Deuteronomy 16

Ilokano (Ti Biblia (1973))

← Chapter 15 Jump to: Chapter 17 →

1Ngilinem ti bulan nga Abib, ket salimetmetam ti pascua ken Jehova a Diosmo; ta iti bulan nga Abib ni Jehova a Diosmo impanawnaca sadi Egipto iti rabii.

2Ket mangidatoncanto iti pascua ken Jehova a Diosmo ti aggapu iti pangen ken iti arban iti disso a ni Jehova piliennanto a pangitaenganna ti naganna.

3Dicanto mangan iti tinapay a nalevaduraan; pito nga aldaw a manganto iti awan levadurana a tinapay nga isu ti tinapay ti panagladingit; ta sica nadaras ti pannacaipanawmo sadiay daga nga Egipto: tapno malagipmo ti aldaw a pannacaaonmo iti daga nga Egipto iti isu-amin nga al-aldaw ti panagbiagmo.

4Ket awanto ti levadura a makita iti biangmo cadagiti pito nga aldaw iti isu-amin a beddengmo; wenno awanto ti uray ania a lasag ti idatonmo iti umuna nga aldaw iti sumipnget, a matda nga agpatnag agpapan iti bigat.

5Dica mabalin ti agdaton iti pascua iti uray sadino nga uneg dagiti ruanganmo nga ni Jehova a Diosmo itedna kenca;

6Ngem iti disso a ni Jehova a Diosmo piliennanto a pangitaengan iti naganna, idiay mabalinmonto ti mangaramid iti sacrificio a pascua iti sumipnget no lumnec ti init, iti tiempo ti ipapanawmo sadi Egipto.

7Ket sica agtonocanto, ket canemto iti disso a ni Jehova a Diosmo piliennanto: ket agsublicanto iti bigat a mapan iti toltoldam.

8Cadagiti innem nga aldaw mangancanto iti awan levadurana a tinapay: ket itinto maicapito nga aldaw isunto ti nadaeg a panaggigimong ken Jehova a Diosmo: sica dicanto agtrabajo iti dayta.

9Pito a lawlawasna ti bilangemto a maipaay kenca: manipud ti aldaw a panangirugim a nangipacat iti rakem iti maapit, rugiamto ti agbilang iti pito a lawlawasna.

10Ket ngilinemto ti fiesta dagiti lawlawasna ken Jehova a Diosmo, agraman iti maysa nga ipaaymo a sibubulos a nakem a daton dagiti imam, nga itedmonto cas catutopan ti pammendicion kenca ni Jehova a Diosmo:

11Ket sica agragsaccanto iti sango ni Jehova a Diosmo, sica ken ti anacmo a lalaki, ken ti anacmo a babai, ken ti adipenmo a lalaki, ken ti adipenmo a babai, ken ti Levita nga adda iti uneg dagiti ruruanganmo, ken ti gangannaet, ken dagiti ul-ulila ken ti balo a babai, nga adda iti tengngam, iti disso a ni Jehova a Diosmo piliennanto a panginaedan iti naganna.

12Ket laglagipemto a maysaca met idi nga adipen sadi Egipto: ket tungpalemto ken aramidem dagitoy a al-alagaden.

13Sica ngilinemto ti fiesta dagiti tabernaculo pito nga aldaw, calpasan ti panagocconmo ti naggapu iti pagtaltagam, ken iti pagaracam.

14Ket agragsaccanto iti fiestam, sica ken ti anacmo a lalaki, ken ti anacmo a babai, ken ti bag-enmo a lalaki, ken ti bag-enmo a babai, ken ti Levita, ken ti gangannaet, ken dagiti ul-ulila ken ti balo a babai, nga adda iti uneg dagiti ruruanganmo.

15Pito nga aldaw a ngilinemto ti maysa a fiesta ni Jehova a Diosmo iti disso a ni Jehova piliennanto: ta ni Jehova a Diosmo bendicionannacanto iti isu-amin nga apitmo, ken isu-amin a pagbannogan dagiti imam, ket naragsaccanto iti isu-amin.

16Dagiti amin a lallakim mamitlo iti macatawen nga agparangdanto ken Jehova a Diosmo iti disso a ni Jehova piliennanto: iti fiesta ti di-nalevaduraan a tinapay, ken iti fiesta dagiti lawlawasna, ken iti fiesta iti fiesta dagiti tabernaculo, ket didanto agparparang nga ima-ima iti sango ni Jehova:

17Tunggal maysa a lalaki mangtedto cas cabaelanna iti catutopan ti bendicion nga inted kenca ni Jehova a Diosmo.

18Oc-ocom ken pangpangolo mamangoncanto kenca cadagiti amin a ruruanganmo, a ni Jehova intedna kenca, cas mayannurot cadagiti caputotam; ket isuda ocomendanto ti umili iti nalinteg a panangocom.

19Dicanto kilkilloen ti justicia: dicanto pagdudumaen dagiti tattao: dicanto met awaten ti panocsoc; ta ti pangsocsoc bulsekenna dagiti mata ti masirib, ket ballicugenna dagiti sasao dagiti nalinteg.

20Ti laeng linteg ti surotemto tapno agbiagca ken agtawidca iti daga nga ni Jehova a Diosmo itedna kenca.

21Dicanto mangimula iti agpaay kenca ti maysa nga Ashera nga uray ania a kita ti cayo iti sikigan ti altar ni Jehova a Diosmo, isu nga aramidemto nga maipaay kenca.

22Dicanto met ibangonan ti biangmo iti maysa a monmon; a ni Jehova a Diosmo cagurana.

← Chapter 15 Jump to: Chapter 17 →