bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (Mbivilia) 1956
/
Luke 1
Luke 1
Kamba (Mbivilia) 1956
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 2 →
1
Nĩkwĩthĩwa andũ aingĩ nĩmatatie kũandĩka ũvoo wa maũndũ ala meanĩiw’e katĩ waitũ,
2
na matũnengie ithyĩ, nũndũ maĩ ngũsĩ sya kwona na metho, na athũkũmi ma ĩ ndeto kuma mwambĩlĩlyonĩ,
3
na nĩkwĩthĩwa nĩneekuũĩte nesa vala maũndũ asu onthe maumie, nĩnonete nĩ ũseo nyie ngũandĩkĩe nĩatĩanĩsye, Theovilo mũtaĩwa;
4
nĩ kana ũmanye w’o wa maũndũ ala wamanyĩiw’e.
5
Tene, ĩvinda ya Elote mũsumbĩ wa Yutia, kwaĩ mũthembĩ ũmwe ũla wetawa Nzakalia, wa nguthu ya Aviya: na mũka wake aĩ wa mbaĩ ya Aluni, na syĩtwa yake eetawa Elisavethi.
6
Nao elĩ maĩ alũngalu mbee wa Ngai, makĩendeea mĩaonĩ yonthe na motw’ĩonĩ onthe ma Mwĩaĩi matyaailĩĩlĩka ũthũku.
7
Nao matyaĩ na kana, nũndũ Elisavethi aĩ ngũngũ, na me elĩ maĩ akũu.
8
Na ĩndĩ kweethĩwa, yĩla watethasya wĩa wa ũthembi mbee wa Ngai kũatĩanĩa na nguthu yake,
9
o ũndũ kwĩkawa wĩanĩ wa ũthembi, malimana, na atw’ĩka wa kũlika ĩkalũnĩ ya Mwĩaĩi atoeesye ũvani.
10
Na ĩkomano yonthe yekalĩte nza yĩkĩvoya ĩvinda ya kũtoeesya ũvani.
11
Na aumĩlĩlwa nĩ mũlaĩka wa Mwĩaĩi, mũlaĩka aũngeme ngalĩ ya kw’oko kwa aũme kwa kĩthembeo kya kũtoeesya ũvani.
12
Na Nzakalia amwona aũũya, na akwatwa nĩ w’ĩa.
13
Ĩndĩ ũla mũlaĩka amwĩa, Ndũkakĩe, Nzakalia: nĩkwĩthĩwa kũvoya kwaku nĩkwĩw’ĩkĩte, na mũka waku Elisavethi akakũsyaĩa kana kavĩsĩ, na ũkaketa syĩtwa yako Yoana.
14
Naku ũkeethĩwa na ũtanu na mũyo; na aingĩ makeew’a mũyo nũndũ wa kũsyawa kwako.
15
Nĩkwĩthĩwa akethĩwa e mũnene methonĩ ma Mwĩaĩi, na mbinyu kana kĩla kĩtoonasya ndakanyw’a; o na kuma ĩvunĩ ya nyinyia akeethĩwa ausũĩtwe nĩ Veva Mũtheu.
16
Na akamaalyũla aingĩ ma ana ma Isilaeli melekele Mwĩaĩi Ngai woo.
17
Nake akatongosya mbee wake na veva na vinya wa Eliya, athyũũe ngoo sya aaĩthe syelekele syana, na alei mathi nthĩnĩ wa ũĩ wa ala alũngalu; kũmũmbanĩsya Mwĩaĩi andũ ala mamũseũvĩw’e.
18
Na Nzakalia amũkũlya mũlaĩka, Ngamanya ata ũndũ ũũ? Nĩkwĩthĩwa nĩ mũkũu nyie, na mũka wakwa nĩ mũkũu.
19
Na mũlaĩka amũsũngĩa, amwĩa, Ninyie Kavilieli, ũla ũũngamaa mbee wa Ngai; nakwa ndũmiwe nũke kũneena naku, na ngũetee ũvoo ũũ mũseo.
20
Na sisya, nũkũkilya na ndwĩtonya kũneena, kũvika mũthenya ũla maũndũ asu makekĩka, nũndũ ndũnaĩkĩĩa ndeto syakwa, ila ikeanĩw’a ĩvinda yasyo.
21
Na andũ mamweteela Nzakalia, na maseng’a nũndũ wa kwĩkala kwake ĩkalũnĩ.
22
Nake yĩla waumaalile, ndaatonya kũneena nao: na mamanya nĩwona woni ĩkalũnĩ: na aneena namo na moko, na ekala atatonya kũneena.
