Isaiah 5

Kamba (Mbivilia) 1956

← Chapter 4 Jump to: Chapter 6 →

1Nĩnĩmwinĩe mwendwa wakwa wathi wa mwendwa wakwa ũndũ wa mũũnda wake wa mĩsavivũ. Mwendwa wakwa aĩ na mũũnda wa mĩsavivũ kĩĩmanĩ kĩnou mũno:

2na awĩnza, na aumya mavia nthĩnĩ waw’o, na avanda mĩsavivũ mĩseo mũno, na aaka mwako mũtũlu wa mũnyoolo katĩ waw’o, o na enza katĩ waw’o kĩangĩo kya nzavivũ: na asyaĩĩsya ũsyae nzavivũ, na wasyaa nzavivũ sya kĩthekanĩ.

3Na yu, inyw’ĩ mũtwĩe Yelusaleme na andũ ma Yuta, nĩngũmwĩsũva, tũsilan’yei nyie na mũũnda wakwa wa mĩsavivũ.

4Nĩ ũndũ ũngĩ wĩva waĩ ũtonya kwĩkwa mũũndanĩ wakwa wa mĩsavivũ, ũla ndaawĩka? Nũndũ wa kĩ ĩndĩ, yĩla nasyaĩĩsye ũsyae nzavivũ, wasyaie nzavivũ sya kĩthekanĩ?

5Na yu nĩngũmũtavya ũndũ nĩwĩka mũũnda wakwa wa mĩsavivũ: ngaveta wiio waw’o, na ũkalĩka; ngaomboanga ũvai waw’o, na ũkakinyangwa:

6na ngootw’ĩkĩthya ĩei; ndũkasewa kana kũĩmwa; ĩndĩ ũkamesya mĩtae na mĩw’a: o na ngeeaĩa mathweo matikausye mbua ĩũlũ waw’o.

7Nũndũ mũũnda wa mĩsavivũ wa Yeova wa nguthu nĩw’o nyũmba ya Isilaeli, na andũ ma Yuta nĩ mũkenge wake wa ũmwendeesya: nake nĩwamanthie sila wa katĩ, ĩndĩ, sisya, no thĩna; amantha ũlũngalu, ĩndĩ, sisya, no kĩĩo.

8Woo nĩ wa ala mathengeanĩasya nyũmba na nyũmba, ala mathengeanĩasya mũũnda na mũũnda, mũvaka vati ũthei, na nĩmwĩkalĩtw’e mwĩ inyw’oka katĩ wa ĩ nthĩ!

9Matũnĩ makwa Yeova wa nguthu easya atĩĩ, Nĩ w’o nyũmba nyingĩ ikeethĩwa nthei, o ila nene na nzeo, ite na mũndũ wa kũsyĩkala.

10Nũndũ matambya maana ana ma mũũnda wa mĩsavivũ makasyaa vathi ĩmwe, na omeli ĩmwe ya mbeũ ĩkasyaa eva ĩmwe.

11Woo nĩ wa ala mokĩlaa kĩoko tene, nĩ kana maatĩĩe kĩla kĩtoonasya; ala mekalaa kũvika ũtukũ katĩ, kũvika mbinyu ĩkwate mwaki nthĩnĩ woo!

12Na mbeve na kananda, kathembe na mũtũlilũ, na mbinyu, syĩ mbokanĩ syoo; ĩndĩ matisyaĩĩasya wĩa wa Yeova, o na matiũsũanĩa wĩa wa moko make.

13Kwondũ wa ũu andũ makwa nĩ aendu me atave kwondũ wa kũnyivĩwa nĩ ũmanyi; na andũ moo me ndaĩa me na nzaa, na ĩkomano yoo nĩyĩũnyalw’a nĩ waũni.

14Kwondũ wa ũu Seoli nĩvanenevetye kwenda kwavo, na kwathamya kanyw’a wavo vate kũthima; na ũnene woo, na ĩkomano yoo, na kwĩtaĩa kwoo, na ũla ũtanaa katĩ woo, nĩmatheeaa nthĩnĩ wavo.

