Isaiah 30

Kamba (Mbivilia) 1956

← Chapter 29 Jump to: Chapter 31 →

1Woo nĩ wa syana ng’endu, easya Yeova, ila ĩsũanĩaa maũndũ, ĩndĩ ti kuma kwakwa, na ila iseũvasya wĩw’ano, ĩndĩ ti wa Veva wakwa, nĩ kana syongelele naĩ ĩũlũ wa naĩ;

2ila ikũasya itheee Misili, na ityaakũlya kanyw’anĩ wakwa; syĩyĩkĩe vinya vinyanĩ wa Valao, na syĩvithe muunyĩnĩ wa Misili!

3Kwondũ wa ũu vinya wa Valao ũkeethĩwa nthoni syenyu, na wĩvitho muunyĩnĩ wa Misili kũthokoanw’a kwenyu.

4Nũndũ anene moo me mbee ũsumbĩnĩ ma Nzoanĩ, na atũmwa moo mavikĩte Anise.

5Onthe makasonoka nũndũ wa andũ ala matatonya kũmauna, ala mate ũtethyo kana ũuno, ĩndĩ nthoni, o na ũvũthyo.

6Ndeto ngito ũndũ wa nyamũ sya ngalĩ ya Ĩtheo. Mavĩtĩlaa nthĩ ya thĩna na woo, vala vaumaa mũnyambũ mũka na mũnyambũ, nzoka mbai na nzoka ĩũlũkaa ĩilyĩ mwaki, makĩkua mothwii moo ituonĩ sya ndena sya mang’oi, na mothwii moo ngathĩnĩ sya ngamĩle, mamatwaĩe andũ ala matakamauna.

7Nũndũ ũtethyo wa Misili nĩ wa mana, na ndwaĩlaa; kwondũ wa ũu nĩnĩmĩtĩte Misili Laavi, mwĩkali wa nthĩ.

8Yu enda, ũandĩke ĩsengeanĩ mene, na ũivana ĩvukunĩ, nĩ kana wĩthĩwe wa ĩvinda yĩla yũkĩte tene na tene.

9Nũndũ nĩ andũ ang’endu, syana ila ineenaa movũngũ, syana ila ileaa kwĩthukĩĩsya mĩao ya Yeova;

10ila itavasya ala monaa mawoni, Ekai kwona; na athani, Ekai kũtwathanĩa maũndũ ma w’o, tũtavye maũndũ maseo, athanai mokengani,

11umai nzĩanĩ, athũkai nzĩanĩ, mũekethyei Ũla Mũtheu wa Isilaeli ndakethĩwe mbee waitũ.

12Kwondũ wa ũu Ũla Mũtheu wa Isilaeli easya atĩĩ, Nĩkwĩthĩwa nĩmũvũthasya ndeto ĩno, na kwĩkwatya ũndũ wa kũthĩn’ya na wa ngũlũ, na kwĩlũmya nthĩnĩ wamo;

13kwondũ wa ũu ũthũku ũsu ũkeethĩwa kwenyu ta vandũ vatũku vakilĩlye kũvalũka, vandũ veeku ũvainĩ mũtũlu, ũla kũvalũka kwaw’o kwĩũka na mĩtũkĩ ta kĩthũlũmũko.

14Na akamyananga o tondũ mũio wa mũmbi wũaawa, akyũvevenza vate kũsũvĩa; nĩ kana kũikoneke katĩ wa ilĩo syaw’o kalĩo ka kwoka mwaki ikonĩ, kana ka kũtava manzĩ kĩthimanĩ.

15Nũndũ ũũ nĩw’o Mwĩaĩi Yeova, Ũla Mũtheu wa Isilaeli, waisye, Kũsyokanĩ na kũthũmũanĩ mũkatangĩĩwa; ũuunĩ na wĩkwatyonĩ kũkeethĩwa vĩnya wenyu. Na inyw’ĩ mũtyaaĩtĩkĩla:

16ĩndĩ mwasya, Aiee, ĩndĩ tũkakĩa tũkuĩtwe nĩ mbalasi; kwondũ wa ũu mũkakĩa: na mwasya, Tũkaenda tũtũlĩte ila syĩ mĩtũkĩ; kwondũ wa ũu ala makamũatĩĩa makeethĩwa me mĩtũkĩ.

17Ngili ĩmwe ĩkakĩa ũndũ wa kũkandĩwa nĩ ũmwe; ũndũ wa kũkandĩwa nĩ atano inyw’ĩ mũkakĩa: kũvika mwĩtiwa ta mũtĩ mũasa kĩĩmanĩ ĩũlũ, na ta kĩvevelo kalĩmanĩ.

