Ezekiel 20 — Kalenjin Bible (BUKUIT NE TILIL)

1Ak eng’ kenyit ne bo tisab, eng’ arawetab mut, betut ne bo taman ne bo arawanato, kobwa boisiek alage che bo Israel kobwa koteepse Jehovah, ak koteb ng’ony eng’ tainnyu.

2Ak kinyonja ng’olyotab Jehovah, kolenja,

3Weritab chi, ng’alalji boisiekab Israel, ilenji, Mwaei Kiptiyat Jehovah ko u ni kole, Kaobwa oteepsena? Mwaei Kiptaiyat Jehovah kole, Ko u ye asobe, ko machame oteepsena.

4Tos iruokyini ichek, ee weritab chi, tos iruokyini ichek? Iborji ichek konai tuguk che kiwechei che bo kwanisiekwak;

5ak ilenji, Mwaei Kiptaiyat Jehovah ko u ni kole: Eng’ betut ne kialewen Israel, ak ayogochi eunnyu iyotetab gotab Jakobo, ak aborjige ichek eng’ emetab Misri, ye kiayogochi eunnyu ichek alenji, A Jehovah Kamuktaindeng’wong’;

6kiayogochi eunnyu ichek eng’ betunoto, amutu ichek komong’ eng’ emetab Misri kobwa emet ne kiamararji ichek, ne nyiitat chego ak kumik, ne torornatetab emotinwek tugul:

7ak kiamwachi ichek alenji, Ingometo chi age tugul eng’ okwek tuguk che kiwechei che kochamei konyekyik, amat ong’wanitege kanamonikab Misri: a Jehovah Kamuktaindeng’wong’.

8Ago kiingelelja, ma cham kogasa it; ma meto chi age tugul eng’ ichek tuguk che kiwechei che kichamei konyekwak, ama meto kanamonikab Misri: amwa anyun ale, Arong’jini ichek neregekyuk che ng’wonen, si kobiit ayai neregekyuk kosulda eng’ ichek eng’ emetab Misri.

9Ago kiaboisie amu kainennyu, si ma kimuruon kogeerei bororiosiek, che kimi ichek kwenunywa, bororiosiek che kigeerei aborjinige ichek, amutu komong’ eng’ emetab Misri.

10Amutu anyun ichek komong’ eng’ emetab Misri, amutu kobwa ong’atet.

11Ak kiagochi ichek ng’atutikyuk, ak aborji kiruogutikyuk, che ngo yai chi kosobei eng’ choto.

12Kiagochi ichek kogeny sabatosiekyuk agichek, koek kaborunet eng’ kwenunnyu, ane ak ichek, si kobiit konai kole a Jehovah ne atabani ichek.

13Ago kiingelelja gotab Israel eng’ ong’atet: ma bendate ng’atutikyuk, ak kiesio kiruogutikyuk, che ngo yai chi kosobei eng’ choto; kiimuruon ichek mising’ sabatosiekyuk: kiamwa anyun ale, arong’jini ichek eng’ ong’atet neregekyuk che ng’wonen si ages ichek.

14Ago kiaboisie anyun kainennyu, si ma kimuruon eng’ taitab bororiosiek, che kigeeronu ichek amutu komong’.

15Kogeny, kiang’werere ichek eunnyu eng’ ong’atet, ale mamuti ichek koba emet ne kiagochi, ne nyiitat chego ak kumik, ne torornatetab emotinwek tugul;

16amu kiesio kiruogutikyuk, ama bendate ng’atutikyuk ak komuruon sabatosiekyuk: amu kiisubot mugulelwekwak kanamonikwak.

17Nganda u noto, ko kirire kondanyu ichek si mang’em, ama agesu ichek eng’ ong’atet.

18Ak kialenji lagokwak eng’ ong’atet, Amobendate ng’atutikab kwanisiekwok, anan osub kiruogutikwak, anan ong’wanitege kanamonikwak;

19a Jehovah Kamuktaindeng’wong’; obendate ng’atutikyuk, ak orib kiruogutikyuk ak oyai;

20ak otaban sabatosiekyuk; si koek kaborunet eng’ kwenunnyo, ane ak okwek, si kobiit onai ole a Jehovah Kamuktaindeng’wong’.

21Ago kiingelelja agichek lagok; ma bendate ng’atutikyuk anan korib kiruogutikyuk, koyai, che ngo yai chi kosobei eng’ choto; kiimuruon ichek sabatosiekyuk: amwa anyun ale arong’jini ichek neregekyuk che ng’wonen si kobiit ayai neregekyuk kosulda eng’ ichek eng’ ong’atet.

22Ago kiaiste eunnyu, kiaboisie amu kainennyu, si ma kimuruon eng’ taitab bororiosiek, che kigeeronu ichek amutu komong’.

23Ak kiang’werere ichek eunnyu eng’ ong’atet, si kobiit aseer ichek eng’ bororiosiek, ak ayeste ichek koyom emotinwek;

24amu ma yai kiruogutikyuk, ago kiesio ng’atutikyuk, ak komuruon sabatosiekyuk, ak kiisuboti konyekwak kanamonikab kwanisiekwak.

25Kiagochi anyun kogeny ng’atutik che kima ko miachen, ak kiruogutik che masobe;

26ak kiamuruon ichek eng’ konunoikwak ichegei, amu kiigoito lagok tugul che yatei iyotet kobun mat, si kobiit agochi ichek kobononso, si konai kole a Jehovah.

