2 Chronicles 23

Khmer 2014 (អាល់គីតាប)

← Chapter 22 Jump to: Chapter 24 →

1លុះដល់ឆ្នាំទីប្រាំពីរ អ៊ីមុាំយេហូ‌យ៉ាដា បានតាំងចិត្តក្លា‌ហាន ហើយចុះសន្ធិ‌សញ្ញាជាមួយពួកមេបញ្ជា‌ការ គឺមានអសា‌រា ជាកូនរបស់លោកយេរ៉ូ‌ហាំ លោកអ៊ីស្មា‌អែល ជាកូនរបស់លោកយ៉ូហា‌ណាន លោកអសា‌រា ជាកូនរបស់លោកអូបេដ លោកម៉ាសេ‌យ៉ា ជាកូនរបស់លោកអដា‌យ៉ា និងលោកអេលី‌សាផាត ជាកូនរបស់លោកស៊ីក‌គ្រី។

2មេបញ្ជា‌ការទាំងនោះធ្វើដំណើរពាស‌ពេញស្រុកយូដា ហើយប្រមូលពួកលេវីនៅតាមក្រុងទាំងប៉ុន្មានក្នុងស្រុកយូដា ព្រមទាំងប្រមូលមេក្រុមគ្រួសារនៃជន‌ជាតិអ៊ីស្រ‌អែលឲ្យមកជួប‌ជុំគ្នា នៅក្រុងយេរូ‌សាឡឹម។

3អង្គប្រជុំទាំងមូលបានចុះសន្ធិ‌សញ្ញាជាមួយស្តេច នៅក្នុងដំណាក់របស់អុលឡោះ។ លោកយេហូ‌យ៉ាដា និយាយទៅពួកគេថា៖ «នេះនែ៎ បុត្ររបស់ស្តេច! គាត់នឹងគ្រងរាជ្យ ស្របតាមបន្ទូលដែល អុលឡោះ‌តាអាឡា បានថ្លែងទុក ស្តីអំពីរាជ‌វង្សរបស់ស្តេចទត។

4អ្នករាល់គ្នាត្រូវធ្វើដូចតទៅ: ក្នុងចំណោមអ្នករាល់គ្នាដែលត្រូវវេនយាមនៅថ្ងៃឈប់សម្រាក គឺទាំងក្រុមអ៊ីមុាំទាំងក្រុមលេវី មួយភាគបីត្រូវយាមនៅខ្លោងទ្វារ

5មួយភាគបីយាមក្នុងដំណាក់ស្តេច ហើយមួយភាគបីទៀត យាមនៅត្រង់មាត់ទ្វារយេ‌សូដ។ រីឯប្រជា‌ជនទាំងមូល ស្ថិតនៅក្នុងទី‌ធ្លានៃដំណាក់របស់ អុលឡោះ‌តាអាឡា ។

6មិនត្រូវឲ្យនរណាម្នាក់ចូលក្នុងដំណាក់របស់ អុលឡោះ‌តាអាឡា ឡើយ គឺមានក្រុមអ៊ីមុាំ និងក្រុមលេវីដែលចំវេនបំពេញមុខ‌ងារប៉ុណ្ណោះដែលអាចចូលបាន ព្រោះពួកគេជាមនុស្សបរិសុទ្ធ។ ប្រជា‌ជនទាំងមូលត្រូវគោរពតាមបំរាមរបស់ អុលឡោះ‌តាអាឡា ។

7ក្រុមលេវីត្រូវប្រដាប់អាវុធនៅការ‌ពារជុំ‌វិញស្តេច។ នរណាម្នាក់ហ៊ានចូលមកជិតដំណាក់ ត្រូវសម្លាប់គេចោល។ ចូរនៅជាប់ជាមួយស្តេចជា‌និច្ច ទោះបីស្តេចចេញ ឬចូលក៏ដោយ»។

8ក្រុមលេវី និងប្រជា‌ជនយូដាទាំងមូល នាំគ្នាធ្វើតាមបញ្ជាទាំងប៉ុន្មានរបស់អ៊ីមុាំយេហូ‌យ៉ាដា ម្នាក់ៗនាំកូនទាហានរបស់ខ្លួន ទាំងអ្នកត្រូវវេនយាមនៅថ្ងៃឈប់សម្រាក ទាំងអ្នកមិនត្រូវវេនយាម ដ្បិតអ៊ីមុាំយេហូ‌យ៉ាដាមិនឲ្យក្រុមណាមួយនៅទំនេរឡើយ។

9អ៊ីមុាំយេហូ‌យ៉ាដាចែកលំពែង ព្រមទាំងខែលរបស់ស្តេចទត ដែលតម្កល់ទុកក្នុងដំណាក់របស់អុលឡោះជូនមេបញ្ជា‌ការទាំងនោះ។

10លោកដាក់ពលទាហានទាំងអស់ ដែលប្រដាប់អាវុធគ្រប់ៗដៃ ឲ្យឈរយាមចាប់ពីប៉ែកខាងស្តាំ រហូតដល់ប៉ែកខាងឆ្វេងដំណាក់ ព្រមទាំងនៅជិតអាសនៈ និងនៅក្បែរដំណាក់ ដើម្បីការ‌ពារស្តេច។

