Isaiah 29

Kamba (Mbivilia) 1956

← Chapter 28 Jump to: Chapter 30 →

1We, Alieli, Alieli ndũa ĩla Ndaviti wambie maeema make! Ongelai mwaka na mwaka; syathĩ sya mboka niatĩanĩe:

2nĩvo ĩndĩ nĩthĩn’ya Alieli, na kũkeethĩwa kĩmeto na kĩĩo, ĩndĩ ĩkeethĩwa kwakwa ta Alieli.

3Na ngamba maeema makwa makũthyũlũlũkĩte, na ngakũtw’ĩkanĩsya na nguthu sya asikalĩ maiĩtwe, na ngaaka ngome sya ũkũtw’ĩkanĩsya.

4Naku ũkatheew’a nthĩ, na ũkaneena wĩ nthĩ, na kũneena kwaku kũkeethĩwa kwĩ ĩtheo kĩtoonĩ; na wasya waku ũkeethĩwa ta wa mũndũ ũla wĩsene na veva, ũkyuma mũthanganĩ, na kũneena kwaku kũkanyiila kuma kĩtoonĩ.

5Ĩndĩ wingĩ wa amaitha maku ũkeethĩwa ta kĩtoo kĩvinyu mũno, na wingĩ wa ala ma kũtĩsya ta wewa ũla ũvĩtaa: ĩĩ, ũu ũkeethĩwa na mĩtũkĩ ta kĩthũlũmũko.

6Ĩkookĩwa nĩ Yeova wa nguthu e na kĩtundumo, na kĩtetemo kya, nthĩ, na kĩlonzo kĩnene, vamwe na kĩlingi na kĩuutani, na kĩtw’ĩki kya mwaki ũla ũvĩvasya.

7Na wingĩ wa mbaĩ syonthe ila syũkitaa na Alieli, o syonthe ila syũkitaa nayo na ngome yayo yĩ vinya, na ila imĩthĩnasya, ikeethĩwa ta ndoto, woni wa ũtukũ.

8Na kũkeethĩwa ta mũndũ wĩ nzaa aiota ndoto, na, sisya, akyona ta ũnũũya; ĩndĩ aamũka, thayũ wake nĩ mũthei: kana ta mũndũ wĩ na waũni aiota ndoto, na, sisya, akyona ta ũnũũnyw’a; ĩndĩ aamũka na, sisya, nĩ mũnyalu, na thayũ wake wĩ na nzaa: now’o wingĩ wa mbaĩ syonthe ũkethĩwa ũilyĩ, ũla wũkitaa na kĩĩma kya Saioni.

9Eteelai mũseng’e; ĩtanĩthyei na mũkĩthĩwa ililinda: nĩmatoonetw’e, ĩndĩ ti ũndũ wa mbinyu; nĩmalũaa, ĩndĩ ti ũndũ wa kĩla kĩtoonasya.

10Nũndũ Yeova nũmũtulũlĩte veva wa too mũnene, na mũlalĩtye metho menyu, ala athani; na nũvw’ĩkĩte atongoi menyu, ala monaa mawoni.

11Na woni w’onthe nũtw’ĩkĩte kwenyu ta ndeto sya ĩvuku yĩla yĩvingĩtwe yĩkasiĩlwa, yĩla andũ mamũnenga mũndũ ũla ũmanyĩĩtw’e mũno, makĩmwĩa, Soma yĩĩ, nĩngũkwĩsũva; nake asya, Nditonya, nũndũ yĩvingĩtwe yĩkasiĩlwa:

12na ĩvuku yĩienengwa ũla ũtamanyĩĩtw’e, makĩmwĩa, Soma yĩĩ, nĩngũkwĩsũva, nake asya, Ndimanyĩĩtw’e.

13Na Mwĩaĩi asya, Nĩkwĩthĩwa andũ aa nĩmanthengeeaa, na nĩmandaĩaa na kanyw’a woo na ilomo syoo, ĩndĩ nĩmavetete ngoo syoo kũasa nakwa, na kũngĩa kwoo nĩ mwĩao wa andũ ũla mamanyĩĩtw’e;

14kwondũ wa ũu, sisya, ngaendeea kũtethya wĩa wa ũseng’ya katĩ wa andũ aa, o wĩa wa ũseng’ya na wa kũmakya; na ũĩ wa andũ moo oĩ ũkaa, na ũmanyi wa andũ moo me kĩlĩko ũkavithwa.

15Woo nĩ wa ala mamũvithaa Yeova maũndũ moo mũno, na mawĩa moo me kĩvindunĩ, maiasya, Nũũ ũla ũtwonaa? Na nũũ ũla ũtwĩsĩ?

16Inyw’ĩ nĩmũkulumanasya maũndũ! Mũmbi akatalwa ta yũmba, kana kĩndũ kĩla kyoombiwe kĩkasya ũndũ wa ũla wakyũmbie, Ndaambũmba; kana kĩla kyoombiwe kĩkasya ũndũ wa ũla wakyũmbie, Nde na ũmanyi?

17Ti kavinda kanini mũno, na Levanoni ĩkĩalyũlwa ĩtw’ĩke mũũnda wĩ ũsyao, na mũũnda wĩ ũsyao ũkĩtalwa ta mũtitũ?

18Na mũthenya ũsu ala au matũ makeew’a ndeto sya yĩla ĩvuku, na metho ma ala matonaa makoona kuma mbindunĩ na kĩvindunĩ.

19Na ala auu nao makaingĩvya ũtanu woo nthĩnĩ wa Yeova, na ala ngya katĩ wa andũ makatanĩa Ũla Mũtheu wa Isilaeli.

20Nũndũ ũla wa kũtĩsya nũtw’ĩtwe wa mana, na ũla mũkaakaasya nũekete, na onthe ala meteelaa ũthũku nĩmavetetwe;

21ala mavĩtĩthasya mũndũ ndetonĩ, na kũmwiĩa kĩtei ũla ũkananasya mbingĩlonĩ, na kwathũkya ala alũngalu na ũndũ wa mana.

22Kwondũ wa ũu Yeova, ũla wamwovoisye Avalaamu, easya ũndũ wa nyũmba ya Yakovo: Yũ Yakovo ndakasonoka, o na yu ũthyũ wake ndũkaalyũka.

23Ĩndĩ yĩla wĩona syana syake, wĩa wa moko makwa, syĩ katĩ wake, ikoonan’ya syĩtwa yakwa nĩ ĩtheũ; ĩĩ, ikoonan’ya nĩ mũtheu Ũla Mũtheu wa Yakovo, na ikamũkĩa Ngai wa Isilaeli.

24Nao ala mavĩtasya vevanĩ makamanya, na ala manyungunyĩasya makeetĩkĩla kũmanyĩw’a.

← Chapter 28 Jump to: Chapter 30 →