Isaiah 1

Kamba (Mbivilia) 1956

Jump to: Chapter 2 →

1Woni wa Isaia mwana wa Amosu, ũla wonie ũndũ wa Yuta na Yelusaleme, mĩthenya ya Usia, na Yothamu, na Aasu, na Esekia, asumbĩ ma Yuta.

2Ĩw’ai, inyw’ĩ matu, na tea kũtũ, we nthĩ; nũndũ Yeova nũneenete: niniĩthĩtye syana na kũea, nasyo nimbaĩte matũ.

3Ng’ombe nĩyĩsĩ mwene wayo, na ĩng’oi vandũ va kũĩthĩw’a nĩ vwana wayo; ĩndĩ Isilaeli ndesĩ, andũ makwa matisũanĩaa.

4A! Mbaĩ mbathe, andũ ala makuĩte ũthũku, ũsyao wĩki wa naĩ, syana ila syĩkaa ũthũku! Nĩmamũtiĩte Yeova, nĩmamũvũthĩtye Ũla Mũtheu wa Isilaeli, nĩmevathĩte na kũsyoka na ĩtina.

5Nũndũ wa kĩ mũũkũnangwa kũvika na yu, nĩ kana mũendeee na kũng’enda? Mũtwe w’onthe nĩ mũwau, na ngoo yonthe nĩ ndevu.

6Kuma ũnyaĩĩ wa kũũ o na kũvika mũtwe vati vandũ vaima; no mawũkite, na maiĩsya, na makũna ma mĩtũkĩ: matyaatumwa, kana kwovwa, kana kwololow’a na mauta.

7Nthĩ yenyu nĩ nthei; ndũa syenyu nivĩvĩtw’e na mwaki; aeni nĩmekũmina nthĩ yenyu mwene, na nĩ nthei, o ta ĩkulumanĩtw’e nĩ aeni.

8Na mwĩĩtu wa Saioni nũtiĩtwe ta ĩlwanda mũũndanĩ wa mĩsavivũ, ta katũĩo mũũndanĩ wa mongũ, ta ndũa ĩtw’ĩkanĩw’e.

9Keka Yeova wa nguthu watũtiĩe ũtialo mũnini mũno, twĩthĩwa tũilyĩ ta Sotomo, na kũvw’ananw’a na Ngomola.

10Ĩthukĩĩsyei ndeto ya Yeova inyw’ĩ ala mũsumbĩkaa Sotomo; teai matũ mwĩw’e mĩao ya Ngai waitũ, inyw’ĩ andũ ma Ngomola.

11Wingĩ wa nthembo syenyu ũmbaĩlĩte kyaũ? Easya ũu Yeova; nĩnĩkolete nthembo sya kũvĩvw’a sya ndũũme, na mathunya ma indo ila nou; na nditanĩaa nthakame ya tũsalũ twa mũew’a, kana tũtena twa malondu, kana nthenge.

12Yĩla mũkaa kwĩyonan’ya mbee wakwa, nũũ ũla wendie ũu mokonĩ menyu, mũkinyangae nza syakwa?

13Mũtikaete nthembo ingĩ sya mana; ũvani nĩ ũthatyo kwakwa; mwei mũtisu na savato, kũtw’a maũmbano‐nditonya ũthũku na ũmbano ũkilĩtye.

14Ngoo yakwa nĩmenaa myei yenyu mĩtisu, na mboka syenyu ila itw’ĩtwe; nasyo nĩ mũio kwakwa; nĩnĩnoete nĩ kwikua.

15Na yĩla mwĩtambũũkya moko menyu, ngavitha metho makwa ndikamwone; ĩĩ, yĩla mwĩvoya mboya mbingĩ, ndikethukĩĩsya: moko menyu nĩmausũĩte nthakame.

16Thambai, ĩthesyei; vetai ũthũku wa meko menyu ndikawone na metho makwa; ekai kwĩka ũthũku;

17ĩmanyĩsyei kwĩka nesa; manthai sila wa katĩ, mũtethyei ũla ũthĩnaw’a, masilanasyei ala makw’ĩĩwe nĩ aaĩthe, mũteteei mũndũ mũka ndiwa.

18Ũkai yu, tũsũanĩe vamwe, easya ũu Yeova: o na ethĩwa naĩ syenyu nĩ ndune mũno, ikeethĩwa nzaũ ta ĩa; o na ethĩwa nĩ ndune ta mũkumbũ ikeethĩwa ta w’ĩa wa ĩlondu.

19Ethĩwa mũkeetĩkĩla na kwĩw’a, mũkaĩsaa ũseo wa ĩ nthĩ:

20ĩndĩ mwalea na kũng’enda, mũkaminwa na ũvyũ; nũndũ kanyw’a wa Yeova nũneenete ũu.

21Kaĩ ndũa yĩ kĩthito nĩtw’ĩkĩte ĩlwaya! O ĩla yausũĩte ũsili wa katĩ! Ũlũngalu nĩwekalaa nthĩnĩ wayo, ĩndĩ yu no oaani.

22Vetha waku nũtw’ĩkĩte makwaũ ma vetha, mbinyu yaku nĩvulanĩtw’e na manzĩ.

23Ala maku me mbee ũsumbĩnĩ nĩ ang’endu, na atindan’ya ma ing’ei; kĩla mũndũ nĩwendaa mavaki, na nũatĩĩaa kũtuvwa: matisilanasya ala makw’ĩĩwe nĩ aaĩthe, o na vata wa mũndũmũka ndiwa ndũmavikĩaa.

24Kwondũ wa ũu Mwĩaĩi, Yeova wa nguthu, Ũla Mwene Vinya wa Isilaeli, easya, A! Nĩngwĩvathana na nthũ syakwa, na kwĩĩvanĩsya kwa amaitha makwa;

25na ngathyũũa kw’oko kwakwa kwĩthĩwe ĩũlũ waku, na kũthesya vyũ makwaũ maku, na kũveta matheũko maku;

26na ngatũnga asili maku methĩwe ta ĩvinda ya mbee, na atai maku ta wambĩlĩlyonĩ: ĩtina wa ũu ũkeetwa Ndũa ya ũlũngalu, katũla ke kĩthito.

27Saioni ĩkoovow’a na sila wa katĩ, na andũ mayo ala maalyũlile ngoo makoovow’a na ũlũngalu.

28Ĩndĩ kwanangwa kwa avĩtan’ya na andũ athe kũkethĩwa ĩvinda yĩmwe, na ala mamũtiaa Yeova makaminwa.

29Nũndũ makasonoka ũndũ wa mĩtĩ ya myaloni ĩla mwendie, mũkathokoanw’a ũndũ wa mĩũnda ĩla mũnyuvĩte.

30Nũndũ mũkeethĩwa ta mwaloni ũla matũ maw’o mavovaa, na ta mũũnda ũte manzĩ.

31Na ũla wĩ vinya akeethĩwa ta ngũno, na wĩa wake ta ngala ya mwaki; na akavya vamwe naw’o, na vaikethĩwa wa kũvosya.

Jump to: Chapter 2 →