Hosea 12

Luganda (BIBU1) (BIBULIYA ENTUKUVU)

← Chapter 11 Jump to: Chapter 13 →

1“Efurayimu anneetoolozza obulimba, n'ennyumba ya Yisirayeli obukuusa. Naye ye Yuda akyamayiddwa Katonda, mwesigwa eri Omutuukirivu.

2Efurayimu alunda mpewo, awondera mpewo y'ebuvanjuba olunaku lwonna, obulimba n'ettemu abyongera bungi. Akola endagaano ne Assuri, n'aweereza omuzigo e Misiri.”

3Omukama alina ky'avunaana Yuda; ajja kubonereza Yakobo ng'agerera ku makubo ge; amusasule ng'asinziira ku bikolwa bye.

4Mu lubuto yakwata ekisinziiro kya muganda we, ng'asajjakudde yameggana ne Katonda.

5Yameggana ne Malayika n'amuwangula; yakaaba n'amuwanjagira amusaasire. Yamusanga e Beteli n'ayogerera naye eyo__

6oyo Omukama Katonda w'Amagye, ajjukirwa bulijjo nga ye Mukama.

7Ggwe nno, dda eri Katonda wo n'obuyambi bwe; kuuma okwagala n'obutuufu, era suubira mu Katonda wo bulijjo.

8Abasuubuzi bakozesa minzaani embi, baagala bulyake;

9Efurayimu agamba nti: “Nfuuse mugagga, neefunidde ebintu.” Newandibadde ku bugagga obwo bwonna, tasobola kuggyawo kibi kye yakola.

10“Nze Mukama Katonda wo okuva lwe wali mu nsi y'e Misiri; nzija kuddamu okukusuza mu weema nga ku lw'Ensisinkano.

11Nayogera eri abalanzi, okulabikirwa ne nkwongera obungi, ne mpita mu bo okwogera engero.

12Oba Gileyaadi ajjudde obugwenyufu, awo nno temuliva kantu. Oba batambira ente ennume mu Gilugali, emyaliiro gyabwe gya kusigala ng'entuumu y'amayinja mu mpangi y'ennimiro.”

13Yakobo yaddukira mu nsi y'e Aramu; Yisirayeli yaweereza alyoke afune omukazi, okuwasa omukazi, yalunda ndiga.

14Nga yeeyamba omulanzi Omukama yaggya Yisirayeli mu Misiri, ng'ayita mu mulanzi yamulabirira.

15Naye Efurayimu yamuleetera okunyiiga ekiyitiridde, Mukama we kyaliva amulekako omusango gw'okuyiwa omusaayi, era agenda kumubonereza olw'obunyoomi bwe.

← Chapter 11 Jump to: Chapter 13 →