Isaiah 19

Kamba (Mbivilia) 1956

← Chapter 18 Jump to: Chapter 20 →

1Ndeto ngito ũndũ wa Misili. Sisya, Yeova nũendete akuĩtwe nĩ ĩthweo yĩendaa mĩtũkĩ, kũvika Misili: na mĩvw’anano ya Misili ĩkathingithangĩa mbee wake; na ngoo ya Misili ĩkatweka nthĩnĩ wayo.

2Na ngookĩlya Amisili mokite na Amisili: na makokita kĩla ũmwe na mwana‐a‐inyia, na kĩla ũmwe na mũtũi wake; ndũa ĩkokita na ndũa, na ũsumbĩ na ũsumbĩ.

3Na veva wa Misili ũkathelekela nthĩnĩ wayo; na ngaananga ũtao wayo; na makamantha ũtethyo kwa mĩvw’anano, na kwa eki ma syama, na kwa ala mesene na maveva, na kwa ala mombasya ithitũ.

4Na nganengane Amisili kw’okonĩ kwa mwĩaĩi mũthũku; na mũsumbĩ mwai akamasumbĩka, easya ũu Mwĩaĩi, Yeova wa nguthu.

5Na manzĩ makanyiva ũkanganĩ, na ũla ũsĩ ũkang’ala wũme vyũ.

6Na mbũsi ikanyunga naĩ; na mĩtaũnĩ mĩnene manzĩ makanyiva na kũng’ala; mĩangi na makangaa makavova.

7Nyeki yĩ vakuvĩ na ũsĩ wa Naelo, mwaĩĩonĩ wa Naelo, na kw’onthe kũla kũvandĩtwe vakuvĩ na Naelo, kũkooma, na kũvetwa, na kũikethĩwa kw’o ĩngĩ.

8Na atei ma makũyũ makaĩa, na onthe ala mekasya itei ũsĩnĩ wa Naelo makameta, na ala malanasya itei sya makũyũ manzĩnĩ ĩũlũ makaaa vinya.

9Na ĩngĩ ala matethasya wĩa na ndii nzanũe sya katane, na ala matumaa ngũa nzaũ, makathokoanw’a.

10Na ituĩ sya Misili ikatũlangwa ilungu; onthe ala matethasya wĩa wa ũtuvwa makeew’a woo ngoonĩ syoo.

11Anene me mbee ũsumbĩnĩ ma Nzoani nĩ atumanu vyũ; ũtao wa atai ala oĩ mbee ma Valao nũtw’ĩkĩte ta wa nyamũ: mwĩmwĩa Valao ata, Nyie nĩ mwana wa ala oĩ, mwana wa asumbĩ ma tene tene?

12Andũ maku oĩ maĩva ĩndĩ? Makũtavye yu; nĩmamanye ũndũ Yeova wa nguthu ũsũanĩĩte wa Misili.

13Anene me mbee ũsumbĩnĩ ma Nzoani nĩmatw’ĩkĩte ndia, ala me mbee ũsumbĩnĩ wa Memivisi nĩmakengetwe; nĩmatumĩte Misili yaa, asu ĩvia ya kĩkotonĩ ya mbaĩ syayo.

14Yeova nũvulanĩtye veva wa ũng’endu nthĩnĩ wayo; na nĩmatumĩte Misili yaa kĩla wĩanĩ wayo, o ta mũndũ ũnyw’ĩte ailũalũa matavĩkanĩ make.

15O na kũikethĩwa wĩa o na wĩva wa Misili, ũla mũtwe kana kĩsithe, ĩthangũ ya mĩtende kana malula, ikatonya kwĩka.

16Mũthenya ũsu Amisili makethĩwa mailyĩ ta aka; na makatetema na kũkĩa nũndũ wa kũtukangĩwa kw’oko nĩ Yeova wa nguthu, kũla wĩmatukangĩa.

17Na nthĩ ya Yuta ĩkatw’ĩka ũtĩsyo kwa Misili; kĩla ũmwe ũla wĩĩw’a ĩkĩwetwa akakwatwa nĩ w’ĩa, nũndũ wa ũtw’ĩo wa Yeova wa nguthu, ũla ũmĩtw’ĩĩe.

18Mũthenya ũsu kũkethĩwa ndũa itano nthĩ ya Misili ila ineenaa kĩthyomo kya Kanaani, na kũmwĩvĩtĩa Yeova wa nguthu; ĩmwe ĩkeetwa Ndũa ya wanangĩko.

19Mũthenya ũsu kũkethĩwa kĩthembeo kwondũ wa Yeova katĩ wa nthĩ ya Misili, na kĩtuĩ mũvakanĩ wayo kwondũ wa Yeova.

20Na ũu ũkethĩwa wonan’yo na ũkũsĩ kwa Yeova wa nguthu nthĩ ya Misili; nũndũ makamwĩkaĩla Yeova nũndũ wa athĩn’ya, nake akamaetee mũtangĩĩi, na mũsesei, na akamavonokya.

21Na Yeova akamanyĩka Misili, na Amisili makamũmanya Yeova mũthenya ũsu; ĩĩ, makathaitha na kũete nthembo ya kũtonywa na mĩthĩnzĩo, na makamwĩvĩtĩa Yeova wĩvĩto, na kũwĩanĩsya.

22Na Yeova akakũna Misili, kũkũna na kũvosya; na makamũsyokea Yeova, nake akeesũvĩka nĩo, na akamavosya.

23Mũthenya ũsu kũkethĩwa lelũ kũma Misili kũvika Asuli, na Mũasuli akathi Misili, na Mũmisili akathi Asuli; na Amisili makathaitha vamwe na Aasuli.

24Mũthenya ũsu Isilaeli akethĩwa wa katatũ we na Misili na Asuli, ũathimo katĩ wa nthĩ;

25nũndũ Yeova wa nguthu nũmaathimĩte, akyasya, Nĩ aathime Misili andũ makwa, na Asuli wĩa wa moko makwa, na Isilaeli ũtiĩwa wakwa.

← Chapter 18 Jump to: Chapter 20 →