Isaiah 37

Kamba (Mbivilia) 1956

← Chapter 36 Jump to: Chapter 38 →

1Na kweethĩwa, yĩla mũsumbĩ Esekia wewie ũu, atembũanga ngũa syake, na eekĩa makunia, na alika nyũmbanĩ ya Yeova.

2Na atũma Eliakimu, ũla waĩ mũsyaĩĩsya wa andũ ma nyũmba, na mũandĩki Sevina, na atumĩa athembi, kwa mwathani Isaia mwana wa Amosu, mekĩĩte makunia.

3Nao mamwĩa, Ũũ nĩw’o Esekia ũnũkwasya, Ũmũnthĩ nĩ mũthenya wa thĩna, na wa ũkanw’a, na wa kũvũthw’a; nũndũ twana nĩtũvikĩte ĩvinda ya kũsyawa, na vati vinya wa kũsyaa.

4Nokwĩthĩwa Yeova Ngai waku akeew’a ndeto sya Lavi‐sake, ũla mũsumbĩ wa Asuli vwana wake ũmũtũmĩte amũvũthĩĩsye Ngai wĩ thayũ, na akakan’ya ndeto ila Yeova Ngai waku wĩw’ĩte: kwondũ wa ũu ũkĩlya mboya yaku kwondũ wa ũtialo ũla ũtialĩte.

5Kwondũ wa ũu athũkũmi ma mũsumbĩ Esekia mavika kwa Isaia.

6Na Isaia amea, Ũũ nĩw’o mwĩmũtavya vwana wenyu, Ũũ nĩw’o Yeova ũnũkwasya, Ndũkakĩe ndeto ila wĩw’ĩte, ila athũkũmi ma mũsumbĩ wa Asuli manumangĩte nasyo.

7Sisya, ngeekĩa veva nthĩnĩ wake na akeew’a maũvoo, na akasyoka nthĩ yake mwene; na ngatuma avalũkĩlw’a na ũvyũ nthĩ yake mwene.

8Kwondũ wa ũu Lavi‐sake asyoka, na amwĩthĩa mũsumbĩ wa Asuli aiũkita na Livina; nũndũ aĩ aneew’a kana nĩwumĩte vu Lakisi.

9Na nĩwewie kũineenwa ũndũ wa Tiliaka mũsumbĩ wa Ethiovia, Nĩwumaalĩte okite naku. Na yĩla wewie ũu, atũma atũmwa kwa Esekia, akyasya,

10Ũũ nĩw’o mwĩmũtavya Esekia mũsumbĩ wa Yuta, mũkĩmwĩa, Ngai waku ũla ũmwĩkwatasya ndakakũkenge, aikwĩa, Yelusaleme ndĩkanenganwe kw’okonĩ kwa mũsumbĩ wa Asuli.

11Sisya, nĩwĩw’ĩte ũndũ asumbĩ ma Asuli mekĩte nthĩ syonthe, ũndũ wa kũsyananga vyũ: naku ũkavonoka?

12Ngai sya mbaĩ nĩsyaivonokisye, ila aasa makwa masyanangie, Ngosani, na Aalani, na Lesevu, na ana ma Eteni ala maĩ Telasali?

13Aĩva mũsumbĩ wa Amathi, na mũsumbĩ wa Alivati, na mũsumbĩ wa ndũa ya Sevalivaimu, na ya Ena, na ya Iva?

14Na Esekia oosa valũa kuma mokonĩ ma ala matũmiwe, na oosoma; na Esekia ambata alika nyũmbanĩ ya Yeova, na ootambũũkĩsya mbee wa Yeova.

15Na Esekia amũvoya Yeova, akyasya,

16Ame Yeova wa nguthu, Ngai wa Isilaeli, ũla wĩkalaa ĩũlangũ wa akeluvi, nue Ngai, o we wĩ weka, wa mosumbĩ onthe ma nthĩ; nue woombie ĩtu na nthĩ.

17Tea kũtũ kwaku, ame Yeova, wĩw’e; salukya metho maku, ame Yeova, wone; ĩw’a ndeto syonthe sya Senakelivu, ũla ũtũmanĩte avũthĩĩsye Ngai wĩ thayũ.

18Nĩ w’o, Yeova, asumbĩ ma Asuli nĩmanangĩte nthĩ syonthe, o na mĩũnda yasyo,

19na nĩmekisye ngai syasyo mwakinĩ: nũndũ ityaĩ ngai, ĩndĩ nĩ wĩa wa moko ma andũ, mĩtĩ na mavia; kwondũ wa ũu nĩmasyanangĩte.

20Yu kwondũ wa ũu, ame Yeova Ngai waitũ, tũtangĩĩe kuma kw’okonĩ kwake, nĩ kana mosumbĩ onthe ma nthĩ mamanye atĩ nue Yeova, o we wĩ weka.

