Isaiah 24

Kamba (Mbivilia) 1956

← Chapter 23 Jump to: Chapter 25 →

1Sisya, Yeova nũkũmĩtw’ĩkĩthya nthĩ nthei, na kũmyananga, na kũmĩkuluman’ya, na kũnyaĩĩkya ala mamĩtwĩe.

2Na kũkeethĩwa, o tondũ kũilyĩ kwa andũ, now’o kwa mũthembi; o tondũ kũilyĩ kwa mũthũkũmi, now’o kwa vwana wake; o tondũ kũilyĩ kwa mwĩĩtu mũthũkũmi, now’o kwa vivi wake; o tondũ kũilyĩ kwa ũla ũthooaa, now’o kwa mũthoosya; o tondũ kũilyĩ kwa ũla ũkovethasya, now’o kwa ũla ũkovethaw’a; o tondũ kũilyĩ kwa ũla wosaa ũtandĩthyo, now’o kwa ũla ũmũtandĩthĩasya.

3Nthĩ ĩkatw’ĩka nthei vyũ, na ĩkaanangwa vyũ; nũndũ Yeova nũneenete ndeto ĩno.

4Nthĩ nĩnĩũmeta na kũthelekelya, nthĩ yonthe nĩnĩũleela na kũthelekelya, andũ me na wĩng’athĩlĩlyo kũũ nthĩ nĩmeũleela.

5Nthĩ nayo nĩvukĩtw’e ĩtheo wa ala mamĩtũaa; nĩkwĩthĩwa nĩmavĩtĩtye mĩao, na kũlea myamũlo, na kũtũla ũtianĩo wa tene na tene.

6Kwondũ wa ũu kĩumo nĩkĩminĩte nthĩ, na ala mamĩtwĩe nĩmekwoneka me avĩtan’ya: kwondũ wa ũũ ala matwĩe nthĩ nĩmavĩtĩtw’e, no andũ avũthũ matiele.

7Mbinyu mbĩthĩ nĩnĩũmeta, mũsavĩvũ nũũvova, na onthe ala matanĩte ngoo nĩmeũvevũũka.

8Ũtanu wa tũthembe nũũvindya, kĩlonzo kya ala matanaa nĩkĩũthela, ũtanu wa mbeve nũũvindya.

9Matikanyw’a mbinyu makina wathĩ; kĩla kĩtoonasya kĩkeethĩwa kĩ ũũ kwa ala makĩnyusaa.

10Ndũa nthei nĩomboetwe; kĩla nyũmba nĩvingĩtwe, mũndũ o na wĩva ndakalike.

11Ve kĩĩo nzĩanĩ nene nũndũ wa ĩla mbinyu; ũtanu w’onthe nũtw’ĩkĩte kĩvindu, ũtanu wa nthĩ nũthelete.

12Nthĩnĩ wa ndũa kũtiĩtwe ĩanzo, na mbingĩlo nĩ ngũne nĩ wanangĩko.

13Nũndũ kũkeethĩwa ũu katĩ wa nthĩ katĩ wa ngo sya andũ, ta kũthingithangw’a kwa mũthata, ta mothean’yo yĩla ngetha ya mũũnda wa mũsavivũ yathela.

14Asu nĩmakokĩlya mawasya moo, makanĩĩsya; kwondũ wa ũnene wa Yeova nĩmokĩlasya wasya mũnene me ũkanganĩ.

15Kwondũ wa ũu mũtaĩei Yeova wumĩlonĩ wa syũa, o syĩtwa ya Yeova, Ngai wa Isilaeli, ithamanĩ syĩ ũkanganĩ.

16Kuma kĩtulunĩ kya nthĩ nĩtwĩw’ĩte mbathi: Ndaĩa kwa ala alũngalu. Ĩndĩ nasya, Nĩngũsonzoma, nĩngũsonzoma, woo nĩ wakwa! Ala nzeleke nĩmekĩte ũseleke; ĩĩ, ala nzeleke nĩmekĩte ũseleke mũno.

17W’ĩa, na ĩima, na kĩtei, nikwoveesye, we ũla ũtwĩe nthĩ.

18Na kũkeethĩwa, ũla ũsembaa akĩĩte kĩlonzo kya w’ĩa akavalũka ĩimanĩ; na ũla wĩĩyumya ĩimanĩ nthĩnĩ akakwatw’a nĩ kĩtei: nũndũ mbũthi syĩ ĩũlũ nivingũĩtwe, na myambĩlĩlyo ya nĩnĩũtetema.

19Nthĩ nĩ ndũlĩkangu, nthĩ nĩ mbatũkangu, nthĩ nĩthingithĩkĩte na vinya.

20Nthĩ ĩkalũalũa ta mũthengi, na ĩkasũa kũũ na kũũ ta mũsũo; na ĩvĩtyo yayo yĩkeethĩwa ĩito ĩũlũ wayo, na ĩkavalũka, na ndĩkokĩla ĩngĩ.

21Na kũkethĩwa mũthenya ũsu, Yeova akakũna nguthu ya ala me ĩũlũ vandũ vatũlu, na asumbĩ ma nthĩ kũũ nthĩ.

22Na makoombanw’a vamwe, tondũ ala ove mombanaw’a kasũmbanĩ ke nthĩnĩ wa nthĩ, na makavingĩwa kolokolonĩ; na mĩthenya mingĩ yathela makasilĩlwa.

23Nĩvo ĩndĩ mwei ũkavũavũana, na syũa yĩkasonoka; nũndũ Yeova wa nguthu akasumbĩka kĩĩmanĩ kya Saioni, naku Yelusaleme; na mbee wa atumĩa make kũkeethĩwa ndaĩa.

← Chapter 23 Jump to: Chapter 25 →