15Na mũndũ ũte nguma nũnũũkunamw’a, na mũndũ mũnene nũnũũnyivw’a, na metho ma ala mekwĩng’athĩlĩlya nĩmeũsonoka:

16ĩndĩ Yeova wa nguthu nũnũũtaĩwa kwondũ wa ũtw’ĩo wa sila wa katĩ, na Ngai Ũla Mũtheu nũkwonanw’a atĩ nĩ mũtheu ũlũngalunĩ.

17Na ĩndĩ tũtena twa malondu tũkaĩthw’a o ta twĩ kĩsesinĩ kyatw’o, na kũndũ kwanangĩku kwa ala anou kũkaĩsawa nĩ angangi.

18Woo nĩ wa ala makusasya ũthũku na ndii sya ũvũngũ, na kũkusya naĩ na ĩkanda ya ĩkasya;

19ala maasya, Nĩekalaate, nĩethangaasye wĩanĩ wake, nĩ kana tũwone; na ũtao wa Ũla Mũtheu wa Isilaeli ũthengeee na kũka, nĩ kana tũmanye!

20Woo nĩ wa ala metaa ũthũku ũseo, na ũseo ũthũku; ala mekĩaa kĩvindu vandũ va kyeni, na kyeni vandũ va kĩvindu; ala mekĩaa ũũ vandũ va mũyo, na mũyo vandũ va ũũ!

21Woo nĩ wa ala meyonaa me kĩlĩko, na meyonaa me na ũmanyi!

22Woo nĩ wa ala ai ma kũnyw’a mbinyu, na andũ me vinya ma kũvulan’ya kĩla kĩtoonasya;

23ala kwondũ wa ĩvaki matalaa athũku atĩ nĩ alũngalu, na kũmũvena ũla mũlũngalu ũlũngalu wake!

24Kwondũ wa ũu o tondũ ũmũĩ wa mwaki ũvĩvasya mavuthĩ, na tondũ nyeki nyũmũ ivalũkaa ũmũĩnĩ, now’o mĩi yoo ĩkethĩwa ta wou, na malaa moo makaũlũkw’a ta kĩtoo; nĩkwĩthĩwa nĩmaleete mĩao ya Yeova wa nguthu, na kũvũthya ndeto ya Ũla Mũtheu wa Isilaeli.

25Kwondũ wa ũu ũthatu wa Yeova nũmakanĩe andũ make, nake nũmatambũũkĩĩtye kw’oko kwake, na kũmakũna; na iĩma nikũthingithanga, na simba syoo nĩ ta mavuthĩ nzĩanĩ nene katĩ. Ĩndĩ o na ũu w’onthe ũthatu wake ndũnathyũũwa, ĩndĩ kw’oko kwake nĩ kũtambũũku o na yu.

26Nake akookĩlĩlya i mbaĩ kĩvevelo syĩ kũasa, na kũsyuĩsya kĩlũli kuma kĩtulu kya nthĩ; na, sisya, ikooka mĩtũkĩ isembete mũno.

27Vai ũmwe katĩ woo ũkethĩwa na mĩnoo kana kũlulutĩka; vai ũmwe ũkombosya kana kũkoma; o na mĩsivi ya inyunyu syoo ndĩkaleela, kana tũmĩkwa twa iatũ syoo tũĩkatw’ĩka:

28mauumu moo nĩ moĩ, na mata moo onthe nĩ makoote; mavũngũ ma mbalasi syoo makatalwa ta mavia momũ, na ndĩa syoo ta kĩlingi:

29kũluma kwoo kũkethĩwa ta kũluma kwa mũnyambũ mũka, makaluma ta mĩnyambũ ya mũika; ĩĩ, makaluma, na kũkwata sya nzyĩma, na kũkua vate mũisyo, na vaikethĩwa ũmwe wa kũvonokya.

30Na makamalitũkĩla mũthenya ũsu ta kĩlitũko kya ũkanga: na ethĩwa mũndũ akasisya nthĩ, sisya, no kĩvindu na thĩna; na kyeni nĩkĩkĩĩtwe kĩvindu nĩ mathweo maw’o.

← Chapter 4 Jump to: Chapter 6 →