Isaiah 28

Kamba (Mbivilia) 1956

← Chapter 27 Jump to: Chapter 29 →

1Woo nĩ wa ngovia ya ũsumbĩ ya ngathĩĩo ya athengi ma Evalaimu, na wa ĩlaa ĩvovu ya ũseo wake wa ndaĩa, yĩla yĩ mũtweni wa mwanda mũnou wa ala mamilĩtwe nĩ mbinyu!

2Sisya, Mwĩaĩi e na ũmwe wĩ na ũtonyi na vinya; o ta kĩuutani kya mbua ya mavia, kĩuutani kĩnene kĩla kyanangaa, ta kĩuutani kya manzĩ me vinya mavingĩte na kũkĩla, akekya nthĩ na kw’oko.

3Ngovia ya ũsumbĩ ya ngathĩĩo ya athengi ma Evalaimu ĩkakinyangwa na nyaĩĩ:

4na ĩlaa ĩvovu ya ũseo wake wa ndaĩa, yĩla yĩ mũtwenĩ wa mwanda mũnou, yĩkeethĩwa ta ĩkũyũ yila yambaa kwĩw’a mũniino ũtanavika; nayo ũla wĩyĩsisya ayona, o yĩ kw’okonĩ kwake akĩya.

5Mũthenya ũsu Yeova wa nguthu akatw’ĩka ngovia ya ũsumbĩ ya ndaĩa, na ngovia ya kwanakava kwa ũtialo wa andũ make;

6na veva wa kũsila katĩ kwa ũla wĩkalaa aisila, na vinya kwa ala matũngaa kaũ wĩ mbingĩlonĩ.

7Ĩndĩ o na aa nao maendaa mailũw’a nĩ mbinyu, na kũlulutĩkaw’a nĩ kĩla kĩtoonasya; mũthembĩ na mwathani malũaw’a nĩ kĩla kĩtoonasya, nĩmameeletw’e nĩ mbinyu, nĩmalulutĩkw’a nĩ kĩla kĩtoonasya; nĩmavĩtasya kwonanĩ kwoo, nĩmalulutĩkaa motw’ĩonĩ moo.

8Nũndũ mesa syonthe nĩsyusũĩtwe nĩ matavĩka na ũvuku, o na vati vandũ vatheu.

9Akamanyĩsya ũmanyi aaũ? Na akamanyĩthya ũvoo aaũ? Nĩ ala maaĩĩtw’e, na kũvatwa kwonga?

10Nũndũ nĩ wĩaĩo ĩũlũ wa wĩaĩo, wĩaĩo ĩũlũ wa wĩaĩo; mũsoa ĩũlũ wa mũsoa, mũsoa ĩũlũ wa mũsoa; vaa ũndũ ũnini, vaya ũndũ ũnini.

11Aiee, ĩndĩ akaneena na andũ aa na ilomo ngeni na ũĩmĩ ũngĩ;

12ala wameie, Ũũ nĩw’o ũthũmũo, mũnengei ũthũmũo ũla ũnoete; na ũũ nĩw’o ũvuũkyo: ĩndĩ matyaaĩw’a.

13Kwondũ wa ũu ndeto ya Yeova ĩkeethĩwa kwoo wĩaĩo ĩũlũ wa wĩaĩo, wĩaĩo ĩũlũ wa wĩaĩo; mũsoa ĩũlũ wa mũsoa, mũsoa ĩũlũ wa mũsoa, vaa ũndũ ũnini, vaya ũndũ ũnini; nĩ kana maende, na kũvalũka na ngala, na kũtũlĩka, na kũtewa, na kũkwatw’a.

