Ezekiel 13

Kalenjin Bible (BUKUIT NE TILIL)

← Chapter 12 Jump to: Chapter 14 →

1Ak kinyonja ng’olyotab Jehovah kolenja,

2Ee weritab chi, maotenji igirinde maotikab Israel che maoteni, ak ilenji ichek che maoteni eng’ mugulelwekwak ichegei, Ogas ng’olyotab Jehovah:

3Mwaei Kiptaiyat Jehovah ko u ni kole: Bwa maotik che berber, che isubi tamirmirikwak ichegei, ak ko tom kogeer kiy!

4Ee Israel, kigoigei maotiguk lelwek eng’ ong’atosiek.

5Ma otogoste obe ole kigobutok, ama ong’ot gotab Israel, si kobiit kotonon eng’ boriet eng’ betutab Jehovah.

6Kigogeer ichek tangoita ak ng’orset ne bo lembech, che mwaei kole, Kale Jehovah; ama iyokte Jehovah: ak kogochi bik komang’ kole kigimiti ng’olyot.

7Tos ma ogeer ng’ang’utiet ne bo buch, ama omwa ng’orset ne bo lembech, ye omwae ole, Kale Jehovah: ago ma amwa kiy?

8Mwaei anyun Kiptaiyat Jehovah ko u ni kole: Amu kiomwa eng’ tangoita, ak ogeer lembech, ogeer anyun, aborienok, mwaei Kiptaiyat Jehovah.

9Ak koborie eunnyu maotik che keerei tangoita, ak che ng’orei lembechek: matebe kapkiruogetab bikyuk, ama kisirjin bukuit ole kisirjin gotab Israel, ama bendi emetab Israel; si onai ole a Kiptaiyat Jehovah.

10Ee, amu kigoberber bikyuk, kolenji, Kalyet; ama mi kalyet; ak ye teech chito inatut, ogeero, male tartarik che ma miachen:

11mwachi ichek che malse tartarichuto ilenji, Lulei: biitu ropta ne o; ak korobon koik che eechen che bo ropta; ak kobet usonet ne o inatunato.

12Ogeero, ye lul inatunato, ko tos magiteebenok kele, Mi ano malset ne kigomale inatunito?

13Mwaei anyun Kiptaiyat Jehovah ko u ni kole: Abete inatunito eng’ usonet ne o eng’ neregekyuk che ng’wonen; ak kobiit ropta ne o eng’ neregekyuk, ak koik che eechen che bo ropta eng’ neregekyuk che ng’wonen, si kobiit koges.

14Abute anyun inatut ne kiomale tartarik che ma miachen, ak aluul kot kotook lumeiywekyik: ak kobut, ak kigeswok eng’ kwenunnyi; si onai ole a Jehovah.

15Ayae anyun neregekyuk che ng’wonen kosulda eng’ inatunato, koboto ichek che kimale tartarichato; ak alenjok, Ma komi inatut, anan ichek che kimalei;

16choto ko maotikab Israel che maoteni agobo Jerusalem, ak kogeerei ng’ang’utikab kalyet agobo nganasanato, ama mitei kalyet, mwaei Kiptaiyat Jehovah.

17Ee inye weritab chi, iuuiit togeng’ung’ igirinde tibikab biguk, che maoteni eng’ mugulelwekwak ichegei; ak imaoten agobo ichek,

18ak ilenji, Mwaei Kiptaiyat Jehovah ko u ni kole: Bwa kwonyik che nabei lolotinwekab ndaresik che bo kutung’oik tugul che bo eunek, ak konab angok che bo metit, che yamei chi age tugul si kobiit koriige sobonwekab bik! Tos oriiche sobonwekab bikyuk, ak osoru sobonwekab bik kobunjok?

19Ak kiong’wanita eng’ bikyuk agobo sairik che bo rubeito ak kererutikab makatinik, si obar sobonwekab bik che ma nyoljin kobek, ak osoru sobonwekab bik che ma nyoljin kosopcho amu lembechekwok che omwachini bikyuk che chamei kogas lembechechoto.

20Mwaei anyun Kiptaiyat Jehovah ko u ni kole: Ogeero, aweche lolotinwekab ndaresikwok, che oriige sobonwekab bik ko u taritik, ak agereri tuguchoto eng’ eunekwok; ak atiach sobonwechoto bo bik koba, sobonwechoto oriiche ko u taritik.

21Agereri angokwok agichek, ak asoru bikyuk komong’ eng’ eunekwok, si ma kotebe eunekwok kogeny si keriichei; si onai ole a Jehovah.

22Amu kiogochi muguleldab chi ne bo iman koarogen eng’ lembechek, chito ne ma agochi koarogen; ak ogimit eunekab kiptengekyot, si maweek kometo orennyi ne ya, ak kesor kosob:

23ma ogeere anyun tangoita, anan ong’orse; ak asoru bikyuk komong’ eng’ eunekwok; si onai ole a Jehovah.

← Chapter 12 Jump to: Chapter 14 →