Isaiah 51

Kamba (Mbivilia) 1956

← Chapter 50 Jump to: Chapter 52 →

1Mbĩthukĩĩsyai, inyw’ĩ ala mũvikĩlaa ũlũngalu, inyw’ĩ ala mũmanthaa Yeova; sisyai ĩvia vala mwasũviw’e; na ĩima ĩliku vala mwenziwe.

2Sisyai Avalaamu ĩthe wenyu na Sala ũla wamũsyaie ĩnyw’ĩ; nũndũ yĩla waĩ o ũmwe nĩnamwĩtie, na namũathima, na namũtw’ĩkĩthya aingĩ.

3Nũndũ Yeova nũkiakiĩtye Saioni; nũkiakiĩtye kũndũ kwayo kw’onthe kwanangĩku, na nũtw’ĩkĩthĩtye weũ wayo ta Eteni, na yalata yayo ta mũũnda wa Yeova; ũtanu na mũyo ũkooneka nthĩnĩ wayo, na kũtũnga mũvea, na wasya mũseo.

4Mbĩthukĩĩsyai, inyw’ĩ andũ makwa; ngunũĩai matũ, we mbaĩ yakwa: nũndũ mwĩao ũkauma kwakwa, na ngalũmya ũsili wakwa wa katĩ wĩthĩwe kyeni kya ngo sya andũ.

5Ũlũngalu wakwa wĩ vakuvĩ, ũtangĩĩo wakwa nĩwumaalĩte, na moko makwa makasilĩla ngo sya andũ; ithama ikambeteela, na ikeekwatya kw’oko kwakwa.

6Ũkĩlyai metho menyu mũsisye matu, na sisyai nthĩ ĩtheo; nũndũ matu makaaa ta syũki, na nthĩ ĩkakũa ta ngũa; na ala mamĩtwĩe makakw’a o ta ũu: ĩndĩ ũtangĩĩo wakwa ũkeethĩwa tene na tene, na ũlũngalu wakwa ndũkathela.

7Mbĩthukĩĩsyai, inyw’ĩ ala mwĩsĩ ũlũngalu, andũ ala mwĩao wakwa wĩ ngoonĩ syenyu; mũtikakĩe kĩvũthya kya andũ, o na mũikateve ũndũ wa kũumana kwoo.

8Nũndũ lungulu ũkamaya ta ngũa, na kĩinyu kĩkamaya ta w’ĩa wa ĩlondu; ĩndĩ ũlũngalu wakwa ũkeethĩwa tene na tene, na ũtangĩĩo wakwa kũvika nzyawa syonthe.

9Amũka, amũka, ĩkĩa vinya, we kw’oko kwa Yeova, amũka, o ta mĩthenya ya tene, nzyawa sya tene tene. Tuue ũla watilangile Laavi ilungu, na ũla watonyie mũkũnga?

10Tuue ũla wang’alilye ũkanga, manzĩ ma syũngũ nene; na ũla watw’ĩkĩthisye moliku ma ũkanga nzĩa ya ala moovoiw’e maingĩle?

11Na ala ovosye ma Yeova makasyoka, na kuka Saioni makina; na ũtanu ũtathelaa ũkeethĩwa mĩtwenĩ yoo: makeethĩwa na mũyo na ũtanu; na kũmaka na kũvevũũka kũkakĩa.

12Nyie, o nyie; ninyie ũla ũkũkiakiasya; nue ũũ, ũndũ ũkĩaa mũndũ ũla ũkakw’a, na mwana wa mũndũ ũla ũkatw’ĩkĩthw’a ta nyeki;

13na nĩwũlĩtwe nĩ Yeova Mũmbi waku, ũla watambũũkisye matu, na wambĩlĩlye myambĩlĩlyo ya nthĩ; na nũkĩaa mũthenya w’onthe mavinda onthe nũndũ wa ũthatu mwai wa mũthĩn’ya, yĩla wĩyũmbanasyai anange? Na ũthatu mwai wa mũthĩn’ya ũĩva?

14Mũndũ ũla ũtavĩtwe akalũngw’a kwake akathaw’a mĩtũkĩ; na ndakakw’a na kũtheea yĩla ĩimanĩ, o na lĩu wake ndũkanyiva.

15Nũndũ ninyie Yeova Ngai waku, ũla wũkĩlangasya ũkanga, ũkethĩa itulumo syaw’o nĩlitũkaa: Yeova wa nguthu nĩyo syĩtwa yake.

16Na nĩnĩkĩĩte ndeto syakwa kanyw’anĩ waku, na nĩnĩkũvw’ĩkĩte muunyĩnĩ wa kw’oko kwakwa, nĩ kana nĩlũmye matu, na kwambĩlĩlya myambĩlĩlyo ya nthĩ, na kũtavya Saioni, Nue andũ makwa.

17Amũka, amũka, ũngama, we Yelusaleme, ũla ũnyw’ĩte kw’okonĩ kwa Yeova kĩkombe kya kũthilĩka kwake; we nũnyw’ĩte kĩkombe kĩnene kya kũlũsya, na ũkakĩmina.

18Vati ũmwe katĩ wa ana make onthe ala wasyaie wa kũmũtongoesya; o na vati ũla ũmũkwataa kw’oko katĩ wa ana onthe ala waeie.

19Maũndũ aa elĩ nĩmekĩkĩte kwaku; nũũ ũla wĩkũmetea? Wanango na wanangĩko, na yũa na ũvyũ; ngakũkiakisya ata?

20Ana maku nĩmanyalile, nĩmakomete wambĩlĩlyonĩ wa nzĩa syonthe, ta ngondi kĩteinĩ; nĩmausũĩtw’e kũthilĩka kwa Yeova, ũkan’yo wa Ngai waku.

21Kwondũ wa ũu yu ĩw’a ũũ, we ũla ũthĩnĩtw’e, na ũla ũmilĩtwe, ĩndĩ ti ũndũ wa mbinyu:

22Mwĩaĩi waku Yeova na Ngai waku, ũla ũteteaa ũvoo wa andũ make, easya atĩĩ, Sisya, nĩnĩkyumĩtye kw’okonĩ kwaku kĩla kĩkombe kya kũlũsya, o kĩkombe kĩnene kya kũthilĩka kwakwa; ndũkakĩnyw’a ĩngĩ:

23na ngakĩkĩa mokonĩ ma ala makũthĩnasya, ala matavĩtye thayũ waku, Kunama, nĩ kana tũvĩte; naku nĩwiĩte mũongo waku wĩthĩwe ta nthĩ, na wĩthĩwe ta nzĩa nene kwa ala mavĩtĩlaa vo.

← Chapter 50 Jump to: Chapter 52 →