14Kwondũ wa ũu ĩw’ai ndeto ya Yeova, inyw’ĩ akaakaan’ya, ala mũsumbĩkaa andũ aa ala me Yelusaleme:

15Nĩkwĩthĩwa nĩmwaĩtye, Nĩtũtianĩĩte ũtianĩo na kĩkw’ũ, na nĩtwĩw’anĩte na Seoli; yĩla ũthĩn’yo wũkĩlanĩtye wĩvĩtĩla katĩ, ndũkatũvikia; nũndũ nĩtwatwie movũngũ wĩvitho witũ, na nĩtweevithie ungu wa ũvũngũ:

16kwondũ wa ũu Mwĩaĩi Yeova easya atĩĩ, Sisya, nĩngwia nthĩnĩ wa Saioni ĩvia yĩthĩwe wambĩlĩlyo, ĩvia ĩtate, ĩvia ya kĩkotonĩ yĩ vata mũno ya wambĩlĩlyo mũlũmu: ũla wĩtĩkĩlaa ndakekalaata.

17Na ngatw’ĩkĩthya ũsili wa katĩ ũlii wa kũthima, na ũlũngalu nĩw’o kavilũ; na mbua ya mavia ĩkatwaa ũla wĩvitho wa movũngũ, na manzĩ makakĩla vandũ va kwĩvitha.

18Na ũtianĩo wenyu ũla mwatianĩe na kĩkw’ũ ũkaanangwa, na wĩw’ano wenyu ũla mweew’anie na Seoli ndũkaũngama; yĩla ũthĩn’yo wũkĩlanĩtye wĩvĩtĩla katĩ, nĩvo ĩndĩ mwĩkinyangwa nĩw’o.

19O yĩla wĩvĩtĩla katĩ, ũkakũkwata; nũndũ ũkavĩtĩla kĩoko na kĩoko, mũthenya na ũtukũ; na kũkeethĩwa no ũtĩsyo mũthei kũmanya ũvoo ũsu.

20Nũndũ ũkomo nĩ mũkuvĩ ũndũ mũndũ ũtatonya kwĩkootea ĩũlũ waw’o; na ngũa ya kwĩvw’ĩka nĩ ntheke ũndũ ũtatonya kwĩlingĩlĩĩla.

21Nũndũ Yeova akookĩla o tondũ wekie kĩĩmanĩ kya Velasimu, na akathilĩka o tondũ wekie mwandanĩ wa Ngiveoni; nĩ kana atethye wĩa wake, wĩa wake mũeni, na kwĩkĩthya wĩko wake, wĩko wake mũeni.

22Kwondũ wa ũu mũtikethĩwe akaakaan’ya, syĩndũ ila mwovetwe nasyo itikese kwongelwa vinya; nũndũ nĩnĩw’ĩte ũtw’ĩo wa wanangĩko kuma kwa Mwĩaĩi, Yeova wa nguthu, ĩũlũ wa nthĩ yonthe.

23Teai matũ, mwĩw’e wasya wakwa; ĩthukĩĩsyei, mwĩw’e kũneena kwakwa.

24Ũla wĩnzaa avande nĩwĩnzaa mavinda onthe? Nĩwũkĩlasya na kũvukũlya nthĩ yake mavinda onthe?

25Amina kwĩanan’ya ũthyũ wayo, ndavuĩaa kesa, na kũvuĩa kumini, na kũvanda nganũ mĩselele, na mbaale kũndũ kũtw’e, na kusemethu mũvakanĩ wayo?

26Nũndũ Ngai wake nũmũmanyĩasya nesa, na kũmwon’ya.

27Nũndũ kesa ndĩvũawa na kĩndũ kyũĩ, o na ndĩa ya ĩkasya ndĩvingilitaw’a ĩũlũ wa kumini; ĩndĩ kesa nĩvũawa na mũvũi, na kumini na mũvũi.

28Nganũ ya kũseũvya kĩmũtũ nĩthiawa; nũndũ ndekwenda kwĩkalaa aimĩvũa mavinda onthe; o na kau ndĩa ya ĩkasya yake na mbalasi syake nimĩnyaĩĩkasya, ndamĩthiaa.

29Ũndũ ũsu naw’o nĩwumĩte kwa Yeova wa nguthu, ũla wa ũseng’yo ũtaonĩ, na mũnene ũĩnĩ.

← Chapter 27 Jump to: Chapter 29 →