Hosea 13

Luganda (BIBU1) (BIBULIYA ENTUKUVU)

← Chapter 12 Jump to: Chapter 14 →

1Efurayimu bwe yayogeranga, abantu nga bakankana; yagulumizibwanga mu Yisirayeli; naye yazza omusango ng'asinza Baali n'afa.

2Ate kati bongera kukola bibi, beekolera ebifaananyi bya balubaale ebisaanuuse mu ffeeza waabwe, ebifaananyi bya balubaale bye bakoze n'obukugu; byonna wamu omukozi y'abikoze. Bagamba nti: “Bino bye muba mutambirira!” Abantu ne banywegera obuyana.

3N'olw'ekyo baliba ng'olufu lw'oku makya, ng'omusulo ogukeera okuggwaawo, ng'ebisusunku ebikuŋŋunsibwa okuva mu gguuliro, ng'omukka ogufulumira mu ddirisa.

4“Nze Mukama Katonda wo okuva lwe wali mu nsi y'e Misiri, tewamanyaayo Katonda mulala okuggyako nze; tewaali abawonya mulala okuggyako nze.

5Nze nakuliisa mu ddungu, mu nsi ey'ekyeya ekyokya.

6Bwe nabaliisa mu malundiro, bakkuta, bwe bakkuta ne beewanika, olwo ne banneerabira.

7Nange nzija kubabeerera ng'empologoma, nzija kubateega ku kkubo ng'engo;

8nzija kubabuukira ng'eddubu erinyagiddwako obwana bwalyo, nzija kubataagula ebifuba byabwe, nzija kubakavvula ng'empologoma, ensolo ey'ettale ejja kubayuzaamu wabiri.

9“Yisirayeli, ozikiridde! Sso nno nze nandikuyambye.

10Kabaka wo aluwa akuwonye? Abakungu bo baluwa mu bibuga byo byonna, abo be wayogerako nti: ‘Mpa kabaka n'abakungu’?

11Mu busungu nakuwa kabaka, mu bunyiivu ne mmuggyawo.

12“Omusango gwa Efurayimu guzingiddwa wamu, ekibi kye kiterekeddwa.

13Okulumwa kw'omukazi ng'azaala kumujjira, naye mwana omutali magezi; akaseera nga katuuse, talisembera ku mulyango gwa lubuto.

14Ndibanunula mu mikono gy'emagombe. Walumbe, ekikato kyo kiruwa? Magombe, okuzikiriza kwo kuluwa? Ekisa kya kukisibwa amaaso gange.

15Efurayimu ne bw'aliyala mu baganda be, empewo y'ebuvanjuba erifuuwa, omukka gw'Omukama gulifuuwa okuva mu ddungu, ne gukaza ensulo ze, ne gukaliza enzizi ze; gulireka eggwanika lye nga gulinyazeemu buli kya bugagga.

← Chapter 12 Jump to: Chapter 14 →