ken asin, ket dumardarang a di mamulaan, wenno di mangted ti bunga, wenno tumubo sadiay ti uray ania a root, a capada ti pannacadadael ti Sodoma ken Gomorra, Adma ken Seboim, isuda a ni Jehova dinadaelna gapu iti ungetna ken pungtotna:

24Amin met laeng dagiti nasnacion cunadanto, Ania ti gapuna nga inaramid ni Jehova ti casta iti daytoy a daga? ania ti caipapanan ti bara daytoy naindaclan nga unget?

25Cunanto ngarud dagiti tattao, Gapu ta isuda binaybay-anda ti tulag ni Jehova a Dios dagiti ammada, nga inaramidna cadacuada idi inaonna ida iti daga nga Egipto;

26Ket napanda, ket nagservida cadagiti sabsabali a didios, ket nagdaydayawda, cadacuada, didios nga idi dida am-ammo, a dina inted cadacuada:

27Isu ti gapuna a ti unget ni Jehova simged a maibusor itoy a daga, tapno mangyeg itoy a daga ti dagup ti lunod a naisurat itoy a libro;

28Ket ni Jehova inaccalna ida iti dagada iti unget ken iti pungtot ken iti naindaclan a lucsaw, ket imbellengna ida iti sabali a daga, cas ita nga aldaw.

29Dagiti nalimed a banbanag biang ni Jehova a Diostayo; ngem dagiti naipaltiing a banbanag biangtayo ken dagiti annactayo iti agnanayon, tapno aramidentayo ti dagup dagiti sasao daytoy a linteg.

← Chapter 28 Jump to: Chapter 30 →