23
Na kweethĩwa, yĩla matukũ meanĩie ma ũthũkũmi wake, athi nyũmba kwake.
24
Na ĩtina wa matukũ asu Elisavethi mũka wake aitava; na eevitha myei ĩtano, akyasya,
25
Ũũ nĩw’o Mwĩaĩi ũmbĩkĩte mĩthenya ĩla wanzyaĩĩsye, ambetee ntheko yakwa andũnĩ.
26
Na mwei wa thanthatũ mũlaĩka Kavilieli atũmwa nĩ Ngai ndũa ya Kalilii, ĩla yĩtawa Nasaleti,
27
kwa mwĩĩtu ũla wevaĩtw’e nĩ mũndũ wetawa Yosevu, wa mbaĩ ya Ndaviti; na syĩtwa ya mwĩĩtu ũsu nĩ Meli.
28
Na mũlaĩka athi vala waĩ, na amwĩa, Wakya, ũla wonew’e ũseo mũno, Mwĩaĩi e vamwe naku.
29
Nake aũũya mũno nũndũ wa ndeto isu, na asũanĩa ũndũ ngethi ĩsu ĩtilyĩ.
30
Na mũlaĩka amwĩa, Eka ũkĩa, Meli: nũndũ nĩwonew’e ũseo kwa Ngai.
31
Na sisya, ũkaitava, na ũkasyaa kana kavĩsĩ, na ũkaketa syĩtwa yako Yesũ.
32
Nake akethĩwa e mũnene, na aketawa Mwana wa Ũla Wĩ Ĩũlũ wa Onthe: na Mwĩaĩi Ngai nũkamũnenga kĩvĩla kya ũsumbĩ kya ĩthe wake Ndaviti:
33
nake nũkasumbĩka mbaĩ ya Yakovo tene na tene; na ũsumbĩ wake ndũkethĩwa na mũminũkĩlyo.
34
Na Meli amũkũlya mũlaĩka, Ũndũ ũũ ũkeekĩka ata, nakwa ndyĩsĩ mũndũ mũũme?
35
Na mũlaĩka amũsũngĩa, amwĩa, Veva Mũtheu akooka ĩũlũ waku, na vinya wa Ũla Wĩ Ĩũlũ wa Onthe akakwĩkĩa muunyĩ: kwondũ wa ũu kĩla kĩtheu kĩsyawa kĩketawa Mwana wa Ngai.
36
Na sisya, Elisavethi ũla wa mbaĩ yaku, nũitavĩte kavĩsĩ nake nĩ mũkũu; na ũũ nĩ mwei wa thanthatũ wake ũla wetawa ngũngũ.
37
Nĩkwĩthĩwa kwa Ngai vai ũndũ ũtatonyeka.
38
Na Meli asya, Sisya, nyie nĩ ngombo ya Mwĩaĩi; nĩwĩthĩwe kwakwa o ta ndeto syaku. Na mũlaĩka amũtia athi.
39
Na matukũ asu Meli ookĩla athi mĩtũkĩ nthĩ ĩla yĩ iĩma, ndũanĩ ĩmwe ya Yutia;
40
na avota nyũmbanĩ ya Nzakalia amũkethya Elisavethi.
41
Na kweethĩwa, yĩla Elisavethi wewie ngethi ya Meli, kana kathaka ĩvunĩ yake; na Elisavethi ausũwa nĩ Veva Mũtheu;
42
na ookĩlya wasya wake aneena mũno, akyasya, Nũathimĩtwe we katĩ wa aka, na ũsyao wa ĩvu yaku nũathimĩtwe.
43
Ũndũ ũũ nata kwakwa, kana inyia wa Mwĩaĩi wakwa ambũkĩe?
44
Nũndũ sisya, yĩla ngethi yaku yalika matũnĩ makwa, kana nĩkathaka nĩ mũyo ĩvunĩ yakwa.
45
Na kũathimwa nĩ ũsu ũla wetĩkĩlile; nũndũ maũndũ ala wataviw’e nĩ Mwĩaĩi makeanĩw’a.
46
Na Meli asya atĩĩ, Ngoo yakwa nĩnĩũmũtaĩa Mwĩaĩi,
47
Na veva wakwa nũmũtanĩe Ngai, Mũtangĩĩi wakwa.
48
Nĩkwĩthĩwa asyaĩtye ũnini wa ngombo yake: Nũndũ sisya, kuma yu nzyawa syonthe ikambĩtaa mũathime.
49
Nĩkwĩthĩwa ũla wĩ vinya nũmbĩkĩte maũndũ manene; Na syĩtwa yake nĩ ĩtheu.
