Ezekiel 18

Kalenjin Bible (BUKUIT NE TILIL)

← Chapter 17 Jump to: Chapter 19 →

1Kinyonja kogeny ng’olyotab Jehovah, kolenja,

2Oboru nee si oboisie kalewenoni agobo emetab Israel, olen, Kigoam kwanisiek sabibuk che mindililen, ak kiliil kelekab lagok?

3Mwaei Kiptaiyat Jehovah kole, Ko u ye asobe, ko ma oboisie kogeny kalewenonito eng’ Israel.

4Ogeero, chechuk sobonwekab bik tugul; ko u ye nenyu sobondab kwanda, ko nenyu agine sobondab werit: meei sobondab chito ne yaei tengekto.

5Ago ngot ko bo iman chi, ak koyai kit ne bo iman ak ne litit,

6ak tomo koamisie tulonok, ama tokyi kanamonik che bo gotab Israel, ama ing’wanit osotiotab chitab kokwennyi, ama rikyi kwony eng’ betusiekyik che bo arawet;

7ak tom koyachi chi kiy ne ya, ago kogoweekta kit ne kiginame besendo, koweekyi chito ne kiginame besendo, koweekyi chito ne kiyaachei, ama rebe chi kiy eng’ koromnatet, ak kigogochi amitwogik chito ne amei rubet, ak kolaaksechi ne mi ach ngor;

8inendet ne tom kogoito tuguk si konyorune kelunet ne siirtoot, ama ibei che tesotin, ne kigoistoe eunnyi tengekto, ne kigoyai kiruoget ne bo iman eng’ kwenutab bik,

9ne kigowendote ng’atutikyuk, ak korib kiruogutikyuk, si koyai iman, bo iman chichoto, sobei inendet iman, mwaei Kiptaiyat Jehovah.

10Ngot kosich chichoto werit ne rebindet, ne tumdoi korotik, ak koyaei kit age tugul eng’ tuguchuto,

11ama yaei age eng’ boisionichuto, ago kigoamisie tulonok, ak kigong’wanit osotiotab chitab kokwennyi,

12ne kigoyachi ne ya kibananiat ak ne matinyei kiy, ne kigorebis eng’ koromnatet, ne tom koweekta kit ne kiginame besendo, ak kigotokyi konyekyik kanamonik, ne kigoyai kit ne kiwechei,

13ne kigogoito tuguk si konyorune kelunet ne siirtoot, ak koib che tesotin: tos sob chichoto iman? Masobei: kigoyai tuguchuto tugul kiwechei: meei iman; tebe inendet korotikyik.

14Ara anyun, ogeero, ngot kosich chichoto werit, ne keerei tengekwogik tugul che bo kwandanyi, che kigoyai, ak koiywei, ama yai ko u noto,

15ne tom koamisie tulonok, anan kotokyi konyekyik kanamonikab gotab Israel, ne tom kong’wanit osotiotab chitab kokwennyi,

16ne tom koyachi chi age tugul kiy ne ya, ne tom koib kiy ne kiname besendo, anan korebis eng’ koromnatet, ago kigogochi amitwogikyik chito ne amei rubet, ak kolaaksechi ne mi ach ngor,

17ne kigoisto eunnyi si matwa kibananiat, ne tom kotaach kelunet ne siirtoot anan che tesotin, ne kigoyai kiruogutikyuk, ne kigowendote ng’atutikyuk; ko mameei chichoto amu ng’ogistab kwandanyi, sobei iman.

18Ago ne u kwandanyi, amu kiusis eng’ kolgoliet, ak kereb tugukab tupchennyi eng’ koromnatet, ak koyai ne ma mie eng’ bikyik, ogeero, meei inendet eng’ tengektanyi.

19Ago omwae okwek ole, Amu nee anyun si manam werit ng’ogistab kwandanyi? Ye kagoyai werit kit ne bo iman ak ne litit, ak korib ng’atutikyuk, ak koyai, kosobei inendet iman.

20Meei chito ne yaei tengekto: manamei werit ng’ogistab kwandanyi, ama namei kwanda ng’ogistab werinnyi; tebe chito ne bo iman imandanyi, ak kotebe kiptengekyot tengektanyi.

21Ago ngot koweek kiptengekyot kometo tengekwogikyik tugul che kigoyai, ak korib ng’atutikyuk tugul, ak koyai kit ne bo iman ak ne litit, kosobei iman, mameei.

22Magiityin inendet agot agenge eng’ bistaosiekyik che kigoyai: sobei inendet eng’ imandanyi ne kigoyai.

23Tos abaibai eng’ meetab kiptengekyot? Mwaei Kiptaiyat Jehovah: tos ma abaibai ngo week kometo orennyi si kosob?

24Ago ye week ne bo iman kometo imandanyi, ak koyai tengekto, ak koyai ko u tuguk tugul che kiwechei che yaei chito ne ya, ko tos sob? Magibwati agot agenge eng’ boisionikyik che bo iman che kigoyai: meei amu kachililutiennyi ne kigoyai, ak amu tengektanyi ne kigoyai.

25Ago omwae ole, Ma bo iman oretab Jehovah. Ogas anyun-o, gotab Israel: tos ma bo iman orennyu? Tos ma ortinwekwok che ma bo iman?

26Ye week chito ne bo iman kometo imandanyi, ak koyai tengekto, ak kome eng’ tengegoto; meei anyun amu tengektanyi ne kiyai.

27Kogeny, ye week kiptengekyot kometo tengektanyi ne kiga koyai, ak koyai kit ne bo iman ak ne litit, kosoru sobondanyi kosob.

28Amu ruchin ak kometo bistaosiekyik tugul che kigoyai, kosobei iman, mameei.

29Ago mwaei gotab Israel kole, Ma bo iman oretab Jehovah. Ee gotab Israel, tos ma bo iman ortinwekyuk? Tos ma ortinwekwok che ma bo iman?

30Aruokwok anyun, ee gotab Israel, chi age tugul ko u ortinwekyik, mwaei Kiptaiyat Jehovah. Oweege, ak owalage, omete bistaosiekwok tugul; si maek tengekto ng’emisieng’wong’.

31Omete bistaosiekwok tugul che kigogonok obistoe; ak ochopchige muguleldo ne leel ak tamirmiriet ne leel: amu nee si obegu, ee gotab Israel?

32Amu ma abaibai eng’ meetab inendet ne meei, mwaei Kiptaiyat Jehovah: owalage anyun, si osopche.

← Chapter 17 Jump to: Chapter 19 →