Isaiah 58

Kamba (Mbivilia) 1956

← Chapter 57 Jump to: Chapter 59 →

1Neena na wasya mũnene, ndũkaeke, ũkĩlya wasya waku ta soo, noitavya andũ makwa ĩvĩtyo yoo, na nyũmba ya Yakovo naĩ syayo.

2Ĩndĩ nĩmamanthaa nyie kĩla mũthenya, na nĩmendeeaw’a nĩ kũmanya nzĩa syakwa: nĩmangũlasya mosilĩlo malũngalu, ta mbaĩ ĩla yekaa ũlũngalu, na ĩtaatia ũtw’ĩo wa Ngai wayo; nĩmatanĩaa kũmũthengeea Ngai.

3Nĩmeũkũlya, Tũtĩĩaa kũya nĩkĩ, naku ndwonaa? Tũthĩnĩasya thayũ witũ kĩ, naku ndũũsisya? Sisyai, mũthenya wa kũtĩĩa ũya kwenyu nĩmũkwĩtanĩthya inyw’ĩ ene, na athũkũmi menyu onthe nĩmũmaingĩĩasya wĩa.

4Sisyai, nĩmũtĩĩaa ũya na mũikananĩa na kũtetan’ya, na kũkũnangana ngundi sya ũthũku: mũtikũtĩĩa ũya ũmũnthĩ nĩ kana wasya wenyu wĩw’ĩke ĩũlũ.

5Ku nĩkw’o kũtĩĩa ũya kũla nĩnyuvĩte? Mũthenya wa mũndũ kũthĩn’ya ngoo yake? Nĩ kũkunamya mũtwe wake ta malula, na kwalan’ya makunia na mũu ungu wake? Ũkeeta ku kũtĩĩa ũya, na mũthenya wĩtĩkĩlawa nĩ Yeova?

6Kũtĩĩa ũya kũla nĩnyuvĩte ti kũũ: kũthasya syĩndũ sya kwovwa nasyo sya ũthũku, na kũthasya mĩkwa ya ĩsoki, na kũthasya ala mathĩnaw’a maende, na kũtũla kĩla ĩsoki?

7Tĩ kũmanenga lĩu waku ala me na nzaa, na kũete nyũmbanĩ yaku ngya ila ilũngĩtw’e? Na yĩla wĩona ũla mũthei, ũmũvw’ĩke; na kũlea kwĩvitha ala ma nyũmba yaku?

8Nĩvo ĩndĩ kyeni kyaku kĩkakenaa ta kĩoko, na kũvow’a kwaku kũkaumĩla mĩtũkĩ; na ũlũngalu waku ũkaendaa mbee waku; ndaĩa ya Yeova ĩkakũatĩĩaa ĩtina waku.

9Nĩvo ĩndĩ wĩĩtana, na Yeova akĩtĩka; ũkamwĩkaĩla, nake akasya, Ninyioo. Ethĩwa ũkaveta katĩ waku ĩsoki, na kwolota na kyaa, na kũneena ũthũku;

10na ethĩwa ũkaumya ngoo yaku ũmwĩw’ĩe tei ũla wĩ na nzaa, na kũvũn’ya ũla ũthĩnaw’a: nĩvo ĩndĩ kyeni kyaku kĩũkĩla kĩvindunĩ, na kĩvindu kyaku kĩkĩthĩwa ta mũthenya katĩ;

11na Yeova akakũtongoeasya ĩndĩ yonthe, na akavũnĩsya thayũ waku kũndũ kũmũ, na kwĩkĩa mavĩndĩ maku vinya; na ũkeethĩwa ta mũũnda mũnyithye, na ta mbuluti ya manzĩ, ĩla manzĩ mayo matinyivaa o na indĩĩ.

12Na ala makethĩwa kwaku makaaka kũndũ kwanangĩkie tene; ũkookĩlya myambĩlĩlyo ya nzyawa nyingĩ; naku ũkeetwa Mũseũvya wa vala vavũthũiwe, Mũtũngĩĩi wa nzĩa sya kwĩkalawa.

13Ethĩwa ũkatũnga kũũ kwaku kũeke mũthenya wa savato, ũte kwĩka kwenda kwaku mũthenya wakwa mũtheu; na ĩndĩ ũkeeta savato wa kũtanĩthya, na mũthenya mũtheu wa Yeova wa kũtaĩwa; na ũkootaĩa, ũkĩlea nzĩa syaku, kana kũmantha ũtanu waku mwene, kana kũneena ndeto syaku mwene:

14nĩvo ĩndĩ wĩĩtanĩthya nthĩnĩ wa Yeova; na ngakwambatya kũndũ kũtũlu kwa nthĩ; na ngakũĩthya na ũtiĩwa wa ĩthe waku Yakovo: nũndũ kanyw’a wa Yeova nũneenete ũu.

← Chapter 57 Jump to: Chapter 59 →