Ezekiel 41

Kalenjin Bible (BUKUIT NE TILIL)

← Chapter 40 Jump to: Chapter 42 →

1Yeityo komutwa anyo hekalut, ak kiikwa tugatugik, kiek kakwautik lo che bo eut tebeesindo eng’ komosi, koek kakwautik lo che bo eut eng’ komosin, ne ki tebeesindab emait.

2Ak ki kakwautik taman che bo eut tebeesindab ole kibunei kebendi orit; ak komoswekab ole kibunei kebendi orit ko ki kakwautik mut che bo eut eng’ komosi, ak kakwautik mut che bo eut eng’ komosin: ak kiikwa koindanyi, koek kakwautik artam che bo eut, koek tebeesindo kakwautik tiptem che bo eut.

3Kiwa anyun inendet orit, ak kokwa tugatukyet age tugul ne bo ole kibunei kebendi orit, kiek kakwautik aeng’ che bo eut: ak kiek kakwautik lo che bo eut, ole kibunei kebendi orit; ak kiek kakwautik tisab che bo eut tebeesindab ole kibunei kebendi orit.

4Ak kiikwa koindanyi, koek kakwautik tiptem che bo eut, koek tebeesindo kakwautik tiptem che bo eut, eng’ taitab goyoto: ak kilenja, Olito ole tilil mising’.

5Yeityo kokwa inatutab got, koek kakwautik lo che bo eut; ak kiek tebeesindab got age tugul ne mi taban, kakwautik ang’wan che bo eut, che kimitoti oldo tugul eng’ got eng’ komosta age tugul.

6Ak kimitoti gorik che kigiyab koba barak konyil somok, eng’ baragutab got age tugul ne kimi inat, kiek sosom tugul ko katetatgei; ak kichut gorjoto bo taban inatusiekab got che bo gorik che mengechen, che mi taban eng’ komoswek tugul, si kobiit kotiiegei, si matiiegei inatutab got.

7Ak kitesogis gorjoto kigiyab kobaraitu koba barak; ko u ye kiyiem got kotes koba barak; amu ye kiyiemei got ko kitesak koba barak eng’ komoswek tugul che bo got: kitesak anyun tebeesindab got kwo barak; kiimuchi chi kotogosta kong’eete got ne tabanu ng’ony agoi got ne tabanu barak kobunei got ne bo kwen.

8Kiageer kogeny ale tinyei got ole sutot eng’ komoswekyik: kiyamegei lumeiywek che bo gorik che mi inat ak tegat ne bo kakwautik lo che bo eut.

9Ki kakwautik mut che bo eut nyigisindab inatut ne bo gorik che mi inat che tabanu sang’; ak ole kiga ng’et ko ki oldab gorik che bo inat che ki bo got.

10Ak ki kakwautik tiptem che bo eut tebeesindo ne bo kwenutab gorjoto mengechen, eng’ komosta age tugul ne bo got.

11Ak kitokyingei kurgotikab gorjoto bo kwen ole kiga ng’et, kitokyingei kurget age murot ne bo katam, kotokyingei age murot ne bo tai: ak ki kakwautik mut che bo eut tebeesindab komosta ne kiga ng’et, eng’ komoswek tugul.

12Ak ki kakwautik tamanwogik tisab che bo eut tebeesindab got ne kitokyindos ak komosta ne kimi taban eng’ komosta ne tokyingei cherongo; ak ki kakwautik mut che bo eut nyigisindab inatutab got eng’ komoswek tugul, ak ki kakwautik tamanwogik sogol che bo eut koindanyi.

13Kikwa anyun got, koek kakwautik bogol che bo eut koindo; ak kiek koindab komosta ne kimi taban, koboto got ak inatusiekyik, kakwautik bogol che bo eut;

14ak kiek kakwautik bogol che bo eut tebeesindab togetab got, koboto che bo komosta ne kimi taban eng’ komostab kong’asis.

15Ak kiikwa koindab got ne kitokyindos ak komosta ne kimi taban, ne kimi ole bo batai, koboto komoswekyik che kigibendote che kimi komosi ak komosin, koek kakwautik bogol che bo eut; koboto hekalut ne bo orit, ak keterusiekab seremut;

16koboto tugatugik, ak tirisiok che regerotin, ak komoswek che kibendote, che kimi komoswek tugul che bo gorikyik che kigiyab koba barak konyil somok, che tokyingei tugagukyet, che kigiliige ketik komoswek tugul, koboch ng’ony agoi tirisiok; kiga kituch anyun tirisiochoto;

17agoi kurget barak, agoi got ne bo orit, ak ole bo sang’, ak kobun inatut tugul komosta age tugul orit ak sang’, kobee kakwaet.

18Kigiwai itonwekab kerubik ak che bo tironik; ak kiga rubatgei tironik ak kerubisiek; ak kitinyei itonda age tugul ne bo kerubit togochik aeng’;

19kitokyingei anyun toget ne u ne bo chito tiret age, eng’ komosta age, kotokyingei toget ne u ne bo ng’etundo ne neran tiret age eng’ komosta age: kigiyai ko u noto eng’ komoswek tugul che bo got komugul.

20Kiga kiyai itonwekab kerubisiek ak che bo tironik kong’eete ng’ony agoi baragutab kurget: ki u noto anyun inatutab hekalut.

21Kitinyei koriosiek ang’wan tugatugikab kurgetab hekalut; ak ki u togetab ole tilil itondab hekalut.

22Ki bo ketik kapkorosut, ak ki bo kakwautik somok che bo eut koindab tononennyi, ko bo kakwautik aeng’ che bo eut koindanyi; ak ki bo ketik luukwekyik, koboto koindanyi ak inatusiekyik: ak kimwawa kolenja, Ni ko meset ne mi taitab Jehovah.

23Ak kitinyei hekalut ak ole tilil kereiywek aeng’ che bo kurgotik.

24Ak kitinyei kereiywot age tugul kebeberwek aeng’, kebeberwek aeng’ che arung’oksei; kitinyei kereiywot agenge kebeberwek aeng’, kotinyei kereiywot age kebeberwek aeng’.

25Ak kigiwachi kereiywechoto bo hekalut itonwekab kerubisiek ak che bo tironik, ko u che kiga kiwachi inatusiek; ak kimi bambanik che nyigisen eng’ keterut sang’.

26Ak kimi tirisiok che regerotin ak itonwekab tironik eng’ komosi ak komosin, eng’ komoswekab keterut: ki u noto gorjoto mengechen che kimi inatutab got, ak bambanik che nyigisen.

← Chapter 40 Jump to: Chapter 42 →