Isaiah 2

Kamba (Mbivilia) 1956

← Chapter 1 Jump to: Chapter 3 →

1Ndeto ĩla Isaia mwana wa Amosu wonie ũndũ wa Yuta na Yelusaleme.

2Na kũkeethĩwa mĩthenya ya mũminũkĩlyo, kana kĩĩma kĩ nyũmba ya Yeova kĩkekalaa kĩ kĩtũlu kwĩ ila ingĩ, na kũkĩla ĩũlũ wa tũlĩma; na mbaĩ syonthe ikakĩendeaa.

3Na ngo nyingĩ sya andũ ikaenda na kwasya, Ũkai inyw’ĩ, twambate kĩĩmanĩ kya Yeova, nyũmbanĩ ya Ngai wa Yakovo; nake akatũmanyĩsya nzĩa syake, na tũkaendaa nzĩanĩ syake: nũndũ mĩao ikauma Saioni, na ndeto ya Yeova ĩkauma Yelusaleme.

4Na akasilan’ya mbaĩ, na kũtw’ĩĩa andũ ma ngo mbingĩ; na makatusya mbyũ syoo itw’ĩke mĩthya ya maembe ma ng’ombe, na matumo moo tũvyũ twĩ ngoto twa kũsea; mbaĩ ndĩkokĩlĩlya mbaĩ ũvyũ, o na itikemanyĩsya kaũ ĩngĩ.

5Inyw’ĩ nyũmba ya Yakovo, ũkai, tũende kyeninĩ kya Yeova.

6Nũndũ nũtiĩte andũ maku nyũmba ya Yakovo, nĩkwĩthĩwa nĩmausũĩtwe nĩ syĩthĩo ila syumĩte ngalĩ ya wumĩlonĩ wa syũa, nao nĩ ala mathanaa maũndũ ta Avilisiti, na nĩmakũnanĩaa kĩthalũ na syana sya andũ ma nthĩ ĩngĩ.

7Na nthĩ yoo nĩyusũĩte vetha na thaavu, o na kũti mũminũkĩlyo wa mothwii moo maie; o na nthĩ yoo nĩyusũĩte mbalasi, o na kũti mũminũkĩlyo wa makasya moo ma kaũ.

8O na nthĩ yoo nĩyusũĩte mĩvw’anano; nĩmathaithaa wĩa wa moko moo ene, ũla waseũviw’e nĩ syaa syoo.

9Na mũndũ ũte nguma nũkwĩkunamya, na mũndũ mũnene nũkwĩnyivya: kwondũ wa ũu ndũkamaekee.

10Lika ĩvianĩ, na ĩvithe kĩtoonĩ, kuma mbee wa ũtisyo wa Yeova, na ũtheu mũtisu wa ũnene wake.

11Mũsyaĩlye wa ngathĩĩo wa mũndũ ũkanyivw’a, na wĩng’athĩlĩlyo wa andũ ũkatheew’a, na Yeova e weka akethĩwa mũnene mũthenya ũsu.

12Nũndũ kũkeethĩwa mũthenya wa Yeova wa nguthu ũla wĩũkĩa kyonthe kĩla kĩ na ngathĩĩo na wĩng’athĩlĩlyo, na kyonthe kĩla kyũkĩlĩte; na kikatheew’a;

13na ĩũlũ wa mĩkũũ yonthe ya Levanoni, ĩla mĩasa na mĩtũlu, na myaloni yonthe yĩ Mbasani

14na ĩũlũ wa iĩma syonthe ndũlu, na tũlĩma tw’onthe tũtũlu,

15na ĩũlũ wa kĩla mwako mũtũlu wa mũnyoolo, na kĩla ũvai mwiie,

16na ĩũlũ wa ngalawa syonthe sya Talisisi, na mĩvw’anano yonthe yendeeasya.

17Na wĩnenevyo wa mũndũ ũkanyivw’a, na wĩng’athĩlĩlyo wa andũ ũkatheew’a; na Yeova e weka akethĩwa mũnene mũthenya ũsu.

18Na mĩvw’anano ĩkaaa vyũ.

19Na andũ makalika ngunganĩ sya mavia, na maimanĩ ma nthĩ, maume mbee wa ũtĩsyo wa Yeova, na ũtheu mũtisu wa ũnene wake, yĩla wĩũkĩla athingithangye nthĩ na vinya.

20Mũthenya ũsu andũ makekĩsya mbuko na mbuvu mĩvw’anano yoo ya vetha, na mĩvw’anano yoo ya thaavu, ĩla maseũvisye mamĩthaithae;

21malike ngunganĩ sya mavia, na mĩvatĩnĩ ya mavia matũkangu, maume mbee wa ũtĩsyo wa Yeova, na ũtheu mũtisu wa ũnene wake, yĩla wĩũkĩla athingithangye nthĩ na vinya.

22Taanĩsyai na mũndũ, ũla mĩthũmũ yake yĩ manyiũũnĩ make; nũndũ we atalawa kĩndũ ũndũnĩ wĩva?

← Chapter 1 Jump to: Chapter 3 →