Ezekiel 40 — Kalenjin Bible (BUKUIT NE TILIL)

1Kimi baragunnyu eutab Jehovah eng’ kenyitab tiptem ak mut, koboch ngab keluulech, eng’ taunetab kenyit, eng’ betutab taman ne bo arawet, eng’ kenyitab taman ak ang’wan koboch ngab kebar nganaset, ak komutwa anyo oloto eng’ betunoto.

2Kiimutwa eng’ ng’ang’utikab Kamuktaindet anyo emetab Israel ak kondea tulwet ne koi mising’, ole kimi itondab teeksetab nganaset eng’ murot ne bo tai.

3Ak kiimutwa anyo yoto, ak ogeero, kimi yoto chi, ne ki u itondanyi itondab sugunwet kotinyei borowetab katanit eng’ eunnyi, ak tegat ne kikwaise; ak kitonone ormarichet.

4Ak kilenja chichoto, Ee, weritab chi, keer eng’ konyeguk, ak igas eng’ itiguk, ak inde muguleldang’ung’ tuguk tugul che ta aborun; amu kagimutun inyo olito si kobiit aborun tuguchuto: tetyi gotab Israelk tuguk tugul che igeere.

5Ak ogeero, kimi inatut ne kiyiem got, ak kimi eutab chichoto tegat ne kikwaise ne bo kakwautik lo che bo eut eng’ koindo, kakwautiet age tugul eng’ choto lo, ko ki tesat tebeesindo agenge ne bo eut: kiikwa anyun tebeesindab inatut, koek tegat agenge; ak kiek koindab tononennyi tegat agenge.

6Kiit anyun ormarichet ne tokyingei kong’asis, ak kolany kobun long’eiywot, ak kiikwa seremut ne bo ormarichet, kiek tegat agenge tebeesindo: ak kiek seremunoto tegat agenge tebeesindo.

7Ak kiek koindab got age tugul ne bo orit tegat agenge, ak ki tegat agenge tebeesindo; ak ki kakwautik mut che bo eut koboch got age agoi got age; ak ki tegat agenge seremut ne bo orit ne bo ormarichet ne kimi ole kibunei kebendi keterut ne bo ormarichet ne tokyingei got.

8Kiikwa kogeny keterut ne bo ormarichet ne tokyingei got, koek tegat agenge.

9Yeityo kokwa keterut ne bo ormarichet koek kakwautik sisiit che bo eut; ak kiek tugatugikyik kakwautik aeng’ che bo eut; ak kitokyingei keterut ne bo ormarichet got.

10Ak ki somok gorik che kimi komosi ak komosin che bo ormarichet ne kitokyingei kong’asis; kiaechin tugul ko somok: ak kiaechin tugatugikab komosi ak komosin.

11Ak kiikwa tebeesindab ole kibunei eng’ ormarichet, ki kakwautik taman che bo eut; ak kiek koindab ormarichet kakwautik taman ak somok che bo eut;

12ak kimi tegeleiywot taitab gorichoto bo orit, ne bo kakwautiet agenge ne bo eut eng’ komosi, ak tegeleiywot age ne bo kakwautiet agenge ne bo eut eng’ komosin; ak ki kakwautik lo che bo eut gorichoto bo orit eng’ komosi ak komosin.

13Ak kiikwa ormarichet koboch got barak ne bo got age agoi got barak ne bo got age, kiek tebeesindo kakwautik tiptem ak mut che bo eut; kong’eete kurget age agoi kurget age.

14Kiikwa keterut, ak kiek kakwautik tiptem che bo eut; kibunei keterut kemong’jin seremut ne o.

15Kiek kakwautik konom che bo eut koboch taitab ormarichet ne kibunei kebendi orit agoi taitab keterut ne bo orit ne bo ormarichet.

16Ak kitinyei gorichoto bo orit tirisiok che regerotin, koboto tugatugikwak che kimi ormarichanato komosta age tugul, ak ki u noto eng’ keterut: ak kimi tirisiok komoswek tugul ole bo orit: ak kimi itonwekab tironik eng’ tugatukyet age tugul.

