Ezekiel 5

Kalenjin Bible (BUKUIT NE TILIL)

← Chapter 4 Jump to: Chapter 6 →

1Ee inye, weritab chi, cheng’jige rotwetab chok ne ng’atib, ak iboisie ko u rotwetab chito ne inemu metit, si icherune meting’ung’ ak tamneng’ung’: yeityo inam kit ne kirogendoisie, ak igere, si ipchee sumeechoto.

2Ak ibeel kebeberta agenge eng’ somok eng’ kwenutab nganaset, ye kagosulda betusiekab yiemet; ak iib kebeberta age eng’ somok ak irarate ieb kotuiyo eng’ rotwonoto bo chok; ak iseerte kebeberta agenge eng’ somok koib usonet, ak ang’usu rotwetab chok asube ichek.

3Ak inam sumeek che ng’ering’, ak iratyi ngorieng’ung’.

4Ak inemu alak eng’ chuto kogeny, ak iwirji ma, ak ibeel eng’ ma; si komong’une mat sumeechoto ak kobeel got tugul ne bo Israel.

5Mwaei Kiptaiyat Jehovah ko u ni kole, Nito ko Jerusalem: kiande kwenutab bororiosiek, ak mi emotinwek komoswekyik.

6Ak kigongelelji kiruogutikyuk amu kiyai sogornatet kosiir bororiosiek alak, ak kongelelji ng’atutikyuk kosiir emotinwek che mi komoswekyik tugul: amu kigoesio kiruogutikyuk, ama bendate ichek ng’atutikyuk.

7Mwaei anyun Kiptaiyat Jehovah ko u ni kole: Amu o bik che wasegei kosiir bororiosiek che mi komoswekwok, ama obendate ng’atutikyuk, ama orib kiruogutikyuk, ama osub ng’atutikab bororiosiek che mi komoswekwok;

8mwaei anyun Kiptaiyat Jehovah ko u ni kole, Ogeero, aborienen agane; ak ayai kiruogutik eng’ kwenung’ung’ eng’ taitab bororiosiek.

9Ak ayai eng’ inye kit ne tom ayae, ak kit ne matun ayae ne u noto kogeny, amu tuguguk tugul che kiwechei.

10Amei anyun kwanisiek werik eng’ kwenung’ung’, ak koam werik kwanisiekwak; ak ayai kiruogutik eng’ inye, ak aseer bik tugul che ng’etu eng’ okwek, aseerji usonaik tugul.

11Mwaei anyun Kiptaiyat Jehovah kole, Ko u ye asobe aming’inin iman, amarirenen kondanyu, anan korira mo, amu kiing’wanit oldanyu ne tilil eng’ tuguguk tugul che samisen, ak tuguguk tugul che kiwechei.

12Meei kebeberta agenge eng’ somok eng’ inye eng’ koroito, ak kigesu ichek eng’ rubet eng’ kwenung’ung’; ak kobek eng’ rotwetab chok kebeberta agenge eng’ somok, eng’ komosweguk tugul; ak aseer kebeberta agenge eng’ somok koba koriswek tugul, ak ang’usu rotwetab chok kosub ichek.

13Isuldoi anyun neregekyuk ko u noto, ak anerekyini ichek eng’ neregekyuk che ng’wonen, kot koyama, si kigaigaa: si konai ichek kole ane Jehovah ne kiang’alal eng’ kagiilennyu bo ge, ye kaayai neregekyuk che ng’wonen kosulda eng’ ichek.

14Kogeny ayain iegu karatia ak ne kiteweri, eng’ bororiosiek che mi komosweguk tugul, eng’ taitab ichek tugul che siirtoi.

15Egu ko u noto anyun tewernatet ak sasisiet, konetisiet ak kwong’et, eng’ bororiosiek che mi komosweguk tugul, ye ayae kiruogutik eng’ inye eng’ neregek, ak eng’ neregek che ng’wonen, ak eng’ keretab kong’ ne ng’wan: kaamwa ane Jehovah ng’olyondonito:

16ye amwoge ichek kipchabonik che yaachen che bo rubet, che bo ng’emisiet, che ayogu kong’emak, ak ateswok rubet, ak atile amitwogikwok.

17Ak ayokwok rubet, ak tiong’ik che yaachen, che barenen bik; ak kobun kwenung’ung’ koroito ak korotik; ak aibun rotwetab chok konyo baragung’ung’: kaamwa ane Jehovah ng’olyondonito.

← Chapter 4 Jump to: Chapter 6 →