Isaiah 10

Kamba (Mbivilia) 1956

← Chapter 9 Jump to: Chapter 11 →

1Woo nĩ wa ala matusaa motw’ĩo mate malũngalu, na wa aandĩki ala maandĩkaa mong’endu;

2masiĩĩe athĩni sila wa katĩ, na kũvuta ngya sya andũ makwa kĩla kyoo, nĩ kana aka ndiwa methĩwe mũtavo woo, na nĩ kana matw’ĩkĩthye ala makw’ĩĩwe nĩ aaĩthe mũtavo woo!

3Inyw’ĩ mũkeeka ata mũthenya wa kũsilĩlwa, na wanangĩkonĩ ũla wĩũka kuma kũasa? Mũkakĩĩa kwa ũũ mwone ũtethyo? Na mũkatia ndaĩa yenyu va?

4Nde vo nyie makeekunamya nthĩ ĩtheo wa ala ove, na kũvalũka ĩtheo wa ala oai. Ĩndĩ o na ũu w’onthe ũthatu wake ndwaalyũlwa, ĩndĩ kw’oko kwake nĩ kũtambũũku o na yu.

5We Mũasuli, ndata ya ũthatu wakwa, ndata ĩla nthĩnĩ wa kw’oko kwaku ve kũthilĩka kwakwa!

6Ngamũtũma okite na mbaĩ mbuku, na ngamwĩaĩa ũndũ wa andũ ma ũthilĩku wakwa, atave mũtavo, na ose sya mbuta, na kũmakinyanga ta ndaka nzĩanĩ nene.

7Ĩndĩ ndeĩsĩ ũu, o na ngoo yake ndĩũsũanĩaa ũu; ĩndĩ ngoonĩ yake kwĩ ũvoo wa kwananga, na kũveta mbaĩ mbingĩ.

8Nũndũ easya, Anene makwa onthe me mbee ũsumbĩnĩ ti asumbĩ?

9Kalino ti ta Kalikemisi? Amathi ti ta Alivati? Samalia ti ta Ndamasiku?

10Tondũ kw’oko kwakwa kwonete mosumbĩ ma mĩvw’anano, ala mĩvw’anano yamo myasũvye nĩvĩtũkĩte ĩla ya Yelusaleme na ya Samalia;

11ndikeka Yelusaleme na mĩvw’anano yayo o tondũ neekie Samalia na mĩvw’anano yayo?

12Kwondũ wa ũu kũkeethĩwa, kana, o yĩla Mwĩaĩi ũkethĩwa aminĩte wĩa wake w’onthe kĩĩmanĩ kya Saioni na Yelusaleme, nyie ngakũna ũsyao wa ngoo yĩ vinya ya mũsumbĩ wa Asuli, na ũnene wa mũsyaĩlye wa mĩng’athĩlĩlyo.

13Nũndũ nũneenete, Kwondũ wa vinya wa kw’oko kwakwa nĩnĩkĩte ũu, na kwondũ wa ũĩ wakwa; nũndũ nĩ na ũmanyi: na nĩnĩthamĩtye mĩvaka ya ngo sya andũ, na kũtava mothwii moo maie, na ta mũndũ ngũmbaũ nĩnĩtheeetye ala mekalaa ivĩlanĩ sya ũsumbĩ:

14na kw’oko kwakwa nĩkwonete mothwii na ngo sya andũ ta ndala; na tondũ mũndũ wũmbanasya matumbĩ ala matiĩtwe, now’o nũmbanĩtye nthĩ yonthe: na vatyaĩ ũmwe ũla waavaalalya ũthwau, kana kwathamya kanyw’a, kana kũnyiila.

15Ĩthoka yĩkamwĩkathĩĩĩa ũla ũtemaa nayo? Ĩng’weli yĩkamwĩnenevesya ũla ũtethasya wĩa nayo? Nĩ ta kwasya ndata ĩkatethya wĩa na ala mamyũkĩlasya, kana ndata ĩkamũkĩlya mwene nake ti mũtĩ.

16Kwondũ wa ũu Mwĩaĩi, Yeova wa nguthu, akamaetee ala anou make ũmosu; na ĩtheo wa ũnene wake kũkakanw’a yekethe ta yekethe ya mwaki.