17Kikimutwa anyun anyo seremut ne kimong’jin, ak ogeero, kimitoti gorik che bo orit, ak ole kigibunoti ole kigimale koik, che kigiyai koyiem seremut: kimi gorik sosomu oloto kigimale koik.

18Kimi komoswek che kigimal ole negite ormarichok, che aechin ak koindab ormarichok, choto komoswek che tabanu ng’ony.

19Yeityo kokwa tebeesindo koboch ormarichet ne tabanu ng’ony, agoi taitab seremut ne bo orit ole bo sang’, kiek kakwautik bogol che bo eut eng’ komostab kong’asis ak eng’ murot ne bo katam.

20Ak kiikwa koindo ak tebeesindo ne bo ormarichetab seremut ne kimong’jin ne tokyingei murot ne bo katam.

21Ak kimi gorikyik somogu che bo orit komosi ak komosin; kiaechin kakwautikab tugatugikyik koboto che bo keterunnyi, ak che bo ormarichet ni ka bo tai; ki kakwautik konom che bo eut koindanywa ak kakwautik tiptem ak mut tebeesindo.

22Ak ki aechin kakwautikab tirisiokyik, ak che bo keterunnyi, koboto che bo itonwekyik che bo tironik, ak che bo ormarichet ne tokyingei kong’asis; ak kitogostae long’eiywot ne tinyei tuguk tisab che kitiegoti; ak kimi tainywa keterunnyi.

23Ak kimi ormarichet ne kebunei kebendi seremut ne bo orit ne kitokyingei ormarichet ne bo murot ne bo katam ak kimi ormarichet ne kitokyingei ormarichet ne bo kong’asis; ak kiikwa kong’eete ormarichet age agoi ormarichet age, koek kakwautik bogol che bo eut.

24Ak kiimuta atokyige murot ne bo tai, ak ogeero, kimi ormarichet ne tokyingei murot ne bo tai: ak kiikwa tugatugikyik ak keterunnyi kogergeit ak kakwautik chu ka bo tai.

25Ak kitinyei tirisiok ormarichanato koboto keterunnyi eng’ komoswek tugul che u tirisiochu ka bo tai: ki kakwautik konom che bo eut koindo, ak ki kakwautik tiptem ak mut che bo eut tebeesindo.

26Ak kimi long’eiywot ne tinyei tuguk tisab che kitiegoti, ketogostoi, ak kimi keterut tainywa: ak kitinyei tugatugikyik itonwekab tironik komosi ak komosin.

27Ak kimi ormarichet ne kebunei kebendi seremut ne bo orit ne tokyingei murot ne bo tai: ak kiikwa kong’eete ormarichet age agoi ormarichet age kotokyigei murot ne bo tai, koek kakwautik bogol che bo eut.

28Kiimutwa anyun agoi seremut ne bo orit abune ormarichet ne bo murot ne bo tai: ak kiikwa ormarichet ne bo murot ne bo tai ko u kakwautik chu ka bo tai;

29koboto gorikyik che bo orit, ak tugatugikyik, ak keterunnyi, ko u kakwautik chu ka bo tai: ak kitinyei tirisiok ormarichanato koboto keterunnyi eng’ komoswek tugul: ki kakwautik konom che bo eut koindo, ak ki kakwautik tiptem ak mut tebeesindo.

30Ak kimi keterut komoswek tugul, ne ki kakwautik tiptem ak mut che bo eut koindo, ak ki kakwautik mut che bo eut tebeesindo.

31Ak kitokyingei keterunnyi seremut ne bo sang’; ak kimi itonwekab tironik tugatugikyik: ak kitinyei long’eiywot tuguk sisiit che kitiegoti ketogostoi.

32Ak kiimutwa anyo seremut ne bo orit ne tokyingei kong’asis: ak kiikwa ormarichet ko u kakwautik chu ka bo tai;

33koboto gorikyik che bo orit, ak tugatugikyik, ak keterunnyi, ko u kakwautik chu ka bo tai: ak kitinyei tirisiok keterunnyi eng’ komoswek tugul; ki kakwautik konom che bo eut koindo, ak ki kakwautik tiptem ak mut che bo eut tebeesindo.

