Isaiah 7

Kamba (Mbivilia) 1956

← Chapter 6 Jump to: Chapter 8 →

1Na kweethĩwa mĩthenya ya Aasu mwana wa Yothamu, mwana wa Usia, mũsumbĩ wa Yuta, nĩvo Lesini mũsumbĩ wa Silia, na Veka mwana wa Lemalia, mũsumbĩ wa Isilaeli, mambatie Yelusaleme mokite nayo, ĩndĩ matyaatonya kũmĩkĩlya vinya.

2Na nyũmba ya Ndaviti yataviw’e, yeewa, Silia nĩyĩw’anĩte na Evalaimu. Na ngoo yake yatetema, o na ngoo ya andũ make, o tondũ mĩtĩ yĩ mũtitũnĩ ĩthingithangaw’a nĩ kĩseve.

3Nĩvo ĩndĩ Yeova wamwĩie Isaia, Umaala yu wĩ na Sieali‐yasuvu mwana waku, mũkomanĩe na Aasu mũthyanĩ wa mũtaũ wa ndia yĩ ngalĩ ya ĩũlũ, lelũnĩ ũelete kĩsesinĩ kya mũthambya wa ngũa;

4ũmwĩe, Ĩsũvĩe, noivindya; ndũkakĩe, o na ngoo yaku ndĩkaleele, nũndũ wa isithe isu ilĩ sya isinga syĩ syũki, nũndũ wa ũthatu mwai wa Lesini na Silia, na wa mwana wa Lemalia.

5Nĩkwĩthĩwa Silia, na Evalaimu, na mwana wa Lemalia, nĩmasũanĩĩte ũkwĩka ũthũku, makyasya,

6Twambatei tũkite na Yuta, na kũmĩthĩn’ya, na tũvũthũe vandũ vaitũ va ũlikĩla, na kũsumbĩkya mũsumbĩ katĩ wayo, o mwana wa Taveeli;

7ũũ nĩw’o Mwĩaĩi Yeova ũnũkwasya, Ũndũ ũsu ndũkaũngama, o na ndũkethĩwa.

8Nũndũ mũtwe wa Silia nĩ Ndamasiku, na mũtwe wa Ndamasiku nĩ Lesini; na ĩvinda ya myaka mĩongo thanthatũ na ĩtano Evalaimu akatilangwa tũlungu, o na ndakethĩwa mbaĩ:

9na mũtwe wa Evalaimu nĩ Samalia, na mũtwe wa Samalia nĩ mwana wa Lemalia. Ethĩwa mũtikwĩtĩkĩla, vate ndĩi mũtikalũlũmĩlw’a.

10Na Yeova aneena na Aasu ĩngĩ, akĩmwĩa,

11Mwĩtye Yeova Ngai waku wonan’yo; ĩtya ũlikunĩ, kana ũtũlunĩ ĩũlũ.

12Ĩndĩ Aasu asya, Ndiketya, o na ndikamũtata Yeova.

13Nake asya, Ĩw’ai yu, inyw’ĩ nyũmba ya Ndaviti: Nĩ ũndũ ũnini kwenyu kũmanosya andũ, o na mũkanosya Ngai wakwa nake?

14Kwondũ wa ũu Mwĩaĩi mwene akamũnenga wonan’yo: sisyai, mwĩĩtu mũtheu akaitava, na kũsyaa kavĩsĩ, nako syĩtwa yako akaketa Imanueli.

15Kakaĩsaa mauta na ũkĩ wa nzũkĩ, kũvika yĩla kakamanya kũlea ũthũku, na kũnyuva ũseo.

16Nũndũ kana kau katanamba kũmanya kũlea ũthũku, na kũnyuva ũseo, nthĩ ĩla asumbĩ elĩ mayo ũmathĩthaa, ĩkethĩwa ĩeketwe.

17Yeova akaete ĩũlũ waku, na andũ maku, na nyũmba ya au, mĩthenya ĩla ĩtaamba kũka, kuma mũthenya ũla Evalaimu waumie katĩ wa Yuta — o mũsumbĩ wa Asuli.

18Na kũkethĩwa mũthenya ũsu, Yeova akauĩsya ngi ila syĩ mĩthyanĩ ya mbũsĩ sya Misili, na nzũkĩ ila syĩ nthĩ ya Asuli.

19Nasyo ikooka, na syonthe ikathũmũa myandanĩ mĩthei, na mĩvatĩnĩ ya mavia, na mbiionĩ syonthe syĩ mĩw’a, na isesinĩ syonthe.

20Mũthenya ũsu Mwĩaĩi akeenza mũtwe na maw’ĩa ma maũũ na wenzi ũla wavoyie kũndũ kwĩ mũingo wa ũla Ũsĩ, naw’o nĩ mũsumbĩ wa Asuli; o na ũkamina kĩng’ew’a.

21Na kũkethĩwa mũthenya ũsu, kana mũndũ akaĩthya moi, na malondu elĩ;

22na kũkethĩwa, nũndũ wa wingĩ wa ĩia yasyo akaĩsaa mauta: nũndũ kĩla mũndũ ũla wĩtiwa katĩ wa ĩ nthĩ akaĩsaa mauta na ũkĩ wa nzũkĩ.

23Na kũkethĩwa mũthenya ũsu, kĩla vandũ vala vaĩ mĩsavivũ ngili ya thooa wa sekeli ngili, vakethĩwa mĩtae na mĩw’a.

24Mũndũ akaendaa kw’o na mĩsyĩ na ũta, nũndũ nthĩ yonthe ĩkethĩwa’mĩtae na mĩw’a.

25Na tũlĩma tw’onthe tũla twenziwe na tũlembe, ndũkaenda kw’o nũndũ wa kũkĩa mĩtae na mĩw’a; ĩndĩ vakethĩwa vandũ va kũtwaĩa ng’ombe, na va kũkinyangĩthya malondu.

← Chapter 6 Jump to: Chapter 8 →