21Nĩvo ĩndĩ Isaia mwana wa Amosu watũmanie kwa Esekia, akyasya, Ũũ nĩw’o Yeova, Ngai wa Isilaeli, ũnũkwasya, Nĩkwĩthĩwa nũmboyete ũndũ wa Senakelivu mũsumbĩ wa Asuli,

22ĩno nĩyo ndeto ĩla Yeova ũneenete ũndũ wake: Mwĩĩtu mũtheu wa Saioni nũkũvũthĩtye na nũkũthekeete mũno; mwĩĩtu wa Yelusaleme nũkũthingithangĩĩtye mũtwe wake.

23Nũũ ũla ũvũthĩĩtye na kũmũumanga? Na nũũ ũla ũmũkĩlĩlye wasya waku na kũmũkĩlĩlya metho maku ĩũlũ? No Ũla Mũtheu wa Isilaeli.

24Nũvũthĩĩtye Mwĩaĩi na makanyw’a ma athũkũmi maku, na waĩtye, Nĩnambatĩte iĩmanĩ ĩũlũ nĩ na wingĩ wa makasya makwa, kũvika Levanoni nthĩnĩ; na ngatũla mĩkũũ mĩasa ya vo, na mĩtĩ ya mĩsonovali mĩseo ya vo; na ngalika vala vatũlu mbee, o mũtitũnĩ wa mũũnda wa vo ũla ũsyaaa mũno;

25nĩnĩnzĩte na kũnyw’a manzĩ, na ngang’alĩthya mbũsĩ syonthe sya Misili na nyaĩĩ syakwa.

26Ndwaaĩw’a ũndũ neekie ũndũ ũsu tene mũno, na naseũvya ũu kuma tene tene? Na yu nĩnoovĩtũkĩthisye, atĩ nĩ ũndũ waku kwananga ndũa mbiie syĩthĩwe ivumbu sya moomboe.

27Kwondũ wa ũu ala maitwĩe maĩ na vinya mũnini, mateva na mathokoana; mailyĩ ta nyeki sya kĩsesi, na nyũnyi nziũ, ta nyeki nyũmbanĩ ĩũlũ, na ta mũũnda wa lĩu wa mbaa ngetha ũtanamba kwĩana.

28Ĩndĩ nĩnĩsĩ kwĩkala nthĩ kwaku, na kumaala kwaku, na kũlika kwaku, na kũnthilĩkĩla kwaku.

29Nũndũ wa kũnthilĩkĩla, na nĩkwĩthĩwa wĩnenevyo waku nũvikĩte matũnĩ makwa, kwondũ wa ũu ngeekĩa kavoloi kakwa manyiũũnĩ maku, na mũkwa wakwa ilomonĩ syaku, na ngakũthyũũa ũsyoke na nzĩa ĩla ũnesĩle.

30Na ũũ ũkeethĩwa wonan’yo kwaku: mwaka ũũ mũkaya metĩkĩa, na mwaka wa kelĩ mathongooo mamo; na mwaka wa katatũ vandai, na mũiketha, na vandai mĩũnda ya mĩsavivũ, mũye ũsyao wayo.

31Na ũtialo ũla mũvonoku wa nyũmba ya Yuta ũkatambũũkya mĩi ĩngĩ ĩlikĩte na nthĩ, na kũsyaa ũsyao welekele ĩũlũ.

32Nũndũ ũtialo ũkauma Yelusaleme, na ala avonoku makauma kĩĩmanĩ kya Saioni. Kĩwĩu kya Yeova wa nguthu kĩkeanĩsya ũndũ ũsu.

33Kwondũ wa ũu Yeova easya ũndũ wa mũsumbĩ wa Asuli, Ndakalika ndũanĩ ĩno, o na ndakamĩkya mũsyĩ, o na ndakoka mbee wayo na ngao, o na ndakamyũmbĩĩa kĩvumbu.

34Na nzĩa ĩla ũnookie nayo, akasyokela o yo, na ndakalika ndũanĩ ĩno, easya ũu Yeova.

35Nũndũ ngasesea ndũa ĩno nĩmĩtangĩĩe, kwondũ wakwa mwene, na kwondũ wa mũthũkũmi wakwa Ndaviti.

36Na mũlaĩka wa Yeova aumaala, na akũna andũ ngili ĩana na mĩongo nyanya na itano mwakonĩ wa maeema wa Aasuli; na yĩla andũ maamũkie kĩoko tene, sisya, asu onthe maĩ simba.

37Na kwondũ wa ũu Senakelivu mũsumbĩ wa Asuli ookĩla, na aenda na asyoka kwake, na atũa Nineva.

38Na kweethĩwa, aithaitha nyũmbanĩ ya Nisiloki ngai yake, Atalameleki na Saleseli ana make mamũkũna na ũvyũ; na maindũka mathi nthĩ ya Alalati. Na Esali‐atoni mwana wake asumbĩka vandũ vake.

← Chapter 36 Jump to: Chapter 38 →