Ezekiel 27

Kalenjin Bible (BUKUIT NE TILIL)

← Chapter 26 Jump to: Chapter 28 →

1Kinyonja kogeny ng’olyotab Jehovah kolenja,

2Ee inye, weritab chi, rir agobo Turo,

3ak ilenji Turo, Ee inye ne imenye ole kimandoe kebendi nyanjet, ne i chemung’arindet ne bo bororiosiek che bo ngegusiek che chang’, mwaei Kiptaiyat Jehovah ko u ni kole: Ee Turo, kiimwa ile, Agesunotge eng’ kororonindo.

4Mi kiwotosieguk kwenutab nyanjosiek, kigoyai teegiguk kororonindang’ung’ koek ne igesunotgei.

5Kigoyai ichek baoiniguk eng’ biribirinik che bunu Senir: kigoib taragonik eng’ Lebanon si kobiit koyaun toloitab melit.

6Kigoyai ichek mugangoguk che kiwase beek, ketikab Basan; kiyae seremusieguk kelekab belek, che kigiliige taragonik che ter che bunu ngegusiekab Kitim.

7Ki bo katanit ne kararan ne kiginde lelesta, angeng’ung’ ne kibunu Misri, si koek eng’ inye songoliet; ki tuui ne nyalil ak ko arus ne birir emaing’ung’ ne kibunu ngegusiekab Elisa.

8Ki kiboitiniguk che bo melit, bik che kimenyei Sidon ak Arbad: ee Turo, kimenyin biguk che ng’omen che kikwerie melit.

9Kimenyin boisiekab Gebal koboto bikyik che ng’omen che kitimoti ole kaundur: kimi kwenung’ung’ melisiek tugul che bo nyanjet koboto kiboitinikwak si koyai mung’areng’ung’.

10Kimi lugeng’ung’ bikab Persia, ak che bo Lud ak che bo Put, mureniguk che bo luget: kigigartat eng’ inye long’et ak chepkulet; kiibarta ichek kororonindang’ung’.

11Kimi bikab Abad koboto lugeng’ung’ irimoiguk barak komoswek tugul, ak kimi Gamadik teeksosieguk che koen: kiigartat long’onikwak eng’ irimoiguk eng’ komoswek tugul; kigoyai kororonindang’ung’ koek ne igesunotgei.

12Ki chemung’araindeng’ung’ Tarsis amu chang’indab magornatosiek alak tugul; kiyaei mung’aret eng’ feda, karik, kibatinik ak ngosielaisiek, si konyor tuguguk.

13Ki chemung’arainiguk Jaban, Tubal, ak Mesek: kiyae mung’aret bik ak tugukab sugunonik koale tuguguk.

14Kiyae mung’aret ichek che bo gotab Togarma mbartanyisiek, ak mbartanyisiek che bo luget, koboto nyumbusiek si konyor tuguguk.

15Ki chemung’arainiguk bikab Dedan: kiek ole ialdoisie ngegusiek che chang’: kialunenen tuguguk kelekab belek ak ketik che tuuen.

16Ki chemung’araindeng’ung’ Suria, amu chang’indab tugukab musognateng’ung’: kiyae mung’aret sumaragdoisiek, ak ngoroik che arusen ne birir, ak ngoroik che kiginde lelesta, ak katanit ne kararan, ak tuguk che biriren che mi ngegut, ak koik che biriren si konyor tuguguk.

17Ki chemung’arainiguk Juda, ak emetab Israel: kiyae mung’aret nganokab Minit, ak panag, koboto kumik, ak mwanik, ak mwanik che kinyaise, si konyor tuguguk.

18Ki chemung’araindeng’ung’ Damasko amu chang’indab tugukab musognateng’ung’, amu chang’indab magornatosiek alak tugul; koboto divaikab Helbon, ak kororikab kechirek che leelach.

19Kiyae mung’aret Bedan ak Jaban tuguk che bunu Usal: kiboto tuguguk che bo mung’aret, karik che kita kitanyi, kasia ak kalamus.

20Ki chemung’araindeng’ung’ Dedan eng’ ngoroik che kiitoi eng’ mbartanyisiek.

21Ki chemung’arainiguk Arabia, ak bounik tugul che bo Kedar; kialdaun arekab kechir ak mengichik, ak ng’ororek.

22Chemung’arainikab Sheba ak che bo Raama ko ki chemung’arainiguk: kiyae mung’aret tuguk che ng’uu ne anyiny kosiir tugul, ak koik tugul che bo kamanutiet ne o, ak tahabu.

23Haran, Kane ak Eden, chemung’arainikab Sheba, Asur ak Kilmad, ko ki chemung’arainiguk.

24Ki chemung’arainiguk chuto eng’ tuguk che kororon, ngoroik che tuuen ne nyalil ak che kiginde lelesta, ak moingonik che kororon kot, che kigirate boroonik, ak keyae taragonik, kiboto choto tuguguk che bo mung’aret.

25Kiibei tuguguk che bo mung’aret melisiekab Tarsis: ak kiitesage, ak itororitu mising’ eng’ kwenutab nyanjosiek.

26Kigomutun kiboitiniguk che bo melit inyo beek che chang’: kiriebin usonetab kong’asis eng’ kwenutab nyanjosiek.

27Ibutyin kwenutab nyanjosiek magornatosieguk, ak tuguguk che bo mung’aret, mung’areng’ung’, kiboitiniguk che bo melit, ak biguk che kweriei melit, biguk che timoti ole kaundur, ak bik che kigonam mung’areng’ung’, ak biguk tugul che bo luget, che mi kwenung’ung’, koboto kweaneng’ung’ tugul che mi kwenung’ung’, eng’ betutab ng’emisieng’ung’.

28Botandos kiwotosiek amu waagatab biguk che kweriei melisiek.

29Chorugei eng’ melisiekwak bik tugul che wasei beek eng’ mugangok, koboto kiboitinik, ak bik tugul che bo nyanjet che kweriei melisiek, tonondos eng’ ngegut.

30Ak kowaach kot igas, ak koririo eng’ ng’wanindo, ak kolakyin temburiek metowekwak, ak komildaegei orek:

31ak kocher metowekwak amu inye, ak kogermenegei kuniok, ak koririo agobo inye eng’ ng’wanindo ne bo sobondo, ak eng’ rirek che ng’wonen.

32Ak korirjin eng’ kateiyenwa, ak korirjin kole, Ng’o ne u Turo, ne kiging’em kewirji kwenutab nyanjet?

33Ye kibun tuguguk che bo mung’aret nyanjosiek, kiinyiit bororiosiek che chang’, kiigochi laitorinikab ng’ony koek magorek eng’ chang’indab magornatosieguk.

34Eng’ betut ne kigiiriin eng’ nyanjosiek eng’ rirosiek, kiibutyo tuguguk che bo mung’aret eng’ kwenung’ung’, koboto kweaneng’ung’ tugul.

35Kwong’enen bik tugul che menyei ngegusiek, ak koiyweis mising’ laitorinikwak, toogu arogenet eng’ togochikwak.

36Renyin chemung’arainik che mi bororiosiek; kiiegu kamuiset ama ibiitu agoi.

← Chapter 26 Jump to: Chapter 28 →