Hosea 8

Luganda (BIBU1) (BIBULIYA ENTUKUVU)

← Chapter 7 Jump to: Chapter 9 →

1“Muteeke eŋŋombe ku mimwa. Anti empungu eri waggulu ku nnyumba y'Omukama, kubanga abantu bajeemedde endagaano yange; bamenye etteeka lyange.

2Bandaajanira nti: ‘Ayi Katonda waffe, ffe Yisirayeli tukumanyi!’

3“Naye Yisirayeli yakasuka eri ekirungi; omulabe agenda kumuwondera.

4Bassaawo bakabaka nga tekivudde mu nze; balonda abaami nga simanyi; mu ffeeza waabwe ne zaabu bakolamu bifaananyi bya balubaale, ekinaabaleetera okuzikirira.

5Mwattu Samariya, akayana ko kakasuke eri; obusungu bwange bubeesererako. Banaatuusa wa okwejaajaamya?

6Kubanga kaava mu Yisirayeli. Mubazzi bubazzi ye yakakola, sso si Katonda; akayana ka Samariya ka kumenyebwamenyebwa.

7Kubanga baasiga mpewo, balikungula muyaga; ku kati tekuli kirimba, tekuliva buwunga; kaba kuteekako ŋŋano, abagwira bandigimize.

8“Yisirayeli bamumize, kati ali mu mawanga ng'ekintu omutali nsa.

9Kubanga bambuse mu Assuri, bali ng'endogoyi ey'ettale eri yokka; ye Efurayimu yeetunze mu baganzi be.

10Ne bwe baneetunda mu mawanga, nzija kubakuŋŋaanya; bajja kukogga olw'omugugu gwa kabaka omukulu.

11Efurayimu ne bw'ayongedde obungi emyaliiro olw'ebibi bye, naye emyaliiro gyennyini gifuuse kyonoono.

12Ne bwe nandimuwandiikidde amateeka gange ne genkana wa obungi, yandigatunuulidde ng'ekintu ekigwira.

13Bantambirira ebitambiro, ennyama ne bagirya, naye Omukama tabasanyukira. Kati ajja kujjukira ebyonoono byabwe: bagenda kuddayo mu Misiri.

14Yisirayeli yeerabidde Eyamukola, n'azimba embiri; ye Yuda ayongera bungi bwa bibuga okuli ebigo. Naye nzija kuteekera ebibuga bye omuliro, ogulisenkenya ebigo bye.”

← Chapter 7 Jump to: Chapter 9 →