Hosea 2

Luganda (BIBU1) (BIBULIYA ENTUKUVU)

← Chapter 1 Jump to: Chapter 3 →

1“Kyokka abantu ba Yisirayeli mu bungi baliba ng'omusenyu gw'ennyanja, ogutalina kipimo, ogutagenda kubalibwa. Mu kifo we baagambirwanga nti: ‘Temuli bantu bange’, we balibagambira nti: ‘Baana ba Katonda omulamu.’

2Abantu ba Yuda n'abantu ba Yisirayeli baliddamu okwegatta; balyessizaawo omukulembeze omu, ne bava mu nsi eyo, kubanga olunaku lwa Yezureeli luliba lukulu.

3“Mugambe baganda bammwe nti: ‘Bantu bange’, ne bannyinammwe nti: ‘Asaasiddwa’.

4“Muvunaane nnyammwe, mumuvunaane, kubanga ye si mukazi wange, nange siri bba; aggye entunula ye ey'obwamalaaya ku maaso ge, n'obutambuze abuggye mu makkati g'amabeere ge.

5Sikulwa nga mmwambula ne mmuleka bwereere nga bwe yazaalibwa; ndimufuula ng'eddungu, ndimufuula ng'ensi enkalu, ndimussa ennyonta.

6N'abaana be sijja kubasaasira, kubanga baana ba bwamalaaya.

7Kuba nnyabwe yakola obwamalaaya, oyo eyabafuna mu lubuto yakola kya nsonyi. Yagamba nti: ‘Nzija kugenda eri baganzi bange, abampa kye endya ne kye nnywa, ebyoya byange eby'endiga n'engoye eza kitaani, omuzigo gwange n'ekyokunywa kyange.’

8Kale nno ekkubo lye nzija kulisuulamu emisanvu egy'amaggwa, nzija kumwetoolooza olukomera abulweko w'ayita.

9Aliwondera baganzi be, naye tagenda kubatuuka; alibanoonya, naye talibazuula; awo aligamba nti: ‘Ka nzireyo eri musajja wange eyasooka, kubanga olwo nali bulungi okusinga bwe ndi kati.’

10Teyamanya nti nze namuwanga eŋŋano, evviini n'omuzigo; eyamugabuliranga ffeeza ne zaabu, gwe baamalira ku Baali.

11“Awo nno nzija kwedddiza eŋŋano yange ng'etuuse, n'evviini ensu obudde bwayo nga butuuse; nzija kuggyayo ebyoya by'endiga n'engoye za kitaani ebyange, ebibadde bibikka ku bwereere bwe.

12Nzija kwanika obugwagwa bwe mu maaso ga baganzi be; tewali alimunzigya mu mikono gyange.

13Nzija kukomya okujaguza kwe: okw'embaga enkulu, Okuboneka kw'Omwezi, Sabbaato n'embaga ze enkulu eziragiddwa.

14Nzija kwonoona emizabbibu gye n'emikunyu gye, egyo gye yayogerako nti ‘Eno ye mpeera yange gye bampa’; nzija kubizisa bifuuke nsiko, ensolo z'ettale zibirye.

15Nzija kumubonereza nga mmulanga ennaku za Baali, lwe yanyookezanga obubaani, ne yeewoomya n'empeta n'amagemo, olwo n'awondera baganzi be, nze ng'anneerabidde,” Omukama y'agamba.

16“N'olw'ekyo, nzija kumuseemyaseemya, mmutwale mu ddungu, njogere eri omutima gwe.

17Eyo gye nzija okumuweera emizabbibu gye, n'ekiwonvu kye Akori ndikifuula mulyango ogw'essuubi; eyo gy'alyanukulira nga bwe yayanukulanga mu buvubuka, na luli lwe yava mu Misiri.

18Ku olwo,” Omukama y'agamba, “olimpita nti: ‘Baze.’ Toliddamu kumpita nti: ‘Baali wange.’

19Amannya ga Babaali nzija kugaggya ku mumwa gwe; era amannya gaabwe tegaliddamu kukoowoolwa nate.

20Ku olwo ndikuba endagaano ku lwabwe n'ebisolo by'omu nsiko, n'ebinyonyi eby'omu bbanga n'ebyewalula eby'oku ttaka; omutego gw'akasaale, ekitala n'olutalo ndibimala mu nsi; ndibawa ne batuula ntende.

21Nzija kukwogereza obeere wange emirembe gyonna; nzija kukwogereza mu butuukirivu ne mu bulungi, mu kisa era mu kusaasira.

22Nzija kukwogereza mu bwesigwa, olimanya Omukama.

23“Ku olwo, ndyanukula eggulu,” Omukama y'agamba, “nalyo ne lyanukula ensi;

24n'ensi eryanukula eŋŋano, evviini ensu n'omuzigo, nabyo biryanukula Yezureeli.

25Nzija kumwesimbira mu nsi; ŋŋenda kumusaasira oyo gwe natuuma Lo-Rukama; Lo-Ammi ŋŋenda kumutuuma 'Muli bantu bange', naye aliŋŋamba nti 'Oli Katonda wange'.”

← Chapter 1 Jump to: Chapter 3 →