11គេអញ្ជើញបុត្ររបស់ស្តេចចេញមក ហើយយកមកុដរាជ្យមកបំពាក់ ព្រមទាំងជូនឯក‌សារនៃសម្ពន្ធ‌មេត្រីផង លោកយេហូ‌យ៉ាដា និងកូនៗរបស់គាត់ ចាក់ប្រេងតែង‌តាំងរាជកុមារជាស្តេច ទាំងស្រែកថា៖ «ជយោ ស្តេច!»។

12កាលនាងអថា‌លាឮសំរែកប្រជា‌ជនដែលរត់ទៅមក ស្រែកអប‌អរ‌សាទរស្តេច នាងទៅមើលពួកគេ នៅក្នុងដំណាក់របស់ អុលឡោះ‌តាអាឡា ។

13នាងឃើញស្តេចថ្មីឈរនៅលើវេទិកា ត្រង់មាត់ទ្វារដោយមានមេ‌ទ័ព និងអ្នកផ្លុំត្រែឈរអមផង។ ប្រជា‌ជនទាំងមូលនៅក្នុងស្រុកនាំគ្នាអប‌អរ‌សាទរ គេផ្លុំត្រែ ហើយអ្នកចំរៀងនាំប្រជា‌ជនច្រៀងសរសើរតម្កើងទាំងប្រគំតូរ្យតន្ត្រីផង។ នាងអថា‌លាហែកអាវស្រែកថា៖ «នេះជាអំពើក្បត់! នេះជាអំពើក្បត់!»។

14អ៊ីមុាំយេហូ‌យ៉ាដាបញ្ជាទៅពួកមេបញ្ជា‌ការដែលគ្រប់‌គ្រងលើពលទ័ពថា៖ «ចូរនាំនាងចេញទៅក្រៅ! បើនរណាគាំទ្រនាង ចូរសម្លាប់ដោយមុខដាវទៅ!»។ អ៊ីមុាំនិយាយទៀតថា៖ «មិនត្រូវប្រហារជីវិតនាងនៅក្នុងដំណាក់របស់ អុលឡោះ‌តាអាឡា ទេ!»។

15គេចាប់នាងនាំទៅវាំងវិញ។ កាលមកដល់មាត់ខ្លោងទ្វារសេះ គេក៏ប្រហារជីវិតនាងនៅទីនោះ។

16លោកយេហូ‌យ៉ាដាចងសម្ពន្ធ‌មេត្រីរវាងខ្លួនផ្ទាល់ ប្រជា‌ជនទាំងមូល និងស្តេច ដើម្បីធ្វើជាប្រជា‌រាស្ត្ររបស់ អុលឡោះ‌តាអាឡា ។

17ប្រជា‌ជនទាំងមូលនាំគ្នាចូលទៅបំផ្លាញវិហាររបស់ព្រះបាល ហើយវាយកំទេចអាសនៈ និងរូបសំណាក ព្រមទាំងសម្លាប់ លោកម៉ាត់‌ថាន ជាបូជា‌ចារ្យរបស់ព្រះបាល នៅមុខអាសនៈទៀតផង។

18លោកយេហូ‌យ៉ាដាចាត់ចែងឲ្យអ៊ីមុាំពីក្រុមលេវី ទទួលខុសត្រូវលើដំណាក់របស់ អុលឡោះ‌តាអាឡា គឺអ្នកដែលស្តេចទតបានចែកជាក្រុម ឲ្យបំពេញមុខ‌ងារក្នុងដំណាក់របស់ អុលឡោះ‌តាអាឡា ដើម្បីធ្វើគូរបានដុតដល់ អុលឡោះ‌តាអាឡា ដូចមានចែងទុកក្នុងហ៊ូកុំរបស់ណាពីម៉ូសា។ ស្តេចទតក៏បានបង្គាប់ឲ្យគេច្រៀងចំរៀងយ៉ាងសប្បាយ ក្នុងឱកាសនោះដែរ។

19លោកយេហូ‌យ៉ាដាបានដាក់អ្នកយាមទ្វារ នៅតាមខ្លោងទ្វារដំណាក់របស់ អុលឡោះ‌តាអាឡា ដើម្បីកុំឲ្យអ្នកដែលមិនបរិសុទ្ធដោយប្រការណាមួយក្តី អាចចូលបានឡើយ។

20បន្ទាប់មកគាត់នាំពួកមេបញ្ជា‌ការ ពួកអភិ‌ជន ពួកអ្នកមុខអ្នកការក្នុងចំណោមប្រជា‌ជន និងប្រជា‌ជនទាំងមូលនៅក្នុងស្រុក មកដង្ហែស្តេចពីដំណាក់របស់ អុលឡោះ‌តាអាឡា ចូលវាំង តាមខ្លោងទ្វារប៉ែកខាងលើ រួចអញ្ជើញស្តេចអង្គុយនៅលើបល្ល័ង្ករាជ្យ។

21ប្រជា‌ជនទាំងមូលនៅក្នុងស្រុកនាំគ្នាអប‌អរ‌សាទរ ហើយទី‌ក្រុងក៏បានសុខ‌សាន្ត។ គេបានប្រហារជីវិតនាងអថា‌លា ដោយមុខដាវ។

← Chapter 22 Jump to: Chapter 24 →