Isaiah 4

Kamba (Mbivilia) 1956

← Chapter 3 Jump to: Chapter 5 →

1Na aka mũonza makakwata mũndũ mũũme ũmwe mũthenya ũsu, makyasya, Tũkaĩsaa lĩu witũ ene, na kwĩvw’ĩkaa ngũa sitũ ene: ĩndĩ tũeke twĩtanĩaw’e na syĩtwa yaku; veta kũvũthw’a kwitũ.

2Mũthenya ũsu ũvonge wa Yeova ũkethĩwa mwanakavu na wĩ na ndaĩa, na ũsyao wa nthĩ ũkethĩwa mũseo mũno na mwaĩlu kwondũ wa ala ma Isilaeli ala mavonokete.

3Na kũkeethĩwa, o ũla wĩtiala Saioni, na ũla wĩtiwa Yelusaleme, akeetwa mũtheu, o kĩla ũmwe ũla ũandĩkĩtwe katĩ wa ala me thayũ Yelusaleme;

4yĩla Mwĩaĩi ũkethĩwa athambĩtye ũvuku wa eĩtu ma Saioni, na kũthesya nthakame ya Yelusaleme yume nthĩnĩ wayo, kwondũ wa veva wa ũsili wa katĩ, na kwondũ wa veva wa kũvĩvya.

5Yeova akatambũũkya ĩũlũ wa wĩkalo w’onthe wa kĩĩma kya Saioni, na ĩũlũ wa maũmbano makyo, mũumbĩ wa syũki mũthenya, na kũkena kwa kĩtw’ĩki kya mwaki ũtukũ; nũndũ kũkatambũũkw’a kĩla kya kũvw’ĩka ĩũlũ wa ũtheu mũtisu w’onthe.

6Na vakeethĩwa ĩeema ũndũ wa muunyĩ mũthenya kwondũ wa muutĩa, na vandũ wa kũkĩĩa na kwĩvitha kwondũ wa kĩuutani na mbua.

← Chapter 3 Jump to: Chapter 5 →