Ezekiel 42

Kalenjin Bible (BUKUIT NE TILIL)

← Chapter 41 Jump to: Chapter 43 →

1Kiimutwa anyun anyo seremut ne sib kemong’jin, eng’ oret ne tokyingei murot ne bo katam: ak kiimutwa anyo got ne ming’in ne kitokyingei komosta ne mi taban, ne kimi taitab inatut ole tokyingei murot ne bo katam.

2Ki kakwautik bogol agenge che bo eut koindab gorik che kimi murot ne bo katam, ak ki kakwautik konom tebeesindo.

3Kimi komoswek aeng’u che kigibendote che kiitorjindos, che ki bo gorik che kigiyab koba barak konyil somok, che kitokyingei kakwautik tiptem che bo eut che bo seremut ne bo orit, ak che kitokyingei ole kigimale koik che bo seremut ne sib kemong’jin.

4Ak kimi taitab gorichoto ole kigibunoti, ki kakwautik taman che bo eut tebeesindo ngeba orit, ko bo kakwautik bogol agenge che bo eut, koindo; ak kitokyingei kurgotikwak murot ne bo katam.

5Ki nwagen anyun gorik che kitabanu barak; amu kiibe boroindo komoswek che kigibendote, kosiir gorik che kitabanu ng’ony, ak che bo kwen, che kimi goyoto.

6Amu kimitoti gorik che kigiyab koba barak, konyil somok, ak kima kotinyei tolochik che u tolochikab seremusiek: ki tenden anyun ne kitabanu barak kosiir ne kitabanu ng’ony ak ne bo kwen, kong’eete ng’ony.

7Ki kakwautik konom koindab totet ne kitabanu sang’ ole negite gorjoto mengechen, ne tokyingei seremut ne sib kemong’jin eng’ taitab gorjoto mengechen.

8Amu ki kakwautik konom che bo eut koindab gorjoto kimi seremut ne sib kemong’jin: ak ogeero, ki kakwautik bogol agenge che bo eut che kimi taitab hekalut.

9Ak kimi kurget eng’ kureretab gorjoto mengechen, eng’ komostab kong’asis ye wendi chi gorjoto kobunei seremut ne sib kemong’jin.

10Kimi gorik che mengechen totet orit ne bo seremut ne tokyingei kong’asis, ne tokyindos ak komosta ne mi taban eng’ taitab got.

11Ak ki u oret ne kimi tainywa kergeindab oret ne ki bo gorik che mengechen che kitokyingei murot ne bo katam; kiaechin koindanywa ak tebeesindanywa: ak ki u atebenywa tugul ak kurgotikwak, ole kibunei kebendi sang’.

12Ak kimi kurget ne ki u kurgotikab gorik che mengechen che kitokyingei murot ne bo tai, eng’ oret meto, oret ne kimi taitab totonoto, ne kitokyingei kong’asis, ye wendi chi orit.

13Kilenja anyun, Gorik che mengechen che mi murot ne bo katam ak che mi murot ne bo tai, che tokyindos ak komosato mi taban, choto ko gorik che tililen, ole ame tisiik che negite Jehovah tuguk che tililen mising’: konore oloto tuguk che tililen mising’, koboto kagochinoikab busiek, ak kagochinoikab tengekto, ak kagochinoikab chalwokto; amu tilil komosato.

14Ye ba tisiik orit, ko mamandoi eng’ ole tilil kobendi seremut ne sib kemong’jin, ama konore yoto ngoroikwak che kaboisie; amu tililen ngoroichoto: yeityo kolaach ngoroik alak, si koriktoi ole mi bik.

15Ak kingo kagoges kakwaetab got ne bo orit, komutwa among’une oret ne bo ormarichet ne tokyingei kong’asis, ak kokwa komoswek tugul.

16Kiikwae tegat ne kikwaise komostab kong’asis, koek tegandanato bogol mut, kiikwae tegandanato komoswek tugul.

17Kiikwa komostab murot ne bo katam, koek tegandanato bogol mut, kiikwae tegandanato komoswek tugul.

18Kiikwa komostab murot ne bo tai, koek tegandanato bogol mut, kiikwae tegandanato.

19Kiwelelgei kotokyigei komostab cherongo, ak kokwae tegandanato koek bogol mut, kiikwae tegandanato.

20Kiikwa komoswek ang’wan: kigiyieme inatut, ne koindanyi ko ki kakwautik bogol mut, ak tebeesindanyi ko ki kakwautik bogol mut, si kobiit kooiyo komosta ne tilil ak komosta ne bo bik.

← Chapter 41 Jump to: Chapter 43 →