27Noto anyun, ee weritab chi, ng’alalji gotab Israel ilenji ichek, Mwaei Kiptaiyat Jehovah ko u ni kole: Kigochuba kwanisiekwok kogeny eng’ nito amu kachiliilutiet ne kiyaiywa.

28Amu ye kingamutu ichek kobwa emet, ne kiaiitochi eunnyu agochi, kogeer tulwet age tugul ne koi, ak ketit age tugul ne nyigis, ak kiigoito eng’ oloto korosekwak, ak kiigoito eng’ oloto kagochinoikwak che bo tagisiet, kibeelei kogeny nyamdutikwak, ak korong’ji oloto kagochinoikwak che kieei.

29Yeityo alenji ichek, Bo nee komosta ne toror ole obendi? Kigiguure anyun yoto Bama agoi rani.

30Mwachi anyun gotab Israel ilenji, Mwaei Kiptaiyat Jehovah ko u ni kole: Tos omuruonige ko u biteetab kwanisiekwok? Ak oyae kugoinatet osubi tugukwak che kiwechei?

31Ak ye ogoitoi kagochinoikwok, ye ogoitoi werikwok kobun mat, ko tos ma omuruonege kanamonikwok agoi rani? Ko tos oteepsena, okwek gotab Israel? Mwaei Kiptaiyat Jehovah kole, Ko u ye asobe, ko ma achame oteepsena:

32ak mabiitu agot kitigin noto obwati; amu omwae ole, Kigergeitu ak bororiosiek, ak kergeitu ak ortinwekab emotinwek, keot ketik ak koik.

33Mwaei Kiptaiyat Jehovah kole, Iman, ko u ye asobe, aegu laitoriat aboiywok eng’ eut ne kim, ak eng’ eut ne chuulat, ak eng’ neregek che ng’wonen che rong’ugei.

34Ak amutwok omong’u eng’ bororiosiek, ak ayumak eng’ eut ne kim, ak eng’ eut ne chuulat, ak eng’ neregek che ng’wonen che rong’ugei, omong’une emotinwek ole kigiseerjok;

35ak amutwak obwa ong’atetab bororiosiek, ak agerak kong’ kimni eng’ oloto.

36Ko u ye kiagere kong’ kwanisiekwok eng’ ong’atetab emetab Misri, agerok kong’ anyun ko u noto, mwaei Kiptaiyat Jehovah.

37Ak amutak obun kureretab kirokto, ak amutwak obwa ratutietab kayomisutiet.

38Ak atililok aiste ngelelik eng’ kwenung’wong’, ak ichek che kiingelelja; amutu ichek komong’ eng’ emet ne kigaba kotebe, ago mabendi emetab Israel: si kobiit onai ole a Jehovah.

39Ago eng’ okwek, ee gotab Israel, mwaei Kiptaiyat Jehovah ko u ni kole: Ngot ko moepcha it; obe anyun ak koot chi tugul kanamonikyik eng’ betusiek che bwanei agichek: ago ma omuruoni kainennyu ne tilil kogeny eng’ kagochinoikwok, ak eng’ kanamonikwok.

40Amu tun ota got komugul ne bo Israel eng’ tulwennyu ne tilil, eng’ tulwet ne koi ne bo Israel, ota ichek tugul eng’ emet, mwaei Kiptaiyat Jehovah: ataache ichek eng’ oloto, ak amagenak eng’ oloto kagochinoikwok, ak tongoanikab kagochinoikwok, koboto tugukwok tugul che tililen.

41Ataachok ko u nyamdutiet ne anyiny, ye amutwok omong’une bororiosiek, ak ayumak omong’une emotinwek ole kigiseerjok; ak aegu ne itabanat eng’ okwek kogeerei bororiosiek.

42Ak onai ole a Jehovah, ye amutwok obwa emetab Israel, emet ne kiaiitochi eunnyu ale agochini kwanisiekwok.

43Ak obwat eng’ oloto ortinwekwok ak boisionikwok tugul, che kiong’wanitege; ak osasge amu yaitwogikwok tugul che kioyai.

44Ak onai ole a Jehovah, ye kaaboisie agobo okwek amu kainennyu, ma ko u ortinwekwok che yaachen, ama ko u boisionikwok che samis, ee okwek gotab Israel, mwaei Kiptaiyat Jehovah.

45Ak kinyonja ng’olyotab Jehovah, kolenja,

46Ee, weritab chi, tokyi togeng’ung’ murot ne bo tai ak imwachi ng’aleguk murot ne bo tai, ak imaotenji osnetab emetab Murot ne bo Tai;

47ak imwachi osnetab Murot ne bo Tai, ilenji, Kas ng’olyotab Jehovah; Mwaei Kiptaiyat Jehovah ko u ni kole: Keero, anaami mat eng’ kwenung’ung’, ak kobeel ketit age tugul ne tuon, ak ketit age tugul ne yaamat: magimisi liblibenetab maata, ak komel togochik tugul koboch murot ne bo tai agoi murot ne bo katam.

48Ak kogeer bik tugul kole a Jehovah ne kanaami maata: magimisi.

49Amwa anyun ale, Bwa Kiptaiyat Jehovah! Mwaei ichek agobo ane kole, Tos ma ng’alalindet ne bo kalewenaik inendet?