34Ak kitokyingei keterunnyi seremut ne sib kemong’jin; ak kimi itonwekab tironik tugatugikyik eng’ komosi ak komosin: ak kitinyei long’eiywot tuguk sisiit che kitiegoti ketogostoi.

35Ak kiimutwa anyo ormarichet ne bo murot ne bo katam: ak kiikwa ko u kakwautik chu ka bo tai;

36koboto gorikyik che bo orit, ak tugatugikyik, ak keterunnyi; ak kitinyei tirisiok eng’ komoswek tugul: ki kakwautik konom che bo eut koindo ak ki kakwautik tiptem ak mut che bo eut tebeesindo.

37Ak kitokyingei tugatugikyik seremut ne sib kemong’jin; ak kitinyei tugatugichoto itonwekab tironik eng’ komosi ak komosin, ak kitinyei long’eiywot tuguk sisiit che kitiegoti ketogostoi.

38Ak kimi got ne bo orit koboto kurgennyi ye negite tugatugikab ormarichok; kigiune yoto kagochinet ne kibeelei.

39Ak kimi ye negite keterutab ormarichet, mesosiek aeng’u eng’ komosi ak aeng’ eng’ komosin, che kieng’jin kagochinet ne kibeelei, ak kagochinetab tengekto, ak kagochinetab chalwokto.

40Ak kimi mesosiek aeng’u eng’ komosta age eng’ ole bo sang’ eng’ ole kitogostoe kebendi ormarichet ne tokyingei murot ne bo katam; ak kimi mesosiek aeng’u komosta age che ki bo keterut ne bo ormarichet.

41Kimi mesosiek ang’wanu komosi, komi mesosiek ang’wanu komosin, eng’ ole negite ormarichet; mesosiek sisiit che kigieng’jin tiseiywek.

42Ak kimi mesosiek ang’wanu, che bo koik che kigiwai, che bo kagochinet ne kibeelei, ko kakwautiet agenge ak kebeberta ne bo eut, koindo, ak ki kakwautiet agenge ak kebeberta ne bo eut, tebeesindo, ak ki kakwautiet agenge ne bo eut, koindab tononennyi: kigigonore mesosiechoto tuguk che kigieng’e kagochinet ne kibeelei koboto tiseiywot.

43Ak kigiratyi kombok komoswek tugul, che koindanywa ko ki te tebeesindab eut: ak kimi banyekab kagochinet mesosiek barak.

44Ak kimi sang’utab ormarichet ne bo orit gorik che bo orit che bo tienik eng’ seremut ne bo orit, ne kimi komostab ormarichet ne bo murot ne bo katam; ak kitokyingei murot ne bo tai: kimi age komostab ormarichet ne bo kong’asis ne tokyingei murot ne bo katam.

45Ak kimwawa kolenja, Bo goito tokyingei murot ne bo tai tisiik, che tononjin ripsetab got.

46Ak bo got ne tokyingei murot ne bo katam tisiik che tononjin ripsetab kaptisisiet: chuto ko werikab Sadok, che salu werikab Lawi, che rikyin Jehovah koboisiechin inendet.

47Ak kiikwa seremut, koek kakwautik bogol che bo eut tebeesindo, kiaechin komoswek tugul ko ang’wan, ak kimi kaptisisiet taitab got.

48Kiimutwa anyun anyo keterutab got, ak kiikwa tugatukyet age tugul ne bo keterut, kiek kakwautik mut che bo eut komosi, koek kakwautik mut che bo eut komosin: ak kiek tebeesindab ormarichet kakwautik somok che bo eut komosi koek kakwautik somok komosin.

49Kiek kakwautik tiptem che bo eut koindab keterut, koek kakwautik taman ak agenge che bo eut tebeesindo; ak kimi tuguk tamanu che kigitiegoti ketogosyin yoto: ak kimi tolochik ole negite tugatugik, kimi age komosi, komi age komosin.