Deuteronomy 19

Ilokano (Ti Biblia (1973))

← Chapter 18 Jump to: Chapter 20 →

1No ni Jehova a Diosmo pusaynanto dagiti nasnacion a ti dagada ni Jehova a Diosmo itedna kenca, ket sumandica cadacuada, ket agnaedca cadagiti il-ilida ken iti balbalayda;

2Mangilasincanto ti maipaay kenca iti tallo nga il-ili iti tengnga ti dagam a ited ni Jehova a Diosmo kenca a pagtagicuaam.

3Isaganaamto ta bagim iti dalan, ket bingayemto dagiti pagbeddengan ti dagam a ni Jehova a Diosmo ipatawidna kenca iti tallo a paspaset, tapno ti tunggal maysa a macapapatay mabalinna ti agtaray sadiay.

4Ket dagitoy ti casasaad ti macapapatay nga agcamangto idiay ket agbiag: ti mamapatay a dina nagayatan iti padana a tao, ket dina ginurgura iti nalabes nga al-aldaw;

5Cas no maysa a tao mapan iti bakir a cacuyogna ti padana a tao nga agpucan iti cayo, ket ti imana inlayatna ti wasay tapano pucanenna ti cayo, ket ti wasay masucto iti putan, ket agdisso iti caduana, ket matay; isu cumamangto iti maysa cadagitoy nga il-ili ket agbiag,

6Di la ket ta ti agibales iti dara camatenna ti nacapatay, no sipupudot pay laeng ti pusona, ket macamacamna, ta ti dalan atiddug, ket sugatenna iti macapatay: idinto a di maicari a matay, gapu ta dina met ginurgura cadagiti aldaw a nalabes.

7Isu ti gapuna nga ibilinco kenca a cunac, Mangilasincanto iti tallo nga il-ili a maipaay kenca.

8Ket no ni Jehova a Diosmo palawaenna ti beddengmo, cas insapatana cadagiti ammam, ken itedna kenca ti amin a daga nga incarina cadagiti ammam;

9No salimetmetamto ti dagup daytoy a bilin, tapno aramidem, isu nga ibilinco kenca itoy nga aldaw, nga ayatem ni Jehova a Diosmo, ken magnaca a cancanayon iti daldalanna; inayonmonto pay ngarud a maipaay kenca ti tallo nga il-ili, sabali pay laeng dagitoy tallo;

10Tapno ti dara nga awan basolna saan a maibucbuc iti tengnga ti dagam a ni Jehova a Diosmo itedna kenca a tawid, ket iti casta ti dara maiparabawto kenca.

11Ngem no siasinoman a tao gumura iti padana a tao, ket sanebenna, ket tumacder a bumusor kencuana, ket sugatenna iti macappatay, isu a pacatayanna, ket daydiay cumamang iti maysa cadagitoy a ili;

12Iti casta dagiti lallacay iti ilina agbaondanto ket paalada idiay, ket yawatda ti bagina iti ima ni agibales iti dara tapno matay.

13Ti matam dinanto caasian, ngem iccatemto iti Israel ti dara nga awan basolna, tapno agbalincanto a naimbag.

14Dicanto yalis ti dulon ti daga ti padam a tao, nga dagiti inauna incabilda iti tawidmo, nga tawidemto sadiay daga a ni Jehova a Diosmo itedna kenca a tagicuaem.

15Ti maymaysa a sacsi dinto tumacder a mangidarum iti maysa a tao gapu iti uray ania a kinadakes, wenno aniaman a basol, iti uray ania a basol, a nacabiddutanna: iti panagsao ti dua a sacsi, wenno iti panagsao ti tallo a sacsi, ti pacapanecnecan ti maysa a panggep.

16No ti maysa a naulbod a sacsi tumacder a mangimameg iti maysa a tao, tapno panecnecanna ti maibusor kencuana ti panagaramid ti dakes,

17Dagitoy dua a tattao ngarud nga agringgor, agtacderdanto iti sango ni Jehova, iti saclang dagiti agannongto a papadi ken oc-ocom cadagitanto nga al-aldaw;

18Ket dagiti oc-ocom agpalutpotdanto a nalaing: ket adtoy, no ti sacsi maysa a naulbod a sacsi, ket pinanecnecanna a sititiri ti macaidadanes iti cabsatna;

19Aramidemto met ngarud kencuana, ti cas pinanunotna nga inaramid iti cabsatna: iti casta maiccatmonto ti dakes iti tengngam.

20Ket dagiti mabati denggendanto ket agbutengdanto, ken panipudandan a didanto ar-aramidenen ti uray ania a casdiay a dakes iti tengngam.

21Ket ti matam dinto mangngaasi; ti biag maisingirto iti biag, mata iti mata, ngipen iti ngipen, ima iti ima, saca iti saca.

← Chapter 18 Jump to: Chapter 20 →