Hosea 11

Luganda (BIBU1) (BIBULIYA ENTUKUVU)

← Chapter 10 Jump to: Chapter 12 →

1“Yisirayeli ng'akyali mwana, namwagalanga, nayita mutabani wange okuva mu Misiri.

2Naye gye nakomya okubakoowoola, gye baakomya okunneesamba; baatambiriranga Baali, ne banyookeza ebifaananyi bya balubaale obubaani.

3Nze nayigiriza Efurayimu okutambula, nga mmukutte ku mukono, naye tebaamanya nti nze nabawonya.

4Nabasikiranga ku miguwa gy'okusaasira okw'obuntu, n'enkoba ez'okwagala; ku bo nali ng'oli ayambula ekikoligo mu nsingo yaabwe, ne nkutama gye bali ne mbaliisa.

5“Tebaliddayo mu Misiri, ne Assuri y'aliba kabaka waabwe, kubanga baagaana okweddamu?

6Ekitala kiritala mu bibuga byabwe, ne kisaanyaawo ebisiba emiryango gyabwe, ne kibavunjaga olw'enteesa zaabwe.

7“Abantu bange bamaliridde okunjabulira. Ne bwe balikoowoolera awamu Ali Waggulu Ddala, talibasitula.

8“Ndikwabulira ntya, ggwe Efurayimu? Ndikuwaayo ntya, Yisirayeli? Nkuyisa ntya nga Aduma? Nkufuula ntya nga Zeboyimu? Omutima gwange gunfuukuuse munda, n'okusaasira kwange kubuguumiridde.

9Sijja kuta busungu bwange obwesera, sijja kukyuka nzikirize Efurayimu, kubanga nze ndi Katonda, siri muntu, Omutuukirivu mu makkati go. Sijja kujjira mu busungu.

10“Baligoberera Omukama, aliwuluguma ng'empologoma; bw'aliwuluguma, abaana balijja bakankana okuva ebugwanjuba;

11bajja kujugumira ng'ebinyonyi okuva mu Misiri, ng'amayiba okuva mu Assuri; ndibatuuza mu nnyumba zaabwe, Omukama y'agamba.

← Chapter 10 Jump to: Chapter 12 →