50
Na tei wake nũkwoneka nĩ nzyawa na nzyawa Kwa ala mamũkĩaa.
51
Nĩwonanĩtye vinya na kw’oko kwake; Na nũmanyaĩĩkĩtye ala mekwĩng’athĩlĩlya mavindyonĩ ma ngoo syoo.
52
Ala anene nũmaumĩtye ivĩlanĩ sya ũsumbĩ, Na nũmanenevetye ala anini.
53
Ala me na nzaa nũmavũnĩtye na maũndũ maseo; Na ala athwii nũmalũngĩtye me athei.
54
Nũmatethetye Isilaeli, mũthũkũmi wake, Nĩ kana alilikane kũmwĩw’ĩa tei
55
Avalaamu na ũsyao wake tene na tene (O tondũ waneenie na aaĩthe maitũ).
56
Na Meli ekala nake ta myei ĩtatũ, na asyoka kwoo.
57
Na matukũ ma Elisavethi meanĩa ma ũsyaa; na asyaa kana kavĩsĩ.
58
Na atũi make na andũ ma mbaĩ yake meew’a ũndũ Mwĩaĩi wamwingĩvĩsye tei; matana vamwe nake.
59
Na ĩndĩ kweethĩwa mũthenya wa nyanya, mooka kwaĩka kana; na menda kũketa Nzakalia, ta syĩtwa ya ĩthe wako.
60
Ĩndĩ inyia wako asũngĩa, akyasya, Aiee, ti w’o; nĩketwe Yoana.
61
Na mamwĩa, Kwa mbaa au vai wĩ na syĩtwa yĩu.
62
Na mamũneen’ya ĩthe wako na moko, amon’ye ũndũ ũnũkwenda ketwe.
63
Nake ametya kĩndũ kya ũandĩka, na aandĩka, Syĩtwa yako nĩ Yoana. Na onthe maseng’a.
64
Na oyu kanyw’a wake wavingũwa, na ũĩmĩ wake wathaw’a, nake aneena, akĩmũkatha Ngai.
65
Na onthe ala maĩ ũtũinĩ makwatwa nĩ w’ĩa na maũndũ asu manyaĩĩkw’a nthĩ yonthe ya Yutia ĩla yĩ iĩma.
66
Na onthe ala meewie maũndũ asu mamaia ngoonĩ syoo, makyasya, Kana kau kakethĩwa kailyĩ ata? Nũndũ kw’oko kwa Mwĩaĩi kwaĩ vamwe nako.
67
Na Nzakalia ĩthe wako ausũwa nĩ Veva Mũtheu, na athana, akyasya,
68
Mwĩaĩi, Ngai wa Isilaeli, nakathwe; Nũndũ nũmokĩe andũ make na kũmovosya,
69
Na nũtũkĩlĩlye ũvya wa ũtangĩĩo Nyũmbanĩ ya Ndaviti, mũthũkũmi wake
70
(Tondũ waneenie na makanyw’a ma athani make atheu ala maĩ kw’o kuma tene),
71
Ũtangĩĩo kuma amaithanĩ maitũ, o na mokonĩ ma onthe ala matũmenaa;
72
Amon’ye aasa maitũ tei, Na kũlilikana ũtianĩo wake mũtheu;
73
Wĩvĩto ũla wevĩtĩe asa waitũ Avalaamu,
74
Kana, twavonoka mokonĩ ma amaitha maitũ, akatũnenga ithyĩ Kũmũthũkũma tũte na w’ĩa,
75
Twĩ na ũtheu na ũlũngalu kwake mĩthenya yaitũ yonthe.
76
Naku we, kana, ũkeetawa mwathani wa Ũla Wĩ Ĩũlũ wa Onthe: Nũndũ ũkatongosya mbee wa Mwĩaĩi ũmũseũvĩsye nzĩa syake;
77
Na kũnenga andũ make ũmanyi wa ũtangĩĩo Kwondũ wa kũekewa naĩ syoo,
78
Nũndũ wa ĩnee ĩnene ya Ngai waitũ, Yĩla kwondũ wayo kyeni kya kũikya kyumĩte ĩũlũ nĩkĩtũvikĩe,
79
Kĩmamulĩke ala mekalaa kĩvindunĩ na kyuunĩ kya kikw’ũ; Kĩtũtongoesye maũũ maitũ nzĩanĩ ya mũuo.
80
Na kana kaneneva, kakyongelwa vinya vevanĩ, na kekalaa kũla kũte andũ kũvika mũthenya wa kumĩla kwake kwa Isilaeli.
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 2 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24