Hosea 7

Luganda (BIBU1) (BIBULIYA ENTUKUVU)

← Chapter 6 Jump to: Chapter 8 →

1Buli lwe mponya Yisirayeli, ebibi bya Efurayimu bye byeyoleka, n'ekyejo kya Samariya nga kirabika. Bali mu kulimba, ababbi bamenya amayumba, n'ebweru abanyazi babba.

2Naye tebalikirowoozaako nti nzijukira ebibi byabwe byonna. Ebyonoono byabwe bibeebunguludde, bulijjo biri mu maaso gange.

3Baasanyusa kabaka n'obugwagwa bwabwe, n'abakungu baabwe ne babasanyusa n'obulimba bwabwe.

4Bonna bali mu bwenzi, bali ng'akabiga akakume omuliro, omukuumi w'omuliro k'ateetaaga na kuseesamu okuva lw'agoya obutta okutuusa lwe buzimba.

5Ku lunaku lw'ekijaguzo kya kabaka waffe, abakungu bacamulwa omwenge, n'akwatagana n'abanyoomi emikono.

6Emitima gyabwe giri ng'akabiga nga bakola enkwe; Obusungu bwabwe bunyooka ekiro kyonna, ku makya ne bubuubuuka ng'ennimi z'omuliro.

7Bonna bookya ng'akabiga, bakavvula bakabaka baabwe; bonna bakabaka baabwe baagwa, mu bo temuli akoowoola gye ndi.

8“Efurayimu yeetabika mu b'amawanga; Efurayimu mugaati muvumbike ogutakyusibwa.

9Abagwira banyuunyunta amaanyi ge, naye ye tamanyi; envi zibamezeemezeeko, naye tamanyi.

10Okwekuza kwa Yisirayeli kumulumiriza, naye tebadda eri Mukama Katonda waabwe, tebamunoonya olwa bino byonna.

11Efurayimu ali ng'eggiba ebbuyabuya, eritategeera; olumu bakoowoola Misiri, olulala bakyukira eri Assuri.

12Bwe baligenda, ŋŋenda kubakasukirako ekitimba kyange; ndibawanulayo ng'ekinyonyi ky'omu bbanga, ndibavunaana olw'obwonoonefu bwabwe.

13“Zibasanze, kubanga banvaako! Bazikirire, kubanga banjeemera. Nandibanunudde, naye bo bannimba bulimbi.

14Tebandaajanira nga kibava ku mitima, wabula bawolomera mu bitanda byabwe, beesalaasala olw'eŋŋano n'evviini ensu, naye ku nze bakyukira eri.

15Nabagunjula, ne ŋŋumya emikono gyabwe, naye nze bandowooleza bibi.

16Tebakyukira eri Ali Waggulu Ddala; bali ng'omutego gw'akasaale omukyamu; abakugu baabwe balifa kitala, olw'olwetumbu lw'olulimi lwabwe; kino kiribasekereza mu Misiri.”

← Chapter 6 Jump to: Chapter 8 →