Ezekiel 45

Kalenjin Bible (BUKUIT NE TILIL)

← Chapter 44 Jump to: Chapter 46 →

1Ak ye opche emet eng’ seretab barbarek koek borotet, ogochi Jehovah kagochinet, kebeberta ne tilil ne bo emet: egu koindo tegat elfusiek tiptem ak mut, ak koek tebeesindo elfusiek taman: egu emonoto ne tilil eng’ kiwotennyi tugul eng’ komoswek tugul.

2Bunjin kebebertab emonoto komosta ne tilil ne egu koindo bogol mut, koek tebeesindo bogol mut, aechin komoswek tugul ko ang’wan; ak emotinwekyik che kiyagisie, koegu kakwautik konom che bo eut komoswek tugul.

3Ak eng’ nito kaikwa, ikwa koindo koek elfusiek tiptem ak mut, ak koek tebeesindo elfusiek taman: ak komi oloto ole tilil, ole tilil mising’.

4Noto ko kebeberta ne tilil ne bo emet, bunjin tisiik, kiboitinikab ole tilil, che rikyin Jehovah koboisiechin; ak kobunji oloto gorikwak, ak kobunji ole tilil komosta ne tilil.

5Bunjin Lawik kiboitinikab got, koindo ne bo elfusiek tiptem ak mut, ak tebeesindo ne bo elfusiek taman, konamjigei kobunji, koek nganasok che menyei.

6Ak omarar komosta ne bunjin nganaset koek elfusiek mut tebeesindo, koek koindo elfusiek tiptem ak mut, kotetgei ak kagochinetab kebeberta ne tilil: bunjin got komugul ne bo Israel.

7Ak kobunji bounindet emet ne mi komosi ak komosi ne bo kagochinet ne tilil ak ne bo emet ne bunjin nganaset, eng’ taitab kagochinet ne tilil, ak eng’ taitab emet ne bunjin nganaset, eng’ ole tokyingei cherongo, ak eng’ ole tokyingei kong’asis: ak aechin koindanyi ak age eng’ kebeberwechoto, koboch kiwotet ne bo cherongo agoi kiwotet ne bo kong’asis.

8Bunjin inendet emonoto eng’ Israel: ama kousei kogeny bounikyuk bikyuk; ago igochin emet gotab Israel kobee bororiosiekwak.

9Mwaei Kiptaiyat Jehovah ko u ni kole: Ingoyamak noto, ee bounikab Israel: oiste koromnatet ak ng’emisiet, ak oyai kiruoget ak imanda; oiste yaakset ne oyaache bikyuk eng’ kimnatet, mwaei Kiptaiyat Jehovah.

10Oboisie kerutik che aechin che bo iman, ak epah ne bo iman ak debeisiek aeng’ che bo iman.

11Aechin epah ak debeisiek aeng’, ak debeisiek aeng’ che kanyi tuguk ko kergei ak kebeberta agenge eng’ taman che bo homer, ak epah agenge ko kergei ak kebeberta agenge eng’ taman ne bo homer: egu homer kit ne kigerisie kotugul.

12Ak yamei sekel agenge ak gerahisiek tiptem: sekelisiek mut koegu sekelisiek mut, sekelisiek taman koegu sekelisiek taman, ak sekelisiek konom ko maneh neng’wong’.

13Ni ko kagochinet ne ogoitoi; kebeberta agenge eng’ lo ne bo epah eng’ homer ne bo nganok, ak ogoite kebeberta agenge eng’ lo ne bo epah eng’ homer ne bo sairik:

14ak kebebertab mwaita ne kiging’at ne bo debeisiek aeng’ che bo mwaita, koegu kebeberta agenge eng’ taman ne bo debeisiek aeng’ che bo kor, choto ko debeisiek tiptem, noto ko homer agenge, amu debeisiek tiptem ko yamei homer:

15koboto aruet agenge ne bo akwetab kechirek, ne kileweni eng’ bogol aeng’, ne bunu emet ne bitat ne bo Israel; egu chuto kagochinetab busiek ak kagochinet ne kibeelei, ak kagochinoikab kalyet, si kobiit koyai kagaigaet agobo ichek, mwaei Kiptaiyat Jehovah.

16Igoitoi bik tugul che bo emet kagochinoni agobo bounindet eng’ Israel.

17Ak koek boisietab bounindet kagochinoik che kibeelei, ak kagochinoik che bo busiek, ak kagochinoik che kieei eng’ igorwek, ak eng’ ye kaleel arawet, ak eng’ sabatosiek, eng’ igorwek tugul che kiging’at che bo gotab Israel: chobei inendet kagochinetab tengekto, ak kagochinetab busiek, ak kagochinet ne kibeelei, ak kagochinoik che bo kalyet, si koyai kagaigaet agobo gotab Israel.

18Mwaei Kiptaiyat Jehovah ko u ni kole: Eng’ arawet ne bo tai, eng’ betut ne bo tai ne bo arawanato, igetu kirgit ne libwob ne barnotiot, si ianyiny ole tilil.

19Ak konam tisiindet korotikab kagochinetab tengekto, ak konde tugatugikab got, ak koiile luukwek ang’wan che bo tegeleiywotab kaptisisiet, ak koiile tugatugikab seremut ne bo orit.

20Ak iyai ko u noto eng’ betutab tisab ne bo arawet agobo age tugul ne lelei, ak agobo inendet ne abusat: oyae anyun ko u noto kagaigaet agobo got.

21Eng’ arawet ne bo tai eng’ betutab taman ak ang’wan ne bo arawanato, ochob paska, igorta ne bo betusiek tisab; kiamei makatinik che ma kinde mermerek.

22Ak chobei eng’ betunoto bounindet kirgit ne bo kagochinetab tengekto, agobo ge ak agobo bik tugul che bo emet.

23Ak kochopchi Jehovah kagochinet ne kibeelei eng’ betusiek tisab che bo igorta, kirugik tisab ak mengichik tisab che libwoben tugul, eng’ betut age tugul ne bo betusiechoto tisab; ak kwesta ne bo kagochinetab tengekto ne bo betut age tugul.

24Ak kochob kagochinetab busiek, epah agenge eng’ kirgit agenge, ak epah agenge eng’ mengit agenge, ak hin agenge ne bo mwaita eng’ epah agenge.

25Yaei inendet ko u nito eng’ arawetab tisab, eng’ betutab taman ak mut ne bo arawanato, eng’ betusiek tisab che bo igorta; yaei ko u noto eng’ kagochinetab tengekto, ak eng’ kagochinet ne kibeelei, ak eng’ kagochinetab busiek ak eng’ mwanik.

← Chapter 44 Jump to: Chapter 46 →