Ezekiel 38

Kalenjin Bible (BUKUIT NE TILIL)

← Chapter 37 Jump to: Chapter 39 →

1Ak kinyonja ng’olyotab Jehovah, kolenja,

2Ee, weritab chi, tokyi togeng’ung’ Gog, ne bo emetab Magog, bounindetab Ros, Mesek, ak Tubal, ak imaoten agobo inendet,

3ilenji, Mwaei Kiptaiyat Jehovah ko u ni kole: Keero, aborienen, ee Gog, bouinindetab Ros, Mesek, ak Tubal;

4awelelin, ak ande kombok tagilgiliguk, ak amutun koboto lugeng’ung’ tugul, mbartanyisiek ak bik che lanyei mbartanyisiek, kolaachi tugul karik tugul che bo luget, luget ne o ne tinyei long’onik che eechen ak che mengechen, kotinyei tugul rotokab chok:

5mi koboto ichek Persia, Kus, ak Put; kotinyei tugul long’onik ak chepkuloik che bo karik:

6koboto Gomer ak lugosiekyik tugul; koboto gotab Togarma eng’ tabanwek che looen che bo murot ne bo katam, ak lugosiekyik tugul: bororiosiek che chang’ che mi koboten.

7Choboge, ee chopge, inye koboto lugosieguk tugul che kaiyumjingei, ak iegu kandoindenywa.

8Kibwanjinin ko kagosiirto betusiek che chang’: iite eng’ kenyisiek che bo let emet ne kigiweegune rotwetab chok, ne kigiweech eng’ bororiosiek che chang’, eng’ tolonokab Israel, ne kiga koguber betusiek che chang’: ago kigiweech komong’ eng’ bororiosiek ak komeng’is tugul eng’ chametab ge.

9Ak itogosu, inye ko u usonet, iige boldet ne tuchei emet, inye koboto lugosieguk tugul, komi bororiosiek che chang’ koboten.

10Mwaei Kiptaiyat Jehovah ko u ni kole: Bwanjinin kabwatutik eng’ betunoto, ak ibwat chobutiet ne ya:

11ak imwa ile, Atogostoi emetab nganasok che matinyei irimoik; awendi ole mi ichek che mi eng’ kalyet, che meng’isiei eng’ chametab ge, meng’isiei ichek tugul ama tinyei irimoik, ama tinyei temeleiywek anan ormarichok:

12si kobiit aluul ak aib barunenik; si kobiit ibar komoswek che ki karatwek che kimenyei nguno, ak obarge ak bik che kigiyum komong’une bororiosiek, che tinyei tuga ak tuguk, che menyei emet kwen.

13Teebenen Sheba, ak Dedan, ak chemung’arainikab Tarsis, koboto ng’etunikyik tugul che neranik, kolenjinin, Tos kenyo iluul? Tos kaiyum lugosieguk si kobiit iib barunenik? Si kobiit iib feda ak tahabu, ak ikweri tuga ak iib tuguk, iluul luulet ne o?

14Maoten anyun, ee, weritab chi, ak ilenji Gog, Mwaei Kiptaiyat Jehovah ko u ni kole: Eng’ betut ye tun kameng’is bikyuk Israel eng’ chametab ge, ko tos menae?

15Ak inyo eng’ oldang’ung’ eng’ tabanwek che looen che bo murot ne bo katam, komi bororiosiek che chang’ koboten, kolanyei tugul mbartanyisiek, bik che chang’, ak ko luget ne kim:

16ak obwa obarge ak bikyuk Israel, ko u boldet ne tuchei emet; amutun eng’ betusiek che bo let obwa obarge ak emennyu, si kobiit konaa bororiosiek, ye tun aegu ne itabanat eng’ inye, ee Gog, eng’ tainywa.

17Mwaei Kiptaiyat Jehovah ko u ni kole: Tos inye ne kiamwaite keny eng’ otwogikyuk maotikab Israel, che kimaoteni eng’ betusiechoto eng’ kenyisiek che chang’ kole tun amutun inyo obarge ak ichek?

18Mwaei Kiptaiyat Jehovah kole, Ye tun baregei Gog ak emetab Israel, eng’ betusiechoto, kobiit neregekyuk che ng’wonen che mong’une serunekyuk.

19Amu kaamwa eng’ ng’etkondanyu ak eng’ matab neregekyuk, ale, Biitu iman botanet ne o eng’ betunoto eng’ emetab Israel;

20kot kobotanso eng’ tainnyi njirenikab nyanjet, ak taritik che bo barak, ak tiong’ikab timin, ak tuguk tugul che ichuutegei ng’ony, koboto bik tugul che mitei ng’ony, ak kiluul tulonok, ak kong’isiogen ole keigei, ak kolul irimet age tugul.

21Ak aguur rotwetab chok kobargei ak inendet agoi tulonokyuk tugul, mwaei Kiptaiyat Jehovah: baregei chi tugul ak tupchennyi.

22Ak ager kong’ inendet eng’ koroito ak korotik; ak ayokyi inendet, koboto lugosiekyik, ak bikyik che chang’ che mi koboto inendet, ropta ne o, ak koik che eechen che bo ropta, ak mat, ak tuguk che laldos.

23Ak atororge, ak atabange, ak abartege eng’ taitab bororiosiek che chang’; si konai ichek kole a Jehovah.

← Chapter 37 Jump to: Chapter 39 →