Hosea 9

Luganda (BIBU1) (BIBULIYA ENTUKUVU)

← Chapter 8 Jump to: Chapter 10 →

1Yisirayeli, tosanyuka; tosagambiza nga mawanga malala, kubanga olese awo Katonda wo n'okola obwamalaaya; osiimye empeera y'obwamalaaya ku buli gguuliro lya ŋŋano.

2Egguuliro n'essogolero tebijja kuliisa bantu, n'evviini ensu teribaganyula.

3Tebalisigala mu nsi ya Mukama, Efurayimu aliddayo mu Misiri ne balya ennyama eteri nnongoofu mu Assuri.

4Tebaliyiira Mukama kitambiro kya vviini, n'ebitambiro byabwe tebirimusanyusa; biribafuukira ng'emmere y'abakungubaga, bonna abagirya balyejaajaamya; emmere eyo erikoma ku bo bokka, teriyingira mu nnyumba ya Mukama.

5Ku lunaku lw'embaga eziragiddwa mulikola ki, ku lunaku olw'embaga y'Omukama?

6Baabo badduka okuzikirira, Misiri eribakuŋŋaanya, Memfi n'abaziika; kamyu alyefuga eby'obugagga byabwe ebya ffeeza n'amatovu galimera mu weema zaabwe.

7Ennaku ez'okubonereza zituuse; ennaku ez'okuwa empeera zisembedde; Yisirayeli ategeere. Omulanzi ayitibwa musiru, abuulirwa Mwoyo atwalibwa ng'omulalu, kubanga ebyonoono byammwe bingi, n'obukyayi bwammwe buyitiridde.

8Omulanzi ye kalabaalaba wa Efurayimu, abantu ba Katonda wange, naye ebitimba bimulindiridde mu makubo ge gonna, n'obulabe mu nnyumba y'Omukama mwennyini.

9Boonoonese kutuusa wala, nga mu budde bwa Gibewa; Katonda alijjukira obugwenyufu bwabwe n'ababonereza olw'ebibi byabwe.

10Lwe nasanga Yisirayeli, kwali ng'okusanga emizabbibu mu ddungu; lwe nalaba bajjajjammwe, kwali ng'okulaba entontogolo z'omukunyu ezisooka; naye bwe bajja ewa Baali ku Pewori, beewonga eri eky'obuswavu, ne bafuuka kyenyinyalwa nga kiri kye baayagala.

11Ekitiibwa kya Efurayimu kibuuka ne kigenda ng'ekinyonyi, teriba kuzaalibwa, oba okuba olubuto yadde okulufuna.

12Ne bwe balikuza abaana baabwe, bonna ndibabamalako; Ziribasanga nga mbavuddeko!

13Efurayimu yanfaananira nga Tiiro, ekisimbiddwa mu kalimiro, naye Efurayimu alireeta abaana be eri asanjaga.

14Ayi Mukama, bawe. Naye onoobawa ki? Bawe embuto ezivaamu n'amabeere amakalu.

15“Olw'ebibi byabwe byonna mu Gilugali, eyo nabakyayirayo; olw'ebikolwa byabwe ebibi, nzija kubagoba mu nnyumba yange. Siriddayo kubaagala, byonna bye bakola bya bujeemu.

16Efurayimu yababuka, ekikolo kyabwe kyakala, tebaabala bibala; ne bwe balizaala abaana, nditta ezzadde lyabwe eribeeyagaza.”

17Katonda wange alibakasuka eri, kubanga tebamuwulidde, baliba babungeese mu mawanga.

← Chapter 8 Jump to: Chapter 10 →