17Na kyeni kya Isilaeli kĩkeethĩwa mwaki, na Ũla Mũtheu wake akeethĩwa ũmũĩ wa mwaki; na ũkavĩvya na kũmina mĩw’a yake na mĩtae yake mũthenya ũmwe.

18Nake akamina ndaĩa ya mũtitũ wake, na ya mũũnda wake ũla ũsyaaa mũno, thayũ na mwĩĩ vamwe: na kũkeethĩwa kũilyĩ ta yĩla mũkui wa kĩvevelo ũnyalaa.

19Na mĩtĩ ya mũtitũ wake ĩla yĩtiala ĩkeethĩwa ĩte mingĩ, ũndũ kana katonya kũandika ũtalo wayo.

20Na kũkethĩwa mũthenya ũsu, atĩ ũtialo wa Isilaeli, na ala avonoku ma nyũmba ya Yakovo, matikamwĩkwatya ĩngĩ ũla wamakũnie, ĩndĩ makamwĩkwatya Yeova, Ũla Mũtheu wa Isilaeli, na w’o.

21Ũtialo, naw’o nĩ ũtialo wa Yakovo, ũkamũsyokea Ngai ũla wĩ vinya.

22O na kau andũ maku, Isilaeli, nĩ aingĩ ta kĩthangathĩ kya ũkanga, no ũtialo woo ũkasyoka: wanangĩko nũtw’ĩtwe, wusũĩte ũlũngalu.

23Nũndũ wĩanĩu wa wanango, naw’o nĩ ũla ũtw’ĩtwe, Mwĩaĩi, Yeova wa nguthu, akawĩanĩsya katĩ wa nthĩ yonthe.

24Kwondũ wa ũu Mwĩaĩi, Yeova wa nguthu, easya atĩĩ, Inyw’ĩ andũ makwa ala mũtwĩe Saioni, mũtikakĩe Mũasuli, o na ethĩwa emũkũna na ndata, na ũmũkĩlĩlya ndata yake, o tondũ kweekiwe Misili.

25Nũndũ no kavinda kanini mũno, na ũthilĩku ĩũlũ waku ũkeanĩw’a, na ũthatu wakwa ũkamũvikĩa anangwe.

26Na Yeova wa nguthu akamũkĩlĩlya mũsalisa, o tondũ kweekiwe kũawanĩ kwa Mitiani ĩvianĩ ya Olevi: na ndata yake ĩkeethĩwa ĩũlũ wa ũkanga, na akamyũkĩlya o tondũ kweekiwe Misili.

27Na kũkethĩwa mũthenya ũsu, mũio wake ũkauma kĩtuonĩ kyaku, na ĩsoki yake yĩkauma ngingonĩ yaku, na ĩsoki yĩkaanangwa kwondũ wa ũnou.

28Nũvikĩte Aiathi, nũvĩtĩle Mikiloni katĩ; nĩwiĩte mĩio yake ku Mikimasi;

29nĩmakĩlĩle ũingĩloni; nĩmatw’ĩkĩthĩtye Ngeva vandũ voo va ũkoma; Lama nĩnĩũtetema; Ngivea ya Saulo nĩkĩĩte.

30Ua mbu na wasya waku, we mwĩĩtu wa Ngalimu! Ĩthukĩĩsye, we Laisa! We Anathothi ya kũmakĩwa!

31Matimena nĩ mũkĩi; ala matwĩe Ngevimu nĩmeũkĩĩa vandũ vate mũisyo.

32Mũnthĩ ũũ akaũngama ku Novu: nũnũũkĩtukangĩa kw’oko kwake kĩĩma kya mwĩĩtu wa Saioni, nakyo nĩ kĩĩma kya Yelusaleme.

33Sisya, Mwĩaĩi, Yeova wa nguthu, akatema mbonge na wai: na ala aasa makavalũkw’a, na ala me na wĩng’athĩlĩlyo makatheew’a.

34Na akatema ikuthu syĩ mũtitũnĩ na kĩaa, na Levanoni ĩkavalũkw’a nĩ ũla wĩ ũtonyi.

← Chapter 9 Jump to: Chapter 11 →