18Na kwondũ wa ũu Yeova aketeela, nĩ kana amwĩke nesa; na kwondũ wa ũu akanenevw’a, nĩ kana amwĩw’ĩe tei: nũndũ Yeova nĩ Ngai ũla ũsilaa katĩ; nĩ aathime onthe ala mamweteelaa.

19Nũndũ andũ makekala Saioni ku Yelusaleme; ndũkaĩa ĩngĩ; vate ndĩi akakwĩka nesa ũndũ wa wasya wa kĩĩo kyaku; yĩla wĩĩw’a akakũsũngĩa.

20O na ethĩwa Mwĩaĩi nũkũnengae lĩu wa thĩna na manzĩ ma woo, ĩndĩ amanyĩsya maku matikavithwa ĩngĩ, ĩndĩ metho maku makoona amanyĩsya maku;

21na matũ maku makeew’a ndeto ĩtina waku, ĩkyasya, Nzĩa nĩ ĩno, endaai nayo; yĩla mwĩathũka kw’oko kwa aũme, na yĩla mwĩathũka kw’oko kwa aka.

22Na mũkavukya kĩla kĩvw’ĩkĩte mĩvw’anano yaku ya vetha, na kwanakavw’a kwa mĩvw’anano yaku ya thaavu ĩla yaseũviw’e na syĩndũ ila syatwekethiw’e: ũkamĩkya kũasa ta kĩndũ kĩvuku; ũkootavya, Uma vaa.

23Nake akanenganae mbua kwondũ wa mbeũ syaku, ila wĩvanda nthĩ; na lĩu wa ũsyao wa nthĩ, na ũkeethĩwa mũnou na mwingĩ. Mũthenya ũsu indo syaku ikaĩthaw’a isesinĩ nene;

24o ta ũu ng’ombe na ndena sya mang’oi ila iĩmaa nthĩ ikaĩsaa lĩu wĩ mũsamo, ũla ũũlũkĩtw’e na mwĩko na kĩũlũkya.

25Na ĩũlũ wa kĩla kĩĩma kĩtũlu, na ĩũlũ wa kĩla kalĩma katũlu, kũkeethĩwa tũlũsĩ na mbũsĩ sya manzĩ, mũthenya wa ũaani mũnene, yĩla myako mĩtũlu ya mĩnyoolo ĩvalũka.

26O na ũndũ ũngĩ kyeni kya mwei kĩkatw’ĩka ta kyeni kya syũa, na kyeni kya syũa kĩkeethĩwa kũndũ mũonza, ta kyeni kya mĩthenya mũonza, mũthenya ũla Yeova wĩova ĩkũna ya andũ make, na kũvosya ĩkũna ya wũkite woo.

27Sisya, syĩtwa ya Yeova nĩyũkĩte kuma kũasa, yakanĩte na ũthatu wake, nthĩnĩ wa syũki yingĩ yĩkyũkĩla: ilomo syake nĩsyusĩe ũthilĩku, na ũĩmĩ wake nĩ ta mwaki ũvĩvasya;

28na mĩthũmũ yake nĩ ta ũsĩ ũvingĩte ũkakĩla, ũla ũvikaa ngingonĩ, asunge mbaĩ na kĩsungi kya wanangĩko: na mũkwa ũla ũvĩtĩthasya ũkeethĩwa ngambuunĩ sya ngoo sya andũ.

29Mũkeethĩwa na wathi o ta ũtukũ yĩla mũlilikanaa mboka ntheu; na ũtanu wa ngoo, ta yĩla mũndũ ũendaa na mũtũlilũ avike kĩĩma kya Yeova, kũvika Ĩvia ya Isilaeli.

30Na Yeova akatuma wasya wake mũseo wĩw’ĩka, na akoonan’ya kũtheesya kwa kw’oko kwake, vamwe na kũthilĩka kwa ũthatu wake, na kĩtw’ĩki kya mwaki ũla ũvĩvasya, na wanango, na kĩuutani, na mbua na mavia.

31Nũndũ kwondũ wa wasya wa Yeova Mũasuli akateva; akamũkũna na ndata yake.

32Na kĩla ĩkũna ya ndata nyuve, yĩla Yeova wĩmũkũna, yĩkeethĩwa vamwe na wasya wa tũthembe na mbeve; na akokita nao kaũnĩ wa kũthingithangya.

33Nũndũ Tovethi nĩvaseũviw’e kuma tene; ĩĩ, nĩvaseũviw’e ũndũ wa mũsumbĩ; nũseũvĩtye vethĩwe valiku na vanene; ĩvuvĩo ya vo nĩ mwaki wĩ ngũ nyingĩ; mĩthũmũ ya Yeova, ta kalũsĩ ka mũvĩlĩtĩ, nĩnĩkwakan’ya.

← Chapter 29 Jump